Pedru Wecipiri 1:1-21
1 Inini Simoni Pedru, muranda uye muphostori wa Djesu Kristu, ndiri kutarira aya aano kutenda kunokosha hinga katinako, katakaona peciseenzeswa unatsi wa Mwari wedu uye Muponesi wedu Djesu Kristu:
2 Nyasha no runyararo ngazvitunhudzirhwe kamuri peciseenzeswa ruziyo re zvirokwazvo ra Mwari uye na Djesu Tenzi wedu,
3 ngokuti no simba guru ra Mwari, takatambira* zviro zvese zvinodikanwa kuti tigare no upenyu we kudzipira no mwoyo wese kuna Mwari, peciseenzeswa ruziyo re zvirokwazvo re Uya akatidainza nge rukudzo rake uye kunaka mwoyo kake.
4 Eciseenzesa zviro izvi, iyena akatipasa gondeso inokosha uye yakakura maningi, kuitira kuti peciseenzeswa iyona imwimwi mugare anhu akaita hingana Mwari, meciponeswa mu kuora ke nyika ino kunokonzerhwa nge zvido zvakashata.*
5 Nge ndaa yazvo, itai zviri zvese kuti pa kutenda kenyu mutunhudzire kunaka mwoyo; pa kunaka mwoyo kenyu, mutunhudzire ruziyo;
6 pa ruziyo renyu, mutunhudzire kudzibata; pa kudzibata kenyu, mutunhudzire kushingirira; pa kushingirira kenyu, mutunhudzire kudzipira no mwoyo wese kuna Mwari;
7 pa kudzipira kenyu no mwoyo wese kuna Mwari, mutunhudzire kudanana hinga hama; pa kudanana kenyu hinga hama, mutunhudzire kuda anhu ese.
8 Ngokuti kana zviro izvi zviri mamuri uye zvecipsvetekera, zvicaita kuti imwimwi musagare anhu asikacaiti mabasa e Cikristu kana kuti asikabari micero panocokuita no ruziyo re zvirokwazvo ra Tenzi wedu Djesu Kristu.
9 Ngokuti kana munhu asina zviro izvi i bofu, unofunga madziso ake ku ciedza,* uye wakanganwa kuceneswa ke zvitema zvake zvekare.
10 Hino hama, tunhudzirai kuseenza no simba kuti musaruze kudainzwa no kusanangurhwa kamakaizwa, ngokuti kana mukarumbwa meciita zviro izvi, amucazoshaishizve.
11 Zvezvirokwazvo kana imwimwi mukaita kudaro, munozopaswa makomborero e kupinda mu Umambo usikaperi wa Tenzi wedu uye Muponesi wedu Djesu Kristu.
12 Nge ndaa yazvo, ndinorumbwa ndecimuedzurirai zviro izvi, kunyazi mecizviziya uye makanyasa kubamba mu cokwadi camunaco.
13 Asi pandinonga ndiri mutenda ino,* ndinoona kuti zvakanaka kumukohomedzesai nge zviedzuriro,
14 ndeciziya kuti mbai-mbai pano tenda yangu ii icabviswa, hinga kudjekeserhwa kandakaizwa na Tenzi wedu Djesu Kristu.
15 Ndicarumbwa ndecipeta masimba kuti mumasure mekuti ndaenda, mukwanise kuedzurira mwega zviro izvi.
16 Haiwa, tainga tisikateedzeri ngano dzo kunyepa dzakaita zvokururhwa patakamuziisai simba uye kuoneka ka Tenzi wedu Djesu Kristu. Pane kudaro, isusu takagara apupuri e ukuru wake.
17 Ngokuti iyena akapaswa rureremedzo no rukudzo kubva kuna Mwari Baba, rukudzo rikuru parakamuziisa masoko ekuti: “Uu ndiye Mwana wangu mudisiswa, wandapfarira.”
18 Honde, masoko aya takaazwa ecibva kudenga patainga tinaye pa dunhu cena.
19 Hino takatunhudzira kugonda katinoita soko re uphorofita, uye muri kuita zvakanaka nge kuzwira soko irona rakaita hinga ciedza cinovheneka mu mbuto ino cidima, kureya mu mwoyo menyu, (dakara kaedza uye nyeredzi yo macibesi yabuda).
20 Ngokuti kutanga munoziya izvi, kuti apana uphorofita uri mu Matarhwa unobva pa kududzirhwa kunondoizwawo no munhu zvecibva mu musoro make.
21 Ngokuti apana pakamboziiswa uphorofita unobva mu ndangariro dze anhu, asi anhu akareketa zvecibva kuna Mwari ecitungamirirhwa no mwiya mucena.
Masoko ari pasi
^ Kana kuti: “takapaswa tisikatengi.”
^ Kana kuti: “zvido.”
^ Mabhaibheri amweni anoti: “i bofu, madziso ake aaoni zviro zviri kure.”
^ Kana kuti: “tabhernakuro,” kureya mwiri wake ari pa nyika.