Ku Agaratiya 3:1-29
-
Kusiyana kakaita zviito zve Mutemo no kutenda (1-14)
-
Munatsi ucararama nge kutenda (11)
-
-
Abrahamu aazi kupaswa gondeso nge ndaa ye kuzwira Mutemo (15-18)
-
Mubarirhwana wa Abrahamu, Kristu (16)
-
-
Kutanga uye cinangwa ce Mutemo (19-25)
-
Ana a Mwari nge ndaa ye kutenda (26-29)
-
Mubarirhwana wa Abrahamu, anhu a Kristu (29)
-
3 Imwi Agaratiya mapenzi! Makanyasa kupanganidzirhwa ngezve kukhomerhwa ka Djesu Kristu pa mutanda, hino ndiani akamucengedzerai kuti mugare no maonero akashata kudaro?
2 Pano ciro cimwe basi candiri kuda kumubvunzisai:* Makatambira mwiya nge ndaa ye zviito zve mutemo here kana kuti nge ndaa ye kutenda zvamakazwa?
3 Kodi imwimwi muri mapenzi akadaro here? Pakutanga imwimwi maigonda mwiya mucena, hino ngei pari zvino maakuteera marangariro e anhu?
4 Kodi makatambudzikira nyore here? Ndino rugondo rekuti amuzi kutambudzikira nyore.
5 Kodi uya anomupasai mwiya no kuita mabasa e simba pakati penyu, anozviita nge ndaa ye zviito zve mutemo here kana kuti nge ndaa ye kutenda kenyu zvamakazwa?
6 Ndizvonawo zvakaitika kuna Abrahamu “Iyena wakatenda muna Djehovha,* uye zvakaita kuti azwi munhu munatsi.”
7 Zvezvirokwazvo imwimwi munonyasa kuziya kuti aya ano kutenda ndiwona anozwi ana a Abrahamu.
8 Mwari akareketa mu Matarhwa kuti aizoona anhu e madzinza amweni hinga anatsi nge ndaa ye kutenda kawo, ngokuti akatanga kuziisa masoko akanaka kuna Abrahamu eciti: “Madzinza ese acakomborerhwa nge ndaa yako.”
9 Ngokudaro, aya ano kutenda anokomborerhwa pamwepo na Abrahamu, wainga ano kutenda.
10 Ese anogonda zviito zve mutemo akatukwa, ngokuti zvakatarhwa kuti: “Akatukwa munhu wese anoramba kutondoedza zviro zvese zvakatarhwa mu bhuku ro Mutemo.”
11 Uyezve, zviri pamhene kuti apana unozwi munatsi pamberi pa Mwari nge kuzwira mutemo, ngokuti “munhu munatsi acararama nge ndaa ye kutenda kake.”
12 Mutemo autsamiri pa kutenda. Ngokuti iwona unoti: “Uya unoita zviro izvi, ucararama nge ndaa yazvo.”
13 Kristu akatitenga, ecitisudzunura pa kutukwa no Mutemo ngo kutendera kutukwa pa mbuto yedu, ngokuti zvakatarhwa kuti: “Munhu wese anoturikwa pa mutanda akatukwa.”
14 Izvi zvakaitika kuti makomborero a Abrahamu agumewo ku anhu e madzinza amweni nge ndaa ya Kristu Djesu, kuitira kuti nge kutenda kedu titambirewo mwiya wakagondeswa.
15 Hama, ndiri kubhuya ndeciseenzesa muezaniso we anhu: Kana pakaitika citenderano kunyazi cikaizwa nge anhu, apana unokwanisa kuita kuti cisaseenze kana kutunhudzira zviro paciri.
16 Asi cipikirhwa ici cakaizirhwa Abrahamu no mwana wake.* Matarhwa aabhui kuti “no ana* ako” hingana kuti akawanda, kusiya izvona anobhuya kuti “no mwana wako,”* zvecipangidza munhu umwe basi, Kristu.
17 Uyezve, ndinomubvunzai kuti: Mutemo wakazouya padarika makore 430, hino auiti kuti citenderano cakaizwa na Mwari kare, cisaseenze kuti cipfudzike.
18 Ngokuti kana nhaka yecitsamira mu mutemo, aicatsamirizve pa gondeso; asi Mwari akaipasa Abrahamu no mwoyo wese eciseenzesa gondeso.
19 Hino ngei Mutemo wakaonekepo? Iwona wakaonekepo kuti ubudise pamhene zvishaishi dakara pa kuguma ke mwana* uu wainga wagondeswa, uye gondeso iyona yakaziiswa no ngirozi no rubetso ro muimiriri we citenderano.
20 Kana citenderano cikaizwa no munhu umwe basi, apadikani kuoneka muimiriri we citenderano, ndizvonawo na Mwari ngokuti ndi umwe basi.
21 Zvinoreya kuti Mutemo aupindirani no zvipikirhwa zva Mwari here? Haiwa! Ngokuti kudai kainga kakapaswa mutemo waikwanisa kupasa upenyu, unatsi waizouyawo peciseenzeswa mutemo.
22 Asi Matarhwa anopangidza kuti zviro zvese zvakasungwa no citema, kuitira kuti cipikirhwa cinobva pa kutenda muna Djesu Kristu cipaswe aya ano kutenda.
23 Ngokudaro, kutenda kusati kaapo tainga takacengethwa pasi po mutemo, takasungwa tecietsera kutenda kaizopangidzwa.
24 Hino Mutemo wakagara muperekedzi* wedu, wecitiendesa kuna Kristu kuti tizwi anatsi nge kutenda.
25 Asi ngokuti kutenda kaguma, atiripizve pasi pe muperekedzi.*
26 Zvezvirokwazvo, imwimwi mwese muri ana a Mwari nge ndaa ye kutenda kenyu muna Kristu Djesu.
27 Ngokuti imwimwi mwese makabhabhatidzwa muna Kristu, makapfeka Kristu.
28 Akuna Mudjudha kana Mugrego, akuna muranda kana munhu wakasudzunuka, akuna mwanarume kana mwanakadzi, ngokuti imwimwi mwese muri umwe basi mu rubatano na Kristu Djesu.
29 Uyezve, kudai muri anhu a Kristu, zvezvirokwazvo muri ana* a Abrahamu, munozogara nhaka yakagondeswa Abrahamu.
Masoko ari pasi
^ Cigrego: “kufundira na imwimwi.”
^ Onai Apendi. A5.
^ Cigrego: “mbeu yake.”
^ Cigrego: “mbeu.”
^ Cigrego: “mbeu yako.”
^ Cigrego: “mbeu.”
^ Kana kuti: “mucengeti.”
^ Kana kuti: “mucengeti.”
^ Cigrego: “mbeu.”
