Tsamba ku Aefeso 5:1-33
5 Hino, garai ateedzeri a Mwari, hinga ana anodiwa,
2 uye rumbwai mecihamba mu rudo, hinga kudiwa katakaizwa* na Kristu akadzipira kuti atifire* hinga mupiro uye hinga cibairo cinonuhwirira kuna Mwari.
3 Uhure,* mushobo wese we zviro zvisikazi kucena pamwepo no makaro, azvidikani kubhuiwa pakati penyu, ngokuti zviro izvi azvisisiri pakati pe anhu a Mwari;
4 kana maitiro anopsverudza, kureketa zve upenzi kunyazi kureketa zvinopsverudza. Ngokuti zviro izvi azvizi kusisira, pane kudaro tendai Mwari.
5 Ngokuti imwimwi munoziya, uye munonyasa kuzwisisa kuti mu Umambo wa Kristu no wa Mwari, amuzopindi munhu wese anoita uhure,* anoita zvisikazi kucena, ano makaro, ngokuti kugara no makaro kakatodzana no kunamata zvidhori.
6 Apana anodikana kumucengedzai ngo masoko asikabetseri, ngokuti pamusoro pe zviro izvi shungu dza Mwari dzinouya pamusoro pe ana asikazwiri.
7 Hino, musaitewo zvaanoita;
8 ngokuti mainga muri cidima, asi zvino maaruvheneko mu rubatano na Tenzi. Rumbwai mecihamba hinga ana e ruvheneko,
9 ngokuti mucero we ruvheneko unooneka ngo mushobo wese we zviro zvakanaka zve unatsi uye zvirokwazvo.
10 Rumbwai mecinyasa kuziya zvinopfadza Tenzi;
11 uye musabatane nawo pa mabasa awo asikabetseri e cidima; pane kudaro, aziisei pamhene kuti akashata.
12 Ngokuti zvaanoita mucifise-fise zvinopsverudza zvekuti azvitoiti kuzvireketa.
13 Asi zviro zvese zvinobudiswa pamhene zvinopangidzwa ngo ruvheneko, ngokuti zviro zvese zvinopangidzwa pamhene i ruvheneko.
14 Ndiyo ndaa zvecizwi: “Muka, iwewe wakawata, muka ku akafa, uye Kristu acakuvhenekera.”
15 Ngokudaro, ngwarirai kuti musahambe hinga anhu asina ungwaru, asi hinga anhu ane ungwaru,
16 mecinyasa kuseenzesa zvakanaka nguwa yenyu,* ngokuti mazuwa ano ashata.
17 Hino musaite hinga anhu akapusa, asi rumbwai mecizwisisa zvinoda Djehovha.
18 Cimwenizve, musararadze ngo vhinyu, ngokuti kuraradza kunoita kuti munhu aite zvakashata, asi dzadzwai no mwiya.
19 Bambisanai ngo kuemba mapisarema, mecikudza Mwari ngo kuemba ngoma dze kunamata, meciemba uye meciridzira Djehovha ngoma mu mwoyo menyu,
20 mecitenda Mwari wedu uye Baba edu no zviro zvese zvaanotiitira mu zina ra Tenzi wedu Djesu Kristu.
21 Dzikandei pasi pe umwe na umwe wenyu mecithya Kristu.
22 Akadzi ngaadzikande pasi pe amuna awo hinga zvaanoitira Tenzi,
23 ngokuti mwamuna ndiye musoro we mukadzi wake hinga Kristu ari iyena musoro we ungano, uye muponesi we mwiri uu.
24 Zvezvirokwazvo, kuita hinga ungano inodzikanda pasi pa Kristu, akadzi anodikanawo kudzikanda pasi pe amuna awo pa zvese.
25 Amuna, rumbwai mecida akadzi enyu, hinga kuda kakaita Kristu ungano, akadzipira kuifira,
26 kuti aicenese, eciisuka no kuisambidza no mvura eciseenzesa soko,
27 kuitira kuti ungano irungame pa madziso ake, isina kana pakakhatika kana pakafunyana kana zviro zvimweni zvakaita hingana izvi, asi kuti igare yakacena isina payakashatiswa.
28 Amuna anodikanawo kuita zvimwezvo ecida akadzi awo hinga mwiri yawo. Mwamuna anoda mukadzi wake anodzida,
29 ngokuti apana mwanarume akambozonda mwiri wake,* asi anoupasa zvekurhya uye anoucengeta, hinga zvinoita Kristu ku ungano,
30 ngokuti tiri nhengo dze mwiri wake.
31 “Ndiyo ndaa mwanarume acasiya baba ake na mai ake uye acabatana* no mukadzi wake uye ari airi acagara nyama imwe basi.”
32 Zvakaigika zva Mwari izvi zvakakura. Apa ndiri kureketa ngezva Kristu no ungano.
33 Ngokudaro, umwe na umwe wenyu anodikana kuda mukadzi wake hinga mushobo waanodzida, mukadzi anodikanawo kureremedza maningi mwamuna wake.
Masoko ari pasi
^ Mabhaibheri amweni anoti: “kudiwa kamakaizwa.”
^ Mabhaibheri amweni anoti: “amufirei.”
^ Cigrego: “porneía.” Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Cigrego: “mecitenga zvakanaka nguwa yenyu.”
^ Cigrego: “nyama yake.”
^ Kana kuti: “acarumbwa ano mukadzi wake.”
