Timoti Wecipiri 2:1-26
2 Hino mwana wangu, rumbwa wecidzibambisa nge nyasha dziri muna Kristu Djesu;
2 uye zviro zvawakazwa ndini zvecitsigirhwa no apupuri akawanda, zvipasewo anhu akatendeka, izvona zvicaita kuti awona akwaniriswewo kufundisa amweni.
3 Hinga musurudado wakanaka wa Kristu Djesu, tenda kubatana no matambudziko.
4 Apana munhu unoseenza hinga musurudado unobatikana pa kuita mabasa e kutengeserana mu upenyu,* kuitira kuti apfadze uya akamuita kuti agare musurudado.
5 Uye kunyazi pa mitambo, munhu anokwikwidza asikatondoedzi mitemo yo mutambo aapaswi korowa.
6 Murimi unoseenza no simba ndiena unodikana kugara wekutanga pa kurhya micero.
7 Rumbwa wecinyasa kurangarira zvakanaka zvandiri kukubvunza; Tenzi acaita kuti uzwisise zviro zvese.
8 Edzurira kuti Djesu Kristu akamutswa kubva ku akafa uye ainga ari mwana wa Dhavhidhi,* maererano no masoko akanaka andiri kuparidzira,
9 nge ndaa yo masoko awona ndiri kushuphika uye ndakasungwa hinga mushaishi mukuru. Kunyazi zvakadaro, soko ra Mwari arizi kusungwa.
10 Ndiyo ndaa, ndinorumbwa ndecishingirira zviro zvese nge ndaa yo akasanangurhwa, kuitira kuti awona aonewo ruponeso rinouya peciseenzeswa Kristu Djesu, pamwepo no rukudzo risikaperi.
11 Masoko aya ngee zvirokwazvo: Kana takafa pamwepo naye, zvezvirokwazvo ticararama pamwepo naye;
12 kana tikarumbwa tecishingirira, ticatongawo pamwepo naye; kana tikamuramba, iyena acatirambawo;
13 kana tikatama kutendeka, iyena anorumbwa akatendeka, ngokuti iyena aangadzirambi.
14 Rumbwa weciaedzurira zviro izvi, weciafundisa* pamberi pa Mwari, kuitira kuti asareketedzane nge ndaa ye masoko, zviro zvisikabetseri, ngokuti zvinokuwadza* aya anozvipurutana.
15 Peta masimba pa kuita zvese zvaunokwanisa kuti ugare munhu unotenderhwa na Mwari, hinga museenzi asina caanopsveruka naco, uye anoseenzesa zvakanaka soko re zvirokwazvo.
16 Asi ramba masoko asikabetseri anoshatisa zviro zvicena, ngokuti zvinoita kuti munhu abambirire kuita zviro zvakashata,
17 uye masoko awo anobararika hingana ronda riri kunyeka. Amweni awo ndi Imineu na Fireto.
18 Anarume aya akapauka pa cokwadi, ecibhuya kuti rumuko rakatoitika kare, uye ari kutsakatisa kutenda ke amweni.
19 Kusiya izvona, fundasau yakabamba ya Mwari inorumbwa ino cidhindo ce gondeso ii: “Djehovha* anoziya anhu ake,” uye, “Wese uya anodainza zina ra Djehovha* ngaasiye zvisina unatsi.”
20 Mu nyumba huru amuna midziyo* ye oro kana ye prata basi, asiwo muno midziyo ye matabwa uye yo dongo, imweni inoseenzeswa pa basa rinoreremedzwa uye imweni pa basa risikareremedzwi.
21 Ngokudaro, kana munhu akarumbwa ari kure no midziyo inoseenzeswa pa basa risikareremedzwi, unozogara mudziyo unoseenzeswa pa basa rinoreremedzwa, wakacena, unobetsera muridzi wawo, wakagadzirirhwa kuti uite mabasa ese akanaka.
22 Ndiyo ndaa tiza zvido zve udjaha, asi psvaka unatsi,* kutenda, rudo, runyararo, pamwepo no aya anodainza Tenzi no mwoyo wakacena.
23 Uyezve, ramba makani e upenzi uye asina basa, ngokuti unozviziya kuti zvinobara kureketedzana.
24 Muranda wa Tenzi aadikani kureketedzana, asi anodikana kugara mupfawi ku anhu ese, anokwanisa kufundisa, anodikana kudzibata paanonga eciizirhwa zvakashata,
25 anofundisa no upfawi aya asikatendi zvaanofundisa. Pamweni Mwari acaita kuti acinyuke pa zvitema zvawo,* kuti aendeswe ku ruziyo re zvirokwazvo,
26 nge mushobo uwona, awona anozocinyuka odzisudzunura pa murau wa Dhiyabhurosi, ngokuti akabathwa naye kuti aite kuda kake.
Masoko ari pasi
^ Mabhaibheri amweni anoti: “anobatikana mu mabasa e zuwa ne zuwa.”
^ Cigrego: “mbeu ya Dhavhidhi.”
^ Cigrego: “weciapupurira.”
^ Kana kuti: “zvinotsakatisa.”
^ Onai Apendi. A5.
^ Onai Apendi. A5.
^ Kureya zviro zvinoseenzeswa pa mabasa akasiyana-siyana.
^ Onai pakazwi Kupanganidzwa ke Masoko.
^ Kana kuti: “acinje marangariro awo.”
