Timoti Wecipiri 4:1-22
4 Pamberi pa Mwari na Kristu Djesu, uya acatonga apenyu no akafa, paacapangidzwa pamhene uye paacauya mu Umambo wake, ndinokubvunza kuti:
2 Paridza soko, zviite nokukasika pa nguwa dzakanaka no dzinoshupha; sumurura, pangira, kohomedzesa no mwoyo unononoka kutsamwa uye no uzii wo kufundisa.
3 Ngokuti inozoguma nguwa yokuti awona anozoramba fundiso yakanaka,* asi maererano no zvido zvawo, anozopsvaka afundisi anoabvunza zvinopfadza nzee dzawo.*
4 Acasiya kupurutana cokwadi uye opurutana ngano dze kunyepa.
5 Asi iwewe, ngwarira zviro zvese, shingirira zvitsinzwa, ita basa re muvhangeri,* uye nyasa kuita zvakanaka basa rako.
6 Ngokuti inini ndiri kudururhwa hinga mupiro we zvinomwiwa, uye nguwa ye kusudzunurhwa kangu yaapadhuze.
7 Ndarhwa hondo yakanaka, ndapedza makwikwi e kugogoma, ndararama maererano no kutenda.
8 Kubvira zvino kuenda mberi, ndakacengeterhwa korowa ye unatsi, yokuti Tenzi, mutongi ano unatsi acandipasa hinga mubairo pa zuwa irona, aazopasi inini basi, asi no amweni ese ari kuetsera* kupangidzwa kake.
9 Ita zviri zvese kuti uuye koondivhakacira nokukasika.
10 Ngokuti Dhema wakanditiza nge ndaa ye kudisisa zviro zve nyika ino, iyena wakaenda ku Tesaronika, Kresenti wakaenda ku Garatiya, Tito woenda ku Dharimatiya.
11 Ruka basi ndiye wandasara naye. Uya pamwepo na Marko, ngokuti iyena unondibetsera maningi pa basa randinoitira Mwari.
12 Asi ndakatuma Tikiko kuti aende ku Efeso.
13 Paunonga woouya, ndiunzisirewo djira rekunza randakasiya ku Troadhe pa nyumba pa Karpo, no mipumburu, maka-maka ye matehwe.
14 Areshandre munyungurusi we kobre wakandiitira zvakashata maningi. Djehovha* anozomuhwirinzira maererano no zviito zvake.
15 Iwewe unodikana kumungwarira, ngokuti wakaphikisa maningi masoko edu.
16 Pandakatanga kudzidziirira pamberi pe anyautongi apana wainga ari ku dii rangu, asi ese akanditiza; ngaasapaswe hawo ndaa.
17 Asi Tenzi akagara ku dii rangu uye akandipasa simba, kuitira kuti peciseenzeswa inini, panyase kuizwa basa re kuparidzira, kuti anhu e madzinza ese aazwe; uye ndakanunurhwa pa muromo we mhondoro.
18 Tenzi acandinunura pa zviro zvese zvakashata uye acandiponesa kuti ndiende ku Umambo wake we kudenga. Iyena ngaapaswe rukudzo rese nokusikaperi. Ameni.
19 Nditambisirewo Priska na Akira uye no mhuri ya Oneziforo.
20 Erasto wakasara ku Korinti, asi ndakasiya Trofimo ku Mireto ecirhwara.
21 Ita zviri zvese kuti ugume kuno nguwa yo mhepo isati yatanga.
Uri kutambiswa na Ebhuru, Pudhente, Rinu, Karaudhiya, no hama dzese.
22 Tenzi ngaakomborere maitiro akanaka aunopangidzira. Nyasha dzake ngadzigare na imwimwi.
Masoko ari pasi
^ Kana kuti: “inobetsera.”
^ Kana kuti: “zvaanoda kuzwa.”
^ Kana kuti: “rumbwa weciparidzira masoko akanaka.”
^ Kana kuti: “ari kuda.”
^ Onai Apendi. A5.
