Ku Agaratiya 1:1-24
1 Inini Pauro, ndiri muphostori asikazi kubva ku anhu kana kugadzwa no munhu, asi ndakagadzwa na Djesu Kristu pamwepo na Mwari, Baba edu, akamumutsa kubva ku akafa,
2 no hama dzese dziri pamwepo na inini, tiri kumutarirai imwimwi, ungano dze ku Garatiya:
3 Nyasha no runyararo zvinobva kuna Mwari Baba edu na Tenzi wedu Djesu Kristu ngazvigare na imwimwi.
4 Iyena akadzipira kuti afire zvitema zvedu kuitira kuti atisudzunure mu nyika ino yakashata* maererano no cido ca Mwari, Baba edu,
5 iyena ngaapaswe rukudzo rese nokusikaperi. Ameni.
6 Ndiri kushamisika ngokuti imwimwi muri kusiya nokukasika Uya akamudainzai nge nyasha dza Kristu kuti muteere mushobo umweni we masoko akanaka.
7 Haiwa kuti kuno masoko amweni akanaka; asi kuno amweni ari kuedza kumukangaidzai uye ecida kucinja masoko akanaka ngezva Kristu.
8 Asi kunyazi isusu kana ngirozi inobva kudenga ikamuziisai masoko akanaka akasiyana no atakamuziisai yeciti ndiwona masoko akanaka, iyona ngaitukwe.
9 Hinga zvatabva kubhuya, ndinomubvunzaizve kuti: Kana pano munhu uri kumuziisai masoko akanaka akasiyana no amakatambira eciti ndiwona masoko akanaka, ngaatukwe.
10 Hino munorangarira kuti ndiri kuedza kupfadza anhu here kana kuti ndiri kuedza kupfadza Mwari? Kudai ndaiedza kupfadza anhu, ndainga ndisikadi kugara muranda wa Kristu.
11 Ndiyo ndaa hama, ndinoda kuti muziye kuti masoko akanaka andakamuziisai aazi kubva ku anhu;
12 ngokuti andizi kuapaswa no munhu, uye andizi kuita zvekuafundiswa, asi ndakaita zvekuapangidzwa na Djesu Kristu.
13 Zvezvirokwazvo, imwimwi makazwa ngezve maitiro angu e kare mu Cidjudha, ekuti inini ndaiteerera no hasha ungano ya Mwari no cinangwa cekuda kuitsakatisa;
14 uye inini ndainga ndecibudirira maningi mu Cidjudha kudarika akawanda e dzinza rangu ainga ano thunga rangu, ngokuti ndaiziikanwa nge ndaa ye kudisisa maningi tsika dzo abereki angu.
15 Asi Mwari, uya akaita kuti ndibarhwe uye akandidainza no nyasha dzake, akaona kuti zvakanaka
16 kupangidza Mwana wake eciseenzesa inini kuti ndiziise masoko akanaka nge zvake ku madzinza amweni, inini andizi kuenda nokukasika koobvunzisa munhu umweni* nge zvazvo;
17 anditoziwo kuenda ku Djerusarema koobvunzisa aya akanditangira kugara aphostori, asi ndakaenda ku Arabhiya, uye pedzepo ndohwirira ku Dhamasko.
18 Mumasure me makore matatu ndakaenda ku Djerusarema koovhakacira Kefasi,* uye ndakapedza mazuwa 15 ndinaye.
19 Asi apana kana muphostori umwe hake wandakaona, kunza ka Tiyago, munukuna wa Tenzi.
20 Panocokuita no zviro zvandiri kumutarirai, ndinomugondesai pamberi pa Mwari kuti andiripi kunyepa.
21 Mumasure mazvo, ndakaenda ku mutanha we Siriya no we Sirisiya.
22 Asi ndainga ndisati ndaakuziikanwa mu ungano dze ku Djudhiya dziri mu rubatano na Kristu.
23 Aindoita zve kuzwa basi kuti: “Mwanarume uya waimbotiteerera kareko, zvino waakuparidzira masoko akanaka e kutenda ekuti kareko waiatsakatisa.”
24 Hino awona akatanga kukudza Mwari nge ndaa yangu.
Masoko ari pasi
^ Kana kuti: “mugariro uno we zviro wakashata; nguwa yakashata.” Onai pakazwi Kupanganidzwa ke Masoko.
^ Cigrego: “nyama no ngazi.”
^ Unodainzwawo kuti Pedru.
