Tsamba ku Aefeso 4:1-32
4 Ngokudaro, inini musungwa muna Tenzi, ndinomudeketererai kuti muhambe zvinoenderana no kudainzwa kamakaizwa,
2 no kudzidodosa kese,* no upfawi, no mwoyo unononoka kutsamwa, mecishingirira umwe na umwe wenyu mu rudo,
3 meciedza no pamunokwanisa napo kucengeta kubatana ke mwiya mu cisungo ce runyararo.
4 Kuno mwiri umwe basi, uye mwiya umwe basi, hinga kudainzwa kamakaizwa ku kariro imwe basi;
5 kuno Tenzi umwe basi, kutenda kumwe basi, rubhabhatidzo rimwe basi;
6 Mwari umwe basi na Baba e anhu ese, ari pamusoro pe ese, ngo pamusoro pe ese uye mu ese.
7 Umwe na umwe wedu wakatambira nyasha dza Mwari maererano no cipo caakapimirhwa na Kristu.
8 Ngokuti Matarhwa anoti: “Paakakwira kudenga, akatora aranda; opasa ungano anarume hinga zvipo.”
9 Soko rekuti “akakwira” rinoreyei? Rinoreya kuti akacitawo pasi, kureya panyika.
10 Umwewo akacita, ndiye umwewo akakwira kumusoro-soro kumusoro kematenga, kuti aite kuti zviro zvese zvigare zvakadzara.
11 Iyena akaapasa ku ungano kuti amweni aseenze hinga aphostori, amweni hinga aphorofita, amweni hinga avhangeri,* amweni hinga aushi uye afundisi,
12 kuti acena anatsiriswe,* kuti aite basa rekuseenzera, kuitira kuti mwiri wa Kristu uwakwe,
13 dakara tese taguma pakubatana mu kutenda uye mu ruziyo re zvirokwazvo pamusoro pe Mwana wa Mwari, kuti tigare no mugariro wakakwana we munhu wakura,* hinga zvaari Kristu.
14 Hino, atidikani kuita hinga ticiri ana adoko, teciendeswa kuno no uko no mafungu uye tecipeperuswa no mikhaindi yese ye mhepo ye fundiso dze manyepo ngo mazano akashata e anhu, kuti atipause ngo kuticengedzera.
15 Asi isusu tinodikana kureketa zvirokwazvo, tecikura mu zviro zvese mu rudo maererano na Kristu, musoro we mwiri.
16 Nge ndaa yake, mwiri wese unonyasa kubatanidzwa pamwepo uye unoita kuti unyase kuseenza pamwepo wakanyasa kubatana pese pazvinodikanwa. Kana nhengo imwe na imwe yeciseenza zvakanaka, zvinobetsera kuti mwiri ukure paunonga wecidziwaka mu rudo.
17 Hino ndinomubvunzai uye ndinomukohomedzesai muna Tenzi, kuti musahambezve hinga zvinosooizwa no anhu e madzinza amweni, maererano no marangariro awo asikabetseri.
18 Marangariro awo ari mucidima uye akaparadzaniswa no upenyu unopaswa na Mwari, nge ndaa ye kusaziya kawo uye kuoma ke mwoyo yawo.
19 Ecisiya maitiro akanaka, ecidzinyika mu mahambiro anopsverudza kuti aite no makaro mushobo wese we zviro zvisikazi kucena.
20 Asi imwimwi amuzi kufundira kuti Kristu akadaro,
21 kana zvezvirokwazvo imwimwi makamuzwa uye makafundiswa naye, maererano no cokwadi ciri muna Djesu.
22 Makafundiswa kusiya unhu wekare unoenderana no maitiro amaimboita uye uri kuodzwa maererano no zvido zvawo zvinocengedza.
23 Uye rumbwai meciita kuti marangariro enyu agare apsva,
24 uye munodikana kupfeka unhu upsva wakasikwa maererano no kuda ka Mwari mu unatsi* we zvirokwazvo no kugondeka.
25 Hino, ngokuti makasiya kunyepa, umwe na umwe wenyu ngaarekete zvirokwazvo ku mudoni wake, ngokuti tiri nhengo dze mwiri umwe basi.
26 Kana mukanyangadzwa, musashaishe; musasiye kuti zuwa ridoke mucakanyangadzwa;
27 musapase mukana* Dhiyabhurosi.
28 Uya anoba ngaasabezve, asi ngaaseenze no simba eciita basa rakanaka no nyara dzake, kuti agarewo no cokupasa aya asina.
29 Soko rakaora ngarisabude mu muromo menyu, asi soko rakanaka rinobambisa maererano no zvinodiwa, kuti anorizwa abetsereke.
30 Uye, musatsamwise mwiya mucena wa Mwari, wamakakandwa nawo cigondeso mecietsera zuwa ramucapukunyuswa no rusudzunuro.
31 Siyai mushobo wese we bundu, kunyangadzwa, shungu, kureketedzana, uye masoko okutuka, pamwepo no mushobo wese we zvakashata.
32 Asi batanai zvakanaka, mecizwirana usisi mecirekererana no mwoyo wese hinga zvakaizwa na Mwari paakamurekererai no mwoyo wese eciseenzesa Kristu.
Masoko ari pasi
^ Kana kuti: “kudzidodosa mundangariro.”
^ Kana kuti: “aziisi e masoko akanaka.”
^ Kana kuti: “afundiswe.”
^ Kana kuti: “munhu wakura pakunamata.”
^ Onai pakazwi Kupanganidzwa ke Masoko.
^ Kana kuti: “mbuto.”
