Tsamba ku Afiripi 4:1-23
4 Hino hama dzangu dzinodiwa uye dzandinosuwa,* mupfaro wangu no korowa yangu, rumbwai makabamba muna Tenzi, adiwa angu.
2 Ndinokohomedzesa Evhodhiya na Sintiki kuti agare no marangariro amwewo muna Tenzi.
3 Ndinokukumbirawo iwewe mudoni wangu we basa wakagondeka wandinoseenza naye, kuti urumbwe wecibetsera anakadzi aya akaseenza no simba pamwepo na inini nge ndaa ye masoko akanaka, pamwepo na Krementi no amweni ese andinoseenza nawo, ano mazina awo akatarhwa mu bhuku re upenyu.
4 Pfarai nguwa dzese muna Tenzi. Ndinobhuyazve kuti, pfarai!
5 Kuzwisisa kenyu ngakuziikanwe no anhu ese. Tenzi ari padhuze.
6 Musadzirhye mwoyo no ciro cipi haco, asi pa zviro zvese zvikumbiro zvenyu ngazviziiswe Mwari, mecinamata uye mecideketera pamwepo no kutenda;
7 uye runyararo ra Mwari rinodarika kuzwisisa kese ricacengeta mwoyo yenyu no ndangariro dzenyu peciseenzeswa Kristu Djesu.
8 Pakupedzesera hama, zviro zvese zvezvirokwazvo, zviro zvese zvinodikanwa, zviro zvese zve unatsi, zviro zvese zvakacena, zviro zvese zvinodiwa, zviro zvese zvinorekethwa zvakanaka, zviro zvese zvakanaka uye zviro zvese zvinosimbwa, rumbwai mecirangarira* zviro izvi.
9 Itai zvamakafundira, zvamakatambira uye zvamakazwa na inini no zviya zvamakandiona ndeciita, uye Mwari we runyararo acagara na imwimwi.
10 Ndinopfarisisa muna Tenzi ngokuti zvino mamutsidzirazve cido cenyu kandiri. Kunyazi hazvo mainetseka nge zvangu, mainga musina mukana we kuzvipangidza.
11 Andiripi kubhuya izvi ngokuti pano ciro candiri kukonerhwa, asi ndakafundira kupfara no zvandinazvo pa migariro ipi hayo.
12 Ndinokwanisa kurarama no zviro padoko uye no zviro zvakawanda. Mu zvese uye pa migariro yese ndakafundira zvandingaita pandinonga ndakaguta uye pandinonga ndino nzara, pandinonga ndino zvakawanda no pandinonga ndisina.
13 Ndino simba rokuita zviro zvese ngokuti pane anondipasa simba.
14 Kunyazi zvakadaro, imwimwi makaita zvakanaka ngo kundibetsera pa matambudziko angu.
15 Zvezvirokwazvo, imwimwi Afiripi, munozviziyawo kuti mumasure mekuzwa masoko akanaka pa rhwendo rokutanga pandakabva ku Masedhoniya, apana ungano kusiya yenyu yakabatana na inini pa nyaya ye kupasa no kutambira;
16 ngokuti pandainga ndiri ku Tesaronika, imwimwi makanditumira zviro zvandaida kuti mundibetsere, haiwa kamwe basi asi kairi.
17 Azvireyi kuti ndiri kupsvaka kutambira zvipo, asi ndinoda kuti muite zvakanaka kuti muone zvakawanda.
18 Asi ndino zvese zvandinoda uye zvakatowanda, zvese ndaanazvo ngokuti ndakatambira zvamakatumira na Epafrodhito, cibairo cinotenderhwa, cinomunuhwi wakanaka uye cinopfadza Mwari.
19 Mwari wangu acamupasai zvese zvamunoda maererano no upfumi we rukudzo rake eciseenzesa Kristu Djesu.
20 Mwari Baba edu ngaakudzwe nokusikaperi. Ameni.
21 Tambisai acena ese mu rubatano na Kristu Djesu. Hama dzandinadzo dziri kumutambisai.
22 Acena ese, maka-maka e kumba ka Sezari, ari kumutambisai.
23 Nyasha dza Tenzi Djesu Kristu ngadziseenze pa maitiro enyu.
