Tsamba ku Agaratiya 5:1-26
5 Kristu akatisudzunura kuti tigare akasudzunuka. Ngokudaro, batisisai rusununguko irona uye musatenderezve kukandwa pa djoki re uranda.
2 Nyasai kuteya nzee! Inini Pauro ndinomubvunzai kuti, kana imwimwi mukaizwa ucekeri, Kristu acagara asina basa kamuri.
3 Ndinomubvunzaizve kuti, munhu wese anoizwa ucekeri iyena anodikana kuzwira Mutemo wese.
4 Imwimwi muri kuedza kupsvaka kuzwi anatsi peciseenzeswa mutemo, makaparadzaniswa na Kristu; muri kure no nyasha dzake.
5 Katiri isusu, tecibetserhwa no mwiya mucena tiri kuetsera no mwoyo wese unatsi unobva pa kutenda.
6 Ngokuti mu rubatano na Kristu Djesu, kuizwa ucekeri kana kutama kuizwa ucekeri azvikoshi, asi kutenda kunoseenza no rudo ndikona kunokosha.
7 Mainga mecigogoma zvakanaka. Ndiani wakamupingaidzai kuti mutame kuzwira cokwadi?
8 Mushobo uu we fundiso aubvi ku Uya akamudainzai.
9 Mbiriso padoko basi inofufumisa mukanyiwa wese.
10 Ndino rugondo rekuti imwimwi muri mu rubatano na Tenzi, amuzogumi pakucinja marangariro enyu; asi uya uri kumuvhiringidzai, azvinei kuti ndiani, ucapaswa muphanico wakamusisira.
11 Kandiri hama, kana ndiciri kuparidzira ngezve kuizwa ucekeri, ngei ndiciri kuteererhwa? Kana zvakadaro, buwe rinokuhunyisa ro pa mutanda we kutambudzikira* rakabviswa.
12 Inini ndaida kuti anhu anomubvunzewo kuti izwai ucekeri, ngaadzithene* oga kamare.
13 Hama, imwimwi makadainzirhwa rusudzunuko, asi musaseenzese rusudzunuko iri hinga mukana we kupsvaka zvido zve nyama; pane kudaro, seenzerai amweni hinga aranda no rudo.
14 Ngokuti Mutemo wese unodzadzisa* nhungamiriro imwe basi inoti: “Ida mudoni wako hinga mushobo waunodziita.”
15 Asi kana imwimwi mukarumbwa mecirumana no kurhyana, ngwarirai kuti musapedzane.
16 Asi ndinomubvunzai kuti, rumbwai mecihamba mu mwiya uye kana mukadaro amuzoiti zvido zve nyama.
17 Ngokuti zvido zve nyama zvinorhwisana no mwiya, uye mwiya unorhwisana no zvido zve nyama; zvese zviri zviiri zvinozondana, zvekuti imwimwi amutokwanisi kuita zvamunoda.
18 Uyezve, kana imwimwi mecitungamirirhwa no mwiya, amuripi pasi po mutemo.
19 Mabasa e nyama anonyasa kuoneka. Uye ndi aya: Uhure,* kutama kucena, muhambiro unopsverusa,*
20 kunamata mifanikiso, kuita zve masarapita,* kuzondana, kureketedzana, shanje, hasha, kutama kupindirana, kuparadzana, kuteera fundiso dze anhu,
21 bibvu, kumwisa doro, mabiko akanyanyisa uye zviro zvakaita hingana izvi. Inini ndiri kumungwadzai ngezve zviro izvi, hinga mushobo wandakamungwadzai kare kuti, aya anoita zviro izvi aazogari nhaka ye Umambo wa Mwari.
22 Nge dii rimweni, zvibereko zve mwiya ndi izvi: Rudo, mupfaro, runyararo, mwoyo unononoka kutsamwa, unaki, kugara akanaka, kutenda,
23 upfawi, kudzibata. Apana mutemo unorambidza zviro izvi.
24 Uyewo, anhu a Kristu Djesu akakhomera pa mutanda nyama pamwepo no kusirira kawo uye no zvido zvawo.
25 Kana tecirarama maererano no mwiya, ngatirumbwe tecihambawo maererano no mwiya.
26 Ngatisiye kugara anhu anodzikudza, tosiya kukwikwidzana uye toramba kuitirana bibvu.
Masoko ari pasi
^ Onai pakazwi Kupanganidzwa ke Masoko.
^ Kana kuti: “ngaadziite ngomwa,” izvona zvaizoaita kuti asasisire kuzwira mutemo waaikohomedzesa anhu kuti auzwire.
^ Mabhaibheri amweni anoti: “unobatanidza.”
^ Mu Cigrego por·nei′a. Onai pakazwi Kupanganidzwa ke Masoko.
^ Mu Cigrego a·sel′gei·a. Onai pakazwi Kupanganidzwa ke Masoko.
^ Kana kuti: “uroi; zve mudzimu.” Onai pakazwi Kupanganidzwa ke Masoko.
