Tsamba ku Aefeso 6:1-24
6 Ana, zwirai abereki enyu muna Tenzi, ngokuti izvi zvakanaka.
2 “Kudza baba na mai ako,” uu ndiwo mutemo wokutanga uno cigondeso cekuti:
3 “Kuti zvese zvikuhambire* zvakanaka uye kuti urarame ke nguwa yakareba panyika.”
4 Uye abereki, musatsamwise ana enyu, asi arerei meciapangira uye meciafundisa maererano no zvinodiwa na Djehovha.
5 Aranda, purutanai madzitenzi enyu e panyika pano,* mecithya no kutetemera, meciita zviro zvese no mwoyo wese, hinga zvamunoitira Kristu,
6 haiwa basi pamunonga mecionekwa kuti mupfadze anhu, asi hinga aranda a Kristu meciita kuda ka Mwari no simba rese.
7 Garai aranda ano maitiro akanaka, hinga muri kuseenzera Djehovha, haiwa anhu,
8 ngokuti munozviziya kuti Djehovha acapasa umwe na umwe maererano no zvakanaka zvaanoita, pasinei kuti muranda kana kuti haiwa.
9 Imwimwiwo madzitenzi e aranda, rumbwai meciabata zvakanaka, musikaathyisidziri, ngokuti munozviziya kuti Tenzi wawo uye Tenzi wenyu ari kudenga uye iyena aasananguri.
10 Pakupedzesera, rumbwai mecibambiswa muna Tenzi uye no simba rake guru.
11 Pfekai zvipfeko zvakakwana zve murhwi we hondo zvinobva kuna Mwari, kuti mukwanise kuima makabamba pakurhwisana no mirau* ya Dhiyabhurosi;
12 ngokuti atiripi kurhwisana no anhu ano ngazi no nyama, asi tiri kurhwisana no utongi, no aya ano masimba, no atongi e nyika ino ye cidima, no masimba e mwiya yakashata iri kudenga.
13 Nge ndaa yazvo, pfekai zvipfeko zvakakwana zve murhwi we hondo zvinobva kuna Mwari, kuti mukwanise kudzidziirira pa zuwa rakashata uye mumasure mekupedza zvese, murumbwe makabamba.
14 Ngokudaro, rumbwai makabamba, mecisunga bhande re cokwadi, mecipfeka cidziiriro ce paditi ce unatsi,
15 uye makapfeka masandarya kuti mugare makagadzirira kuparidzira masoko akanaka e runyararo.
16 Uyezve, seenzesai civhikhiro cikuru ce kutenda, kuti mukwanise kudzimisa mipasha dzese dzinobaka dza Sathani.*
17 Uyezve, pfekai kapaseti ye ruponeso, uye seenzesai supada ye kumwiya, kureya kuti soko ra Mwari,
18 mecirumbwa meciita mishobo yese ye minamato no kudeketera nguwa dzese mu mwiya. Nge ndaa yazvo, rumbwai makamuka, meciita minamato ye kudeketera pamusoro pe acena ese.
19 Ndiitireiwo munamato, kuti ndipaswe masoko e kureketa pandinofungura muromo, kuti ndikwanise kureketa no ushingi pakuziisa zvakaigika zva Mwari zve masoko akanaka,
20 masoko aya ndiwona andiri kuseenzera hinga muimiriri wakasungwa no makorenti, kuti ndirekete no ushingi, ngo pamusoro pawo, hinga mushobo wandinodikana kuzviita.
21 Uye kuti muziye ngezve mugariro wandiri kubatana nawo, Tikiko, hama inodiwa uye museenzi wakagondeka muna Tenzi, ucamuziisai zvese.
22 Ndiyo ndaa ndiri kumutumira kamuri, kuti muziye kuti takadini uye kuti anyaradze mwoyo yenyu.
23 Hama ngadzigare no runyararo no rudo no kutenda zvinobva kuna Mwari Baba na Tenzi Djesu Kristu.
24 Nyasha dza Mwari ngadzigare na ese aya anoda Tenzi wedu Djesu Kristu no rudo risikaperi.
Masoko ari pasi
^ Kana kuti: “zvikubudirire.”
^ Cigrego: “e anhu.” Kana kuti: “e kunyama.”
^ Kana kuti: “mazano a.”
^ Cigrego: “dze Wakashata.”
