Timoti Wecipiri 1:1-18
1 Inini Pauro, muphostori wa Kristu Djesu nge kuda ka Mwari, maererano no gondeso yo upenyu yakapaswa peciseenzeswa Kristu Djesu,
2 ndiri kutarira Timoti, mwana wangu anodiwa:
Nyasha, usisi no runyararo zvinobva kuna Mwari Baba na Kristu Djesu Tenzi wedu, ngazvigare na iwewe.
3 Ndinotenda Mwari, uya wandiri kuitira basa cena, hinga zvakaizwa no madzitsekuru angu, ndecizviita no hana yakacena, uye ndisikakukanganwi pandinoita munamato we kudeketera usiku no masikati.
4 Pandinoedzurira misodzi yako, ndinogara no cisuwo co kukuona, kuti ndidzare no mupfaro.
5 Ngokuti ndinoedzurira kutenda kako kusina ucengedzi, kutenda kakatanga na mbiya ako Roidhi na mai ako Eunisi, uye ndino rugondo rokuti iwewe unakoo.
6 Ndiyo ndaa, ndinoda kukuedzurira kuti ukhwinidzire hinga muriro, cipo cawakapaswa na Mwari pandakakutsanzikira nyara dzangu.
7 Ngokuti Mwari aazi kutipasa mwiya we kuthya, asi akatipasa mwiya we simba, we rudo no we marangariro akanaka.
8 Ngokudaro, usapsveruke kupupurira ngezva Tenzi wedu kana kuti nge zvangu, musungwa nge ndaa yake, asi wecigonda simba ra Mwari tenda kutambudzikira masoko akanaka.
9 Iyena akatiponesa uye akatidainza kuti tigare acena, haiwa nge ndaa ye mabasa edu, asi nge ndaa yo cinangwa uye nyasha dzake. Nyasha idzona takadzipaswa nge ndaa ya Kristu Djesu kubvira kare-kare,
10 asi zvino dzakapangidzwa pamhene pakapangidzwa Muponesi wedu, Kristu Djesu, iyena akafudza rufu pedzepo oziisa ciedza co upenyu usikaori eciseenzesa masoko akanaka.
11 Nge ndaa ye masoko akanaka aya, inini ndakagadzwa kuti ndigare muparidzi, muphostori uye mufundisi.
12 Ndizvona zvinondiitisa kuti nditambudzike nge zviro izvi, asi andipsveruki. Ngokuti ndinoziya Uya wandinotenda no rugondo rekuti acakwanisa kuiga zvandakamupasa, kuti aonerere dakara pa zuwa irona.
13 Rumbwa wakabatisisa muezaniso we masoko anobetsera awakazwa no kutenda uye rudo rinobva mu rubatano na Kristu Djesu.
14 No rubetso ro mwiya mucena uri matiri, nyasa kucengeta zvawakaigiswa.
15 Iwewe unozviziya kuti anhu ese e mu provhinsiya yo Aziya akandisiya, kutobatanidzawo Fijero na Hermojene.
16 Nyasha dza Tenzi ngadzigare no mhuri ya Oneziforo, ngokuti wakandibambisa kakawanda, uye iyena aazi kupsveruka nge ndaa ye kusungwa kangu.
17 Asi paainga ari ku Roma, iyena wakandipsvaka maningi dakara andiona.
18 Tenzi ngaaite kuti iyena aone nyasha dzinobva kuna Djehovha* pa zuwa irona. Uye iwewe unonyasa kuziya mabasa ese aakaita mu Efeso.
Masoko ari pasi
^ Onai Apendi. A5.
