Ku Agaratiya 4:1-31
4 Inini ndinomubvunzai kuti kana mugari we nhaka aciri mwana mudoko, iyena wakaezana no muranda, kunyazi ari tenzi wo zviro zvese,
2 asi iyena uri pasi pe acengeti no aonereri dakara zuwa rakasanangurhwa na baba ake raa raguma.
3 Ngo mushobo umwewo, isusu patainga tiri ana adoko taiizwa aranda ngo zviro zvisina basa zvo nyika ino.
4 Asi payakaguma nguwa, Mwari akatuma Mwana wake, wakabarhwa no mwanakadzi uye wakagara pasi po mutemo,
5 kuti asudzunure eciita zvekutenga aya ainga ari pasi po mutemo, kuti atitore kuti tigare ana a Mwari.
6 Hino sezvo muri ana, Mwari akakanda mu mwoyo medu mwiya waakapasa Mwana wake, uye iwona unodainzira weciti: “Abha,* Baba!”
7 Ngokudaro, iwewe auciripizve muranda, asi waa mwana; hino kana uri mwana, Mwari akakuitawo mugari we nhaka.
8 Kunyazi zvakadaro, pamainga musikazii Mwari, mainga muri aranda e anamwari e kunyepa.
9 Asi zvino zvamaakuziya Mwari, kana kuti zvamaakuziikanwa na Mwari, ngei muri kuhwirirazve ku zviro zvekutanga zvisina simba uye zvisikabetseri, mecidazve kugara aranda azvo?
10 Imwimwi muri kucengeta no mwoyo wese mazuwa, mwedzi, nguwa uye makore.
11 Ndinothyira kuti kuseenza kandakaita no simba kuti ndimubetserei, ndakazviitira nyore.
12 Hama, inini ndinomudeketererai kuti, garai hinga inini, ngokuti inini ndainga ndakaitawo hinga imwimwi. Imwimwi amuzi kundishaishira ciro.
13 Asi imwimwi munozviziya kuti kurhwara kandakaita ndikona kakaita kuti ndigare no mukana we kumuziisai masoko akanaka ke kutanga.
14 Uye kunyazi mugariro wangu we uthongo wakagara muedzo kamuri, imwimwi amuzi kundishora kana kunyanyaswa;* asi makanditambira hinga ngirozi ya Mwari, hinga Kristu Djesu.
15 Mupfaro uya wamainga munawo uri kupi? Ngokuti inini ndino rugondo rekuti, kudai zvaiita, maizobvisa madziso enyu kuti mundipase.
16 Hino ndakagara muzondi wenyu ngokuti ndakamubvunzai zvirokwazvo here?
17 Awona ari kupsvaka no mwoyo wese kumutorai, asi aaripi kuzviita no cinangwa cakanaka; ngokuti ari kuda kumuparadzanisai na inini, kuti mugare no cido ce kuateera.
18 Zvezvirokwazvo, zvakanaka maningi kuti munhu apsvake no mwoyo wese kumutorai no cido cakanaka, haiwa pandinonga ndinemwi basi,
19 imwimwi ana angu anodiwa, nge ndaa yenyu inini ndiri kurhwadziwa hinga mwanakadzi uri kuda kubara, dakara mapangidza magariro a Kristu.
20 Inini ndaida kugara pakati penyu ndecireketa nge mushobo wakasiyana, ngokuti ndiri kunetseka maningi nge zvenyu.
21 Ndibvunzei imwimwi munoda kuzwira mutemo: Amuzvizii zvinobhuiwa no Mutemo here?
22 Ngo muezaniso, zvakatarhwa kuti Abrahamu wakabara ana airi, umwe wakamubara no muranda we mwanakadzi uye umweni no mukadzi wake asiripi muranda;
23 mwana wo muranda we mwanakadzi wakabarhwa hinga amweni ese* uye mwana we mukadzi wake asiripi muranda wakabarhwa nge ndaa ye gondeso.
24 Zviro izvi zvinoita hinga muezaniso, ngokuti anakadzi aya anoimirira zvitenderano zviiri, citenderano cekutanga cakaizwa pa Dunhu re Sinai, cinobara ana e uranda, icona cinoimirirhwa ndi Agari.
25 Agari unoimirira dunhu riri ku Arabhiya, rinozwi Sinai uye unoimirira Djerusarema ra nyamasi uno, ngokuti riri mu uranda pamwepo no ana aro.
26 Asi Djerusarema re kumusoro rakasudzunuka, uye irona ndirona mai edu.
27 Ngokuti zvakatarhwa kuti: “Pfara iwewe mwanakadzi usikabari; dainzira no mupfaro, iwewe mwanakadzi usina marhwadzo e kubara; ngokuti ana e mwanakadzi akasiiwa akawanda maningi kudarika mwanakadzi uno mwamuna.”
28 Imwimwi hama, muri ana e gondeso hinga zvainga zvakaitawo Izaki.
29 Asi hinga zvaiitika pa nguwa iyona yekuti uya wakabarhwa hinga zvinoizwawo amweni,* wakatanga kutambudza uya wakabarhwa peciseenzeswa simba ro mwiya mucena, ndizvonawo zviri kuitika nyamasi uno.
30 Kunyazi zvakadaro, Matarhwa anotii? “Gogomerai muranda we mwanakadzi pamwepo no mwana wake, ngokuti mwana we muranda we mwanakadzi aazogari nhaka pamwepo no mwana we mwanakadzi wakasudzunuka.”
31 Ngokudaro hama dzangu, isusu atiripi ana e muranda we mwanakadzi, asi tiri ana e mwanakadzi wakasudzunuka.
Masoko ari pasi
^ Iri i soko re Cihebheru kana kuti re Ciaramaiko rinoreya kuti “Baba!” Rinoseenzeswa no ana adoko paanodainza madzibaba awo.
^ Kana kuti: “amuzi kutondipfirira.”
^ Cigrego: “maererano no nyama.”
^ Cigrego: “maererano no nyama.”
