Juau Wecitatu 1:1-14
1 Inini mwanarume wakura,* ndiri kutarira Gayo, anodiwa, uya wandinoda zvezvirokwazvo.
2 Hama inodiwa, ndiri kuita munamato kuti zvese zvirumbwe zvecikuhambira zvakanaka uye kuti iwewe ugare no uthongo wakanaka, hinga waunawo zvino.
3 Ngokuti ndakapfara maningi hama padzakauya dzobhuya ngezve kubatisisa cokwadi kauri kuita, uye kuti uri kurumbwa wecihamba mu cokwadi.
4 Andina mupfaro* mukuru kudarika uu: Kuzwa kuti ana angu ari kurumbwa ecihamba mu cokwadi.
5 Hama inodiwa, iwewe unopangidza kutendeka kako pa zviya zvaunoitira hama dzako, kunyazi usikatodzizii.
6 Idzona dzakapasa upupuri ngezve rudo rako pamberi pe ungano. Ndapota, ita zvese zvaunokwanisa kuti uenekane nadzo nge mushobo unopfadza Mwari.
7 Ngokuti idzona dziri kuhamba nge ndaa ye zina rake, dzisikazi kutambira ciro kubva ku anhu e madzinza amweni.
8 Hino, isusu tinodikana kutambira zvakanaka hama idzi, kuti tiseenze pamwepo nadzo pa kubetsera cokwadi.
9 Pane zvandakatarira ungano, asi Dhiyotrefe, uya anoda kugara pa mbuto yekutanga pamberi pawo, aatendi no rureremedzo ciro cipi haco cinobva katiri.
10 Ndiyo ndaa kana ndikauyeyo, ndicamubvunza pamhene zviro zvaari kuita, uye no masoko akashata aari kubararisa nge zvedu.* Andizvopi basi, iyena unoramba kutambira hama no rureremedzo; uye unoedza kurambidza uye kudzingira mu ungano aya ari kuda kudzitambira.
11 Hama inodiwa, usateedzere zviro zvakashata, asi teedzera zviro zvakanaka. Uya anoita zviro zvakanaka anobva kuna Mwari. Uya anoita zviro zvakashata aazi kuona Mwari.
12 Ese anoreketa zvakanaka ngezva Dhimetriyo, kutobatanidzawo cokwadi. Zvezvirokwazvo, isusu tinomupupurirawo zvakanaka, uye iwewe unozviziya kuti upupuri wedu ngewe zvirokwazvo.
13 Inini ndainga ndino zviro zvakawanda zvokukutarira, asi andidi kurumbwa ndeciita zvekuzvitara no nhenga uye tinta.
14 Asi, ndinoetsera kukuona mbai-mbai pano, kuti tirekete hope no hope.
Runyararo ngarigare newe.
Shamwari dziri kukutambisa. Nditambisirewo shamwari dzese, imwe na imwe.
Masoko ari pasi
^ Kana kuti: “mukuru we ungano.”
^ Mabhaibheri amweni anoti: “andina cinondipasa mupfaro.”
^ Cigrego: “iyena anosoita mapsveda ecireketa zvakashata nge zvedu.”
