Tsamba ku Aefeso 1:1-23
1 Inini Pauro, muphostori wa Kristu Djesu nge kuda ka Mwari, ku acena ari mu Efeso uye akagondeka ari mu rubatano na Kristu Djesu:
2 Nyasha no runyararo zvinobva kuna Mwari Baba edu na Tenzi wedu Djesu Kristu ngazvigare na imwimwi.
3 Ngaasimbwe Mwari, Baba a Tenzi wedu Djesu Kristu, ngokuti iyena akatikomborera no makomborero ese e kumwiya kumatenga takabatana na Kristu,
4 ngokuti iyena akatisanangura kuti tigare pamwepo naye nyika isati yasikwa, kuti tigare akacena uye tisina pakashatiswa pamberi pake mu rudo.
5 Iyena akatisanangura kare kuti tigare ana ake nge ndaa ya Djesu Kristu, maererano no kuda kake no zvinomupfadza,
6 kuti asimbwe nge ndaa yo nyasha dzake dzinokudzwa dzaakatiitira eciseenzesa Mwana wake anodiwa.
7 Nge ndaa yake takaponeswa nge rusudzunuro nge ndaa yo ngazi yake, honde, kurekererhwa ke zvishaishi zvedu, maererano no kukura ke nyasha dzake.
8 Iyena akatipangidzira nyasha idzi dzikuru nge kutipasa ungwaru wese no kuzwisisa,
9 nge kutiziisa zvakaigika zva Mwari zve kuda kake. Maererano no zvaimupfadza iyena pacake kuti agare no cinangwa
10 ce kuonerera zviro kuti kana nguwa yakasanangurhwa ikakwana, aunganidze zviro zvese muna Kristu, zviro zviri kudenga no zviro zviri panyika. Honde, aunganidze maari
11 uya watabatana naye no kugadzwa nhaka pamwepo na isusu, tosanangurhwa maererano no cido ca uya anoita zviro zvese no kuda kake,
12 kuti iyena asimbwe no kukudzwa nge pamusoro pedu zvecioneka kuti tisu takatanga kugara no kariro muna Kristu.
13 Asi imwimwi makagarawo no kariro maari mumasure mekuzwa masoko e cokwadi, masoko akanaka nge pamusoro pe ruponeso renyu. Mumasure me kutenda kenyu, Mwari akamukandai cipangidzo* eciseenzesa Djesu no mwiya mucena,
14 ico cigondeso ce nhaka yedu, kuti anhu a Mwari asudzunurhwe peciseenzeswa rusudzunuro, kuti asimbwe zvinoshamisa.
15 Ndiyo ndaa, kubvira pandakazwa ngezve kutenda kamunako muna Tenzi Djesu uye ngezve rudo ramunopangidza ku acena ese,
16 ndinorumbwa ndecitenda Mwari nge ndaa yenyu. Ndinoreketa nge zvenyu mu minamato yangu nguwa dzese,
17 kuti Mwari wa Tenzi wedu Djesu Kristu, Baba e rukudzo, amupasei mwiya we ungwaru uye amupangidzei ruziyo rake re zvirokwazvo.
18 Mwari akavhenekera mwoyo yenyu, kuti muziye kariro yaakamupasai, no zviro zvakanakisisa zvaakagadzirira hinga nhaka ku acena,
19 uye kukura kakaita ukuru we simba rake katiri isusu atendi. Kukura uku kunooneka pakuseenzesa kaanoita simba rake guru,
20 raakaseenzesa pana Kristu ecimumutsa ku akafa uye akamugarisa ku moko wake kwawo kumatenga,
21 pamusoro-soro pe utongi wese, umambo, masimba, atongi no mazina ese angadudzwa, haiwa basi pa mugariro uno we zviro, asiwo pa mugariro we zviro unozouya.
22 Iyena akakandawo zviro zvese pasi pe tsoka dzake uye akamuita kuti agare musoro we zviro zvese mu ungano,
23 ungano ii ndiyona mwiri wake, iyona yakadzara no zviro zvese ngo pamusoro pake, iyena anodzadzisa zviro zvese.
Masoko ari pasi
^ Kana kuti: “cidhindo.”
