Tsamba ku Aefeso 2:1-22
2 Uyezve, Mwari akamupasai upenyu, kunyazi mainga makafa nge ndaa ye zvishaishi no zvitema zvenyu,
2 hinga zvamaiita maererano no mugariro* we nyika ino, mecitungamirirhwa no mutongi uno simba pa mhepo, mhepo ii mwiya uri kuseenza mu ana asikazwiri.
3 Isusu tainga tino maitiro akaezana no awo, maererano no zvido zve nyama yedu, teciita kuda ke mwiri no ndangariro dzedu, tainga takasisira shungu dza Mwari kuitawo hinga amweni.
4 Asi Mwari ano usisi wakakura uye nge ndaa ye rudo rake rikuru raakatipangidzira,
5 akatipasa upenyu pamwepo na Kristu, kunyazi patainga takafa nge ndaa ye zvishaishi zvedu, asi imwimwi makaponeswa ngo nyasha.
6 Uyezve, Mwari akatimutsa pamwepo naye uye akaita kuti tigare pamwepo naye kumatenga, mu rubatano na Kristu Djesu,
7 kuitira kuti mu mugariro we zviro ucauya iyena apangidze upfumi we nyasha dzake dzakakura eciseenzesa usisi wake katiri mu rubatano na Kristu Djesu.
8 Nge ndaa ye nyasha idzi, imwimwi makaponeswa ngo kutenda uye izvi azvizi kuitika ngo kuda kenyu; asi zvezvirokwazvo i cipo ca Mwari.
9 Haiwa, amugumisiropi we zviito zvenyu, kuti pasaoneke munhu angagara no zvikonzero zve kudzikudza.
10 Isusu tiri mabasa e nyara dza Mwari, takasikwa mu rubatano na Kristu Djesu kuti tiite mabasa akanaka, ainga akasanangurhwa na Mwari kuti tiaite.
11 Ngokudaro, edzurirai kuti imwimwi makabarhwa muri anhu e madzinza amweni, mecidainzwa kuti muri “anhu asikazi kuizwa ucekeri” nge aya “akaizwa ucekeri,” ucekeri uu unoizwa pa nyama ngo nyara dzo anhu.
12 Pa nguwa iyona imwimwi mainga musina Kristu, mainga makaparadzana no umambo we Israeri, musikaziikanwi pa zvitenderano zve zvipikirhwa, musina kariro uye mainga musina Mwari mu nyika.
13 Asi zvino mu rubatano na Kristu Djesu, imwimwi maapadhuze nge ndaa yo ngazi ya Kristu kunyazi mainga muri kure.
14 Ngokuti iyena ndiye runyararo redu, uye akaita kuti zvikwata zviiri zvigare cikwata cimwe basi uye akatsakatisa muru wainga uri pakati waiyaparadzanisa.
15 Ngo mwiri wake, iyena akabvisa mutemo no mipango ye Mutemo wa Mozesi, yaibara kuzondana pakati pe zvikwata zviiri, pedzepo akabatanidza zvikwata zviiri kuti cigare cikwata cimwe cipsva, zvezvirokwazvo zvikwata zvese zviiri izvi zvinodainzwa afundi ake, ngokudaro iyena akaita kuti pakati pawo paoneke runyararo,
16 kuti anyase kubetsera zvikwata zviiri izvi hinga cikwata cimwe pakuita runyararo na Mwari peciseenzeswa mutanda we kutambudzikira,* ngokuti iyena ainga abvisa kuzondana eciseenzesa mwiri wake wene.
17 Uye iyena akauya oziisa masoko akanaka e runyararo kamuri imwimwi mainga muri kure, uye runyararo ku aya ainga ari padhuze,
18 ngokuti nge ndaa yake, isusu zvikwata zviiri, takasununguka kukhwedera kuna Baba no mwiya umwe basi.
19 Ngokudaro, imwimwi amuciripi anhu asikaziikanwi uye e nyika dzimweni, asi muri e nyika imweyo no acena uye nhengo dze mhuri ya Mwari,
20 makawakwa pamusoro pe fundasau yo aphostori no aphorofita, yekuti Kristu Djesu ndiye kamare buwe re pakhona re fundasauyo.
21 Mu rubatano na iyena nyumba yese no matii ayo ese akabatana, iri kukura kuti igare tempro yakacena ya Djehovha.
22 Mu rubatano na iyena imwimwi muri kuwakwawo pamwepo kuti mugare nyumba inogarhwa na Mwari ngo gwanza re kumwiya.
