Ku Afiripi 2:1-30
2 Kana pane kubambisana muna Kristu, kana pane kunyaradzana mu rudo, kana pane kushamwaridzana pa kunamata, kana pane rudo no mazwire e usisi,
2 tunhudzirai mupfaro wangu ngokugara no mushobo umwewo we kurangarira, no rudo rimwero, monyasa kubatana* muno marangariro amwewo.
3 Musaite zviro meciphikisana kana kudzikudza, asi dzidodosei meciona amweni hinga akuru kamuri,
4 musikapsvaki zvakamunakirai basi, asi zvakanakirawo amweni.
5 Garai no marangariro amwewo no ainga ana Kristu Djesu,
6 kunyazi hazvo, ainga ari hinga Mwari, aazi kurangarira kutora cigaro ca Mwari, kana kuda kuezana na Mwari.
7 Pane kudaro, iyena akasiya zvese zvaainga anazvo, oita hinga muranda uye akagara munhu.*
8 Kupinda izvi, paakauya hinga munhu,* akadzidodosa uye akazwira dakara pa kufa, honde, kufa pa mutanda we kutambudzikira.*
9 Nge ndaa yazvo, Mwari akamukwidziridza pa mbuto ye pamusoro uye no unaki wake akamupasa zina rinodarika mazina amweni ese,
10 kuti ese agodame mu zina ra Djesu; ese ari kudenga, ari pa nyika no ari pasi pe mavhu
11 uye rurumi rese ritende pamhene kuti Djesu Kristu ndi Tenzi, kuti Mwari Baba akudzwe.
12 Hino adiwa angu, hinga kuzwira kamagara meciita, haiwa pandinonga ndiripo basi asi maka-maka zvino pandinonga ndisiripopi, rumbwai meciseenzera kuponeswa kenyu no kuthya uye kutetemera.*
13 Ngokuti Mwari maererano no zvinomupfadza ndiye ari kumubambisai, ecimupasai cido ce kuita zviro no simba re kuzviita.
14 Rumbwai meciita zviro zvese musikagurunguti uye musikareketedzani,
15 kuti mugare musina camunopumhwa uye musina ndaa, ana a Mwari asina ndaa pakati pe mubarirhwana wakashata no wakaora, imwimwi muri kudjeka pakati pawo hinga ruvheneko mu nyika,
16 mecirumbwa makabatisisa soko re upenyu. Ndinogara no cikonzero ce kupfara pa zuwa ra Kristu, ndeciziya kuti andizi kugogoma kana kupeta masimba nyore.
17 Asi, kunyazi inini ndiri kudururhwa hingana mupiro we zvinomwiwa pa cibairo uye pa basa cena rinobva pa kutenda kenyu, ndinopfara uye ndinonyasa kupfarisisa na imwimwi mwese.
18 Ngo mushobo umwewo, munodikanawo kupfara no kupfarisisa pamwepo na inini.
19 Ndiri kuetsera kuti kana Tenzi Djesu akada ndicamutumirai Timoti mbai-mbai pano, kuti inini ndibambiswe pandicatambira masoko nge zvenyu.
20 Ngokuti andina umwenizve uno mwoyo wakaita hinga wake, wekuti ucanyasa kumubetserai.
21 Ngokuti amweni ese ari kupsvaka zvaanoda, haiwa zvinoda Djesu Kristu.
22 Asi imwimwi munozviziya kuti iyena aapsvaki zvaanoda basi, ngokuti wakaseenza na inini hinga baba no mwana pakuita kuti masoko akanaka aenderere mberi.
23 Hino, ndiye wandiri kurangarira kutuma mumasure me kuziya zvicaitika na inini.
24 Inini ndino rugondo rekuti kana Tenzi ecida, ndicauyawo ikona nokukasika.
25 Asi zvino ndinoona kuti zvakanaka kuti ndimutumirei Epafrodhito, hama yangu, museenzidoni uye mudoni wangu pa kurhwa ke Cikristu, wamakanditumira kuti andibetsere pa zviya zvandinoda,
26 sezvo uri kudisisa kumuonai mwese, iyena wakatsukwara ngokuti imwimwi makazwa kuti iyena wairhwara.
27 Wakarhwara, zvekutoda kufa; asi Mwari akamuzwira usisi, haiwa iyena basi asi ininiwo, kuti ndisatunhudzire kurhwadziwa, sezvo inini ndinogara ndecirhwadziwa.
28 Ndiyo ndaa, ndiri kumutuma nokukasika, kuitira kuti pamunomuona mupfarezve uye kuti inini ndisanyanye kudzirhya mwoyo.
29 Hino mutambirei no mupfaro wese hinga zvinoizwa muna Tenzi, uye rumbwai mecikoshesa anhu akaita hinga iyena,
30 ngokuti wainga asara padoko kuti afe nge ndaa yo basa ra Kristu,* ecikanda upenyu wake* pa ngozi kuti andiitire basa renyu re kundibetsera pamainga musiripi pano.
Masoko ari pasi
^ Kana kuti: “makabatana mu mwiya.”
^ Cigrego: “akagara no mwiri wakaita hinga we munhu.”
^ Cigrego: “paakaoneka no mwiri wakaita hinga we munhu.”
^ Onai pakazwi Kupanganidzwa ke Masoko.
^ Kana kuti: “kuhuta.”
^ Mabhaibheri amweni anoti: “basa ra Tenzi.”
^ Kana kuti: “mwiya wake.”
