Tsamba ku Afiripi 1:1-30
1 Inini Pauro na Timoti, aranda a Kristu Djesu, ku acena ese ari mu rubatano na Kristu Djesu ari ku Firipi, pamwepo no aonereri uye no abati anoseenzera:
2 Nyasha no runyararo zvinobva kuna Mwari Baba edu na Tenzi wedu Djesu Kristu ngazvigare na imwimwi.
3 Nguwa dzese ndinogara ndecitenda Mwari wangu pandinorangarira nge zvenyu
4 mu minamato yangu yese ye kudeketera yandinomuitirai. Inini ndinoita munamato umwe na umwe ndakapfara,
5 ngokubetsera kamunoita pa kuparidzira masoko akanaka kubvira pa zuwa rokutanga dakara zvino.
6 Ngokuti ndino rugondo rekuti, uya akatanga basa rakanaka pakati penyu acaripedzesa dakara pa zuwa ra Kristu Djesu.
7 Kandiri zvakanaka kurangarira kudaro nge zvenyu, ngokuti muri mu mwoyo mangu, mwese imwimwi muno nyasha dza Mwari pamwepo na inini, mukusungwa kangu no kutsigira masoko akanaka, kuitira kuti atenderhwe kuparidzirhwa zviri pa mutemo.
8 Ngokuti Mwari anozviziya kuti inini ndiri kumusuwai* maningi no rudo rikuru hinga ra Kristu Djesu.
9 Izvi ndizvo zvandinorumbwa ndecikumbira mu minamato, kuti rudo renyu rirumbwe recitunhudzirika no ruziyo re zvirokwazvo no kunyasa kuzwisisa;
10 kuti mugare no zvirokwazvo kuti ngazvipi zviro zvinonyanya kukosha kupinda zvimweni, musina camunopumhwa uye musikakuhunyisi amweni dakara pa zuwa ra Kristu;
11 uye kuti mugare makadzara no zvibereko zve unatsi, zvinooneka nge ndaa ya Djesu Kristu, kuti Mwari akudzwe uye asimbwe.
12 Hama dzangu, ndinoda kuti muziye kuti zviri kuitika kandiri, zviri kuita kuti masoko akanaka aenderere mberi,
13 ngokuti kusungwa kangu nge ndaa ya Kristu, kaakutoziikanwa no Arindiri ese e Nyumba ya Mambo no anhu amweni ese.
14 Zvino hama dzakawanda muna Tenzi dzaane rugondo nge ndaa ye kusungwa kangu, uye dziri kutunhudzira kupangidza ushingi kuti dzinyase kureketa ngezve masoko a Mwari dzisikathyi.
15 I zvirokwazvo kuti, amweni ari kuparidza ngezva Kristu no bibvu uye no makwikwi, asi amweni ari kuparidza no cinangwa cakanaka.
16 Aya ari kuparidza no cinangwa cakanaka ari kuziisa Kristu zvecibva pa rudo, ngokuti anoziya kuti ndakagadzwa kuti nditsigire masoko akanaka;
17 asi aya anozviita no bibvu uye no makwikwi aana cinangwa cakanaka, ngokuti anoda kundibarira matambudziko pandinonga ndakasungwa.
18 Izvi zvinounza mugumisiro upi? Pasinei nokuti pari kuparidzirhwa no cinangwa cakanaka kana kuti haiwa, Kristu ari kuziiswa, uye inini ndiri kupfara nazvo, ndingatoti ndicarumbwa ndecipfara,
19 ngokuti ndinoziya kuti izvi zvicaita kuti ndiponeswe peciseenzeswa minamato yenyu ye kudeketera, pamwepo no mwiya wakatumwa na Mwari, uya waiseenza pana Djesu Kristu.
20 Izvi zvinoenderana no cido cakabamba candinaco uye kariro yekuti apana candicapsveruka naco, asi nge kureketa kangu no ushingi, Kristu acakudzwa zvino hinga zvaanosoizwa, peciseenzeswa mwiri wangu kunyazi kana ndikarumbwa ndecirarama kunyazi kana ndikafa.
21 Ngokuti kandiri, kurarama ndinoraramira Kristu, asi kana ndikafa ndawina.
22 Kana kuri kurumbwa ndecirarama pa nyama, ndinozokwanisa kuitira Kristu zvakawanda; asi andibhui kuti ndicasanangura cipi.
23 Ndiri pakati no pakati pa zviro zviiri izvi, ngokuti ndinoda kusudzunurhwa kuti ndigare na Kristu, izvi zviri nani kandiri.
24 Asi, zvinokosha kuti ndirumbwe ndecirarama pa nyama kuti ndimubetserei.
25 Hino, ngokuti ndino rugondo iri, ndinoziya kuti ndicarumbwa ndiripo uye ndinemwi mwese kuti muhambire mberi uye mugare no mupfaro pa kutenda kenyu,
26 ngokudaro mupfaro wenyu ucadzara woita zvekupsvetekera muna Kristu Djesu nge ndaa yangu pandicagarazve na imwimwi pakati penyu.
27 Camunodikana kuita nge ce kurarama maererano no masoko akanaka pamusoro pa Kristu, kuti kunyazi ndikauya koomuonai kana ndikasama kuuya, ndizwe nge zvenyu, uye ndiziye kuti makaima makabamba mu mwiya umwe basi,* no marangariro amwewo uye meciseenza no simba pamwepo no kuda ke kutenda mu masoko akanaka,
28 musikatothyi azondi enyu. Ngokuti ici cipangidzo cekuti awona kutsakatiswa, asi kamuri ce ruponeso; uye izvi zvinobva kuna Mwari.
29 Ngokuti makatambira makomborero nge ndaa ya Kristu, kuti musandotende basi maari asi kuti mumutambudzikirewo.
30 Ngokuti imwimwi muri kurhwa hondo imweyo yamakandiona ndecirhwa uye yamuri kuzwa kuti ndiciri kuirhwa dakara zvino.
