Timoti Wecipiri 3:1-17
3 Asi ziya kuti mu mazuwa e kupedzesera, kucazooneka nguwa dzinonetsa, dzinoshupha kushingirira.
2 Ngokuti anhu acagara anodzida, anoda maningi mare, anodada, anodzikudza, anotuka, asikazwiri abereki, asikatendi, asikazi kugondeka,
3 asina rudo ro kubarhwa naro, asikadi kupindirana no amweni, ano mapsveda, asikadzibati, anothyisa, asikadi zvakanaka,
4 atengesi, asikazwi zvinobhuya amweni, akadzara ngo kudzikudza, anonyanya kuda mapfaro pa mbuto ye kuda Mwari,
5 anodziita hinga anonamata Mwari asi asikaiti zvinoenderana no kumunamateko; iwewe gara kure nawo.
6 Pakati pawo panobuda anhu anopinda mu mizi dze amweni mu cifise-fise, ecicengedzera anakadzi asina simba, ari kuremerhwa ngo zvitema, anotungamirirhwa ngo zvido zvakasiyana-siyana,
7 ekuti ari kundorumbwa ecifunda, asi aazombogumi pa kugara no ruziyo re zvirokwazvo.
8 Hinga Djane na Djambre akaphikisa Mozesi, awona anorumbwa eciphikisawo cokwadi. Anhu aya ano marangariro akashata maningi, uye kutenda kawo akutenderhwi.
9 Ngokudaro, awona aagumi kure, ngokuti upenzi wawo ucazonyasa kubuda pamhene ku anhu ese, hinga zvakaitika no anarume airi aya.
10 Asi iwewe wakanyasa kuteera kufundisa kangu, mararamiro angu, cinangwa cangu, kutenda kangu, kunonoka kutsamwa kangu, rudo rangu, kushingirira kangu,
11 kuteererhwa kangu uye matambudziko hingana andakabatana nawo ku Antiyokiya, ku Ikoniyo no ku Ristra. Inini ndakashingirira matambudziko ese, uye Tenzi akandinunura pa matambudziko ese aya.
12 Zvezvirokwazvo, ese aya anoda kurarama upenyu we kudzipira no mwoyo wese kuna Mwari mu rubatano na Kristu Djesu acateererhwawo.
13 Asi anhu akashata no acengedzi acabambirira kugara akashata, ecicengedza uye ecicengedzwawo.
14 Asi iwewe, rumbwa uri mu zviro zvawakafunda uye zvawakabetserhwa kuti utende, ngokuti iwewe unozviziya kuti ndiani akakufundisa zviro izvi
15 uye kubvira uciri mudoko unonyasa kuziya Matarhwa macena, angakwanisa kukubetsera kuti ugare wakangwara kuti uone ruponeso nge kutenda muna Kristu Djesu.
16 Matarhwa ese akafemerhwa na Mwari uye anobetsera pa kufundisa, pa kusumurura, pa kugadzirisa zviro, pa kupanga zve unatsi,
17 kuitira kuti munhu wa Mwari anyase kukwanisa, agare no zvese zvaanoda pa kuita mabasa ese akanaka.
