Ku Agaratiya 2:1-21
2 Mumasure me makore 14, ndakaendazve ku Djerusarema na Bharnabhee, pamwepo na Tito.
2 Ndakaendeyo ngokuti ndakapangidzwa kuti ndaidikana kuendeyo, uye ndakaabvunza masoko akanaka andiri kuparidza nge zvawo pakati pe anhu e madzinza amweni. Asi ndakazviita basi pamberi pe anarume anoreremedzwa maningi, kuti ndigare no cokwadi cokuti andizi kuseenzera nyore.
3 Asi kunyazi Tito wandainga ndinaye, aazi kubambidzirhwa kuizwa ucekeri, kunyazi hazvo wainga ari Mugrego.
4 Asi nyaya ii yakabuda nge ndaa yo hama dzakapinzwa mucinyararire mu ungano. Dzakapinda mucifise-fise kuti dziongorore rusudzunuko ratinaro tiri mu rubatano na Kristu Djesu, kuitira kuti dzinyase kutiita aranda;
5 atizi kana kumbotenda kudzikanda pasi pawo, kunyazi ke kanguwa kadoko,* kuitira kuti cokwadi ce masoko akanaka cirumbwe cinemwi.
6 Asi panocokuita no aya aidziita hinga anokosha maningi, andina basa nazvo, ngokuti Mwari aatongi munhu maererano no zvaanoona nge cekunza. Anhu awona aireremedzwewo maningi apana ciro cipsva caakandibvunza.
7 Pane kudaro, paakaona kuti inini ndainga ndapaswa basa re kuziisa masoko akanaka ku aya asikazi kuizwa ucekeri, kuitawo hinga Pedru wakapaswa basa re kuziisa masoko akanaka ku aya akaizwa ucekeri,
8 ngokuti uya akapasa Pedru simba rekuti agare muphostori ku aya akaizwa ucekeri, ndienawo akandipasa simba rekuti ndigare muphostori ku anhu e madzinza amweni,
9 uye paakaziya ngezve nyasha dzandakapangidzirhwa, Tiyago, Kefasi,* Juau, aya aizwi ndiwona mapirari, akabata nyara yangu pamwepo no ya Bharnabhee yo moko kwawo zvecipangidza kuti takabatana, kuitira kuti isusu tiende kuno anhu e madzinza amweni, asi awona ku aya akaizwa ucekeri.
10 Awona akatikumbira basi kuti tisakanganwewo arombo, uye izvona ndizvona zvandiri kuedza kuita no mwoyo wese.
11 Ngokudaro, Kefasi* paakaguma ku Antiyokiya, ndakamusumurura takaningisana hope no hope, ngokuti zvainga zviri pamhene kuti wainga ashaisha.
12 Ngokuti anhu akatumwa na Tiyago paainga asati aguma, iyena wairhya no anhu e madzinza amweni; asi awona paakandoguma, wakasiya kurhya nawo uye wosiyana nawo, ngo kuthya aya akaizwa ucekeri.
13 Adjudha amweni akatobatanidzwawo pa kucengedzera uku, zvotoitawo kuti Bharnabhee acengedzerewo.
14 Asi pandakaona kuti awona ainga asikahambi maererano no cokwadi ce masoko akanaka, ndakabvunza Kefasi* pamberi pa ese kuti: “Iwewe uri Mudjudha, uri kurarama hinga zvinoita anhu e madzinza amweni, haiwa hinga zvinoita Mudjudha, hino ngei uri kubambidzira anhu e madzinza amweni kuti ararame maererano no tsika dze Cidjudha?”
15 Isusu ekuti takabarhwa tiri Adjudha, haiwa ashaishi anobva ku anhu e madzinza amweni,
16 tinoziya kuti munhu aazwi munatsi nge kuita zviito zve mutemo, asi nge kutenda muna Djesu Kristu basi. Ngokudaro, tinotenda muna Kristu Djesu, kuti tizwi tiri anatsi nge kutenda muna Kristu, haiwa nge kuita zviito zve mutemo, ngokuti apana munhu ucazwi munatsi nge kuita zviito zve mutemo.
17 Asi kana isusu takaoneka kuti tiri ashaishi tecipsvaka kuzwi tiri anatsi peciseenzeswa Kristu, zvinoreya kuti Kristu ndiye anotiitisa kuti tishaishe here? Haiwa!
18 Kana ndikawakazve zviro zvandakaputsa, ndinonga ndecipangidza kuti ndiri mushaishi.
19 Ngokuti peciseenzeswa mutemo ndakafa ku mutemo, kuitira kuti ndigare mupenyu kuna Mwari.
20 Ndakakhomerhwa pa mutanda pamwepo na Kristu. Andinipi ndiri kurarama, asi Kristu ndiye ari kurarama mu rubatano na inini. Zvezvirokwazvo, upenyu wandiri kurarama zvino pa nyama ndinouraramira no kutenda mu Mwana wa Mwari, uya akandida uye odzipira nge ndaa yangu.
21 Inini andirambi nyasha dza Mwari, ngokuti kudai munhu ecigara munatsi nge kuzwira mutemo, zvezvirokwazvo Kristu akafira nyore.
Masoko ari pasi
^ Cigrego: “nguwa imwe.”
^ Unodainzwawo kuti Pedru.
^ Unodainzwawo kuti Pedru.
^ Unodainzwawo kuti Pedru.
