Tsamba ku Aefeso 3:1-21
3 Nge ndaa yazvo, inini Pauro, musungwa nge ndaa ya Kristu Djesu ngo kuda kumubetserai imwimwi, anhu e madzinza amweni—
2 ndinoona kuti makazwa kuti ndakapaswa ubaba we kumubetserai ngo nyasha dza Mwari,
3 uye kuti ndakaziiswa ngo cioneso zvakaigika zva Mwari, hinga zvandakamutarirai mu cigwagwa.
4 Hino pamucaerenga izvi, imwimwi mungakwanisa kuona mushobo wandinozwisisa zvakaigika zva Mwari pamusoro pa Kristu.
5 Mu mibarirhwana imweni, zvakaigika izvi azvizi kuziiswa ku ana e anhu hinga kuziiswa kazvaizwa zvino no mwiya ku aphostori acena no aphorofita ake,
6 kuti mu rubatano na Kristu Djesu, uye maererano no masoko akanaka, anhu e madzinza amweni aizogarawo nhaka uye nhengo dze mwiri umwewo, tecietsera zvipikirhwa zvimwezvo.
7 Inini ndakagara museenzi wazvo maererano no cipo ce nyasha dza Mwari candakapaswa ngo kuseenza ke simba rake.
8 Inini, mudoko-doko kuezanisa no mudoko we acena ese, ndakapaswa nyasha idzi, kuti ndiziise ku madzinza amweni masoko akanaka anocokuita no upfumi usikazwisisiki wa Kristu
9 uye ndoita kuti anhu ese aone maseenzere e zvakaigika zva Mwari zvekuti ke nguwa yakareba, zvainga zvakaigika muna Mwari, musiki we zviro zvese.
10 Cinangwa cainga cekuti, atongi no ano masimba anogara kumatenga aziiswe uzii wakakura wa Mwari unopangidzwa ngo makwanza akasiyana-siyana peciseenzeswa ungano.
11 Izvi zvinoenderana no cinangwa cake cisina mugumo caakaumba maererano na Kristu Djesu, Tenzi wedu,
12 uya anoita kuti tirekete takasununguka hinga zvatiri kuita uye anoita kuti tisununguke kureketa na Mwari no rugondo teciseenzesa kutenda muna Kristu.
13 Ngokudaro, ndinomukumbirai kuti musarembe nge ndaa ye matambudziko andiri kushingirira ngo pamusoro penyu, ngokuti awona anoreya rukudzo kamuri.
14 Nge ndaa yazvo ndinogodama pamberi pa Baba,
15 ekuti mhuri yese ye kudenga no yo panyika pano iripo nge ndaa yawo.
16 Ndinonamata kuti awona maererano no rukudzo rawo rikuru abambise unhu wamuri nge cemukati, ecizviita no simba eciseenzesa mwiya wawo,
17 uye nge ndaa ye kutenda kenyu, Kristu ngaagare mu mwoyo menyu nge rudo. Kuti mugare makaima hinga muti mukuru uno midzi dzakabamba,
18 kuitira kuti imwimwi pamwepo no acena ese munyase kukwanisa kuzwisisa zvinozwi kupamhama, kureba, kukura no kudzika,
19 uye kuti muziye rudo rina Kristu, rakakura kupinda ruziyo rese, kuti mutambire mawara ese anobva kuna Mwari.
20 Uya anokwanisa kuita zvinodarika zviro zvese zvatinokumbira kana zvatingarangarira, maererano no simba rake riri kuseenza matiri,
21 ngaakudzwe peciseenzeswa ungano uye Kristu Djesu dakara ku mibarirhwana yese nokusikaperi. Ameni.
