Pedru Wecipiri 3:1-18
3 Hama dzinodiwa, ii itsamba yocipiri yandiri kumutarirai, hinga zvandakaita pa tsamba yokutanga, ndiri kumutsungudzai ndeciseenzesa ciedzuriro ce kukwanisa kurangarira kenyu zvakanaka,
2 kuti muedzurire masoko akarekethwa kare* nge aphorofita acena uye mutemo wa Tenzi uye Muponesi wakarekethwa peciseenzeswa aphostori enyu.
3 Cokutanga, ziyai kuti mu mazuwa e kupedzesera pacaoneka ashori, acauya ecimushorai eciita maererano no zvido zvawo
4 ecibhuya kuti: “Iyena akagondesa kuti acauya, hino ari kupi? Ngokuti kubvira pa nguwa yakafa madzitsekuru edu, zviro zvese zviri kurumbwa zvakaita hinga mushobo wazvainga zvakaita kubvira pakatanga kusikwa zviro.”
5 Ngokuti anoramba cokwadi, cokuti kare-kare kainga kuno denga uye nyika yainga yakanyasa kuima pakaoma no pakati po mvura zvakaizwa nge soko ra Mwari;
6 uye peciseenzeswa zviro izvi, nyika ye mu nguwa iyona yakatsakatiswa payakadzarirhwa no mvura.
7 Asi no soko rimwero matenga uye no nyika, zvekuti zviriyo zvino, zviri kucengeterhwa muriro uye zviri kucengethwa dakara pa zuwa re kutongwa uye re kutsakatiswa ke anhu anoita zvakashata.
8 Hino musakanganwe izvi hama dzinodiwa, kuna Djehovha* zuwa rimwe rakaita hinga makore 1000. Uye makore 1000 akaita hinga zuwa rimwe.
9 Djehovha* aanonoki kuita zvaakapikira, hinga zvinorangarirhwa no anhu amweni, asi iyena anomupangidzirai mwoyo unononoka kutsamwa, ngokuti apana waanoda kuti atsakatiswe, asi anoda kuti anhu ese acinyuke.
10 Asi zuwa ra Djehovha* ricauya hinga mbavha uye pa zuwa irona, denga ricadarika recitinhira, asi zviro zviri kudenga no zviri pa nyika zvicanyunguruka nge ndaa ye kupisa kukuru, uye nyika no mabasa ari mairi zvicabuda pamhene.
11 Sezvo zviro zvese zvicanyunguruswa nge mushobo uu, rangarirai kuti munodikana kugara anhu akaita kudini. Munodikana kugara anhu ano muhambiro wakacena uye meciita mabasa e kudzipira no mwoyo wese kuna Mwari,
12 pamunonga mecietsera uye mecinyasa kurangarira ngezve kuoneka ke zuwa ra Djehovha,* denga parinonga recitsakatiswa no muriro uye zviro zve kudenga no zve pa nyika pazvinonga zvecinyunguruka nge ndaa ye kupisa kukuru!
13 Asi kuno matenga mapsva no nyika ipsva zvatiri kuetsera maererano no gondeso yake, uye imona mucagara no unatsi.
14 Hino hama dzinodiwa, ngokuti muri kuetsera zviro izvi, itai zviri zvese kuti mugumirhwe musina pakasvipiswa, pakashaishika uye muri mu runyararo.
15 Uyewo, onai mwoyo unononoka kutsamwa wa Tenzi wedu hinga ruponeso, hinga zvamakatarirhwawo na Pauro hama yedu inodiwa, maererano no ungwaru waakapaswa,
16 ecireketa ngezve zviro izvi hinga zvaanoitawo mu tsamba dzake dzese. Asi zviro zvinganani zviri imona zvinoshupha kuzwisisa, uye anhu anoramba kuzwira* uye asikazi kudzimikidza ari kucinja zviro izvi, hinga zvaanoitawo no Matarhwa amweni ese uye izvona zvicaita kuti anhuwo atsakatiswe.
17 Hino hama dzinodiwa, meciziya zviro izvi pacino nguwa, ngwarirai kuti musapauswe nge zvishaishi zve ashaishi uye kuti musambwere pa kubamba kenyu.
18 Pane kudaro, rumbwai mecikura mu nyasha dza Mwari uye mu ruziyo ra Tenzi wedu uye Muponesi wedu Djesu Kristu. Iyena ngaakudzwe zvino uye nokusikaperi. Ameni.
Masoko ari pasi
^ Kana kuti: “zviro zvakarekethwa pacino nguwa.”
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Kana kuti: “asikazi kufundiswa.”
