Pedru Wecipiri 2:1-22
2 Asi pakati penyu pacaoneka afundisi e kunyepa, kuitawo hingana kuoneka kakaita aphorofita e kunyepa pakati pe anhu. Anhu awona acaita kuti paoneke zvikwata zvinotsakatisa, ecizviita mucifise-fise uye oramba muridzi wakaatenga, ecidziunzira kutsakatiswa nokukasika.
2 Uyezve, akawanda awo acateera muhambiro wawo unopsverusa,* uye nge ndaa yazvo anhu akawanda acareketa zvakashata ngezve gwanza re cokwadi.
3 Cimwenizve, nge ndaa ye makaro, anozomucengedzerai ngo masoko e kunyepa. Asi kutongwa kawo kakabhuiwa kare, akuzombononoki uye kutsakatiswa kawo kunozouyadi kamare.
4 Zvezvirokwazvo, Mwari aazi kusiya kuphanica ngirozi dzakashaisha, asi akadzikanda mu Tartaro,* akadzisunga no makorenti mu cidima cakakura kuti dzicengeterhwe kutongwa.
5 Iyena aazizve kurekera kuphanica nyika yokare, asi akaponesa Nowa, muparidzi we unatsi, no amweni 7 aainga anawo paakaunza ndambi huru pa nyika ku anhu aiita zvakashata.
6 Uye iyena akagadza muezaniso we zviro zvinozoizirhwa anhu anoita zviro zvakashata mu nguwa yo mberi ngo kutsakatisa mathaundi e Sodhoma no Gomora, oaita marota.
7 Asi iyena akaponesa Roti, munhu munatsi, waitsukwara maningi ngo muhambiro unopsverusa* we ashaishi—
8 ngokuti munhu uu munatsi paaigara pakati pawo zuwa no zuwa, mwiya* wake wairhwadziwa maningi nge kuona uye nge kuzwa zviito zvawo zvisikapindirani no mutemo.
9 Ngokudaro, Djehovha* anoziya mushobo we kununura nawo pa muedzo anhu anodzipira kaari no mwoyo wese, asi iyena anoita kuti anhu anoita zviro zvakashata azotsakatiswe pa zuwa re kutongwa,
10 maka-maka aya anopsvaka kusvipisa nyama ye amweni, asikareremedzi utongi.*
Asikathyi, anoomesa mwoyo uye anotuka aya anoreremedzwa na Mwari,
11 asi ngirozi, kunyazi dzakabamba maningi uye dzino simba adziatuki no kuashora, ngokuti dzinoreremedza Djehovha.*
12 Asi anhu awona, anoita hinga zvinyama zvisikarangariri zvinoita zviro hinga masikirhwe azvakaizwa uye zvinobarhwa kuti zvibathwe uye zvotsakatiswa, anoreketa zvakashata ngezve zviro zvaasikazii. Awona acatsakatiswa nge ndaa ye maitiro awo akashata,
13 ecitambudzika nge ndaa ye zvishaishi zvawo.
Awona anopfadzwa nge kuita zviro zvinoda mwiri yawo kunyazi comasikati. Awona akaita hinga madonhwe e kukhata ari pa macira no ku hope kakaremara, ecipfara no fundiso dze kucengedzera paanonga eciita mabiko na imwimwi.
14 Madziso awo akadzara no upombwe uye aakwanisi kusiya kuita citema, uye awona anocengedzera aya asikazi kubamba.* Mwoyo yawo yakafundiswa kukara. Awona ndi ana akatukwa.
15 Akasiya gwanza rakanaka uye akapauka. Akateera gwanza ra Bharami mwana wa Bheori, uwo wakada mubairo we kuita zvakashata,
16 asi wakasumururhwa nge kuita zviro zvakashata. Cinyama cisikareketi cinothwariswa zviro, cakareketa naye no izwi ro munhu, coita kuti muphorofita wakhona asaite zviro zve upenzi zvaaida kuita.
17 Anhu aya i zvimbo zvisina mvura uye mhute ino mburuswa ngo dutu guru, awona akacengeterhwa cidima cakakura.
18 Awona anoreketa masoko anoapfadza asi asikabetseri. Anoita kuti anhu agarezve no zvido zve nyama uye no muhambiro unopsverusa,* eciacengedzera kuti aite zviro zvakashata zvaakasiya.
19 Kunyazi ecigondesa rusununguko ku anhu aya, awona kamare ndi aranda e kuora; ngokuti munhu wese unonyiswa nge munhu umweni unogara muranda we munhu wamunyisewo.*
20 Zvezvirokwazvo, kana awona akatangazve kuita zviro zvinosvipisa zve nyika zvaainga akambosiya ecibetserhwa nge ruziyo re zvirokwazvo ngezva Tenzi uye Muponesi Djesu Kristu uye ohwirirazve kuita zviro izvona, mugumisiro wawo we kupedzesera unozoshatisisa kudarika we kutanga.
21 Zvaizonga zviri nani kaari kudai asikazi kugara no ruziyo re zvirokwazvo rinocokuita no gwanza re unatsi, pane kuti mumasure me kuriziya opauka pa mutemo wakacena waakapaswa.
22 Zvakaitika kaari zvinoenderana no cierengo ce zvirokwazvo cinoti: “Imbwa yahwirirazve koorhya marutso ayo, uye nguruwe yainga yasambidzwa yahwirirazve kooburunguta mu matope.”
Masoko ari pasi
^ Soko iri mu Cigrego rinozwi asélgeia, irona rinobatanidza zvakawanda. Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Soko iri mu Cigrego rinozwi asélgeia. Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai Apendi. A5.
^ Kana kuti: “asikareremedzi ano masimba.”
^ Onai Apendi. A5.
^ Kana kuti: “mwiya isikazi kubamba.”
^ Soko iri mu Cigrego rinozwi asélgeia, irona rinobatanidza zvakawanda. Onai pakazwi Kupanganidzwa ke Masoko.
^ Kana kuti: “unonyiswa no ciro, unogara muranda we ciroco.”
