Ku Agaratiya 6:1-18
6 Hama, kana munhu akatanga kuhamba mu gwanza rakashata asikazvizii, imwimwi muno zvikwaniriso zve ku mwiya edzai kumupangira no upfawi. Asi ngwarirai kuti musaedzwewo.
2 Rumbwai mecithwarirana mitoro, kana mukaita kudaro, munonga mecidzadzisa mutemo wa Kristu.
3 Kana munhu akarangarira kuti unokosha asi iyena asikakoshi, unonga ecidzinyepera pacake.
4 Asi munhu umwe na umwe ngaaongorore zviito zvake, uye ucagara no cikonzero ce kupfara iyena pacake, asikadziezanisi no munhu umweni.
5 Ngokuti umwe na umwe ucathwara mutoro* wake.
6 Uyezve, munhu wese uri kufundiswa soko, ngaapasewo uya uri kumufundisa zviro zvese zvakanaka.
7 Musacengedzwe: Mwari aatambwi naye. Ngokuti zvinosimwa no munhu, ndizvona zvaanozokorora;
8 ngokuti uya unosima maererano no nyama yake unozokorora kuora kunobva pa nyama yake, asi uya unosima maererano no mwiya unozokorora upenyu usikaperi unobva pa mwiya.
9 Ngokudaro, ngatisasiye kuita zviro zvakanaka, ngokuti ticazokorora pa nguwa yakasisira kana tikatama kuremba.
10 Hino, pese patinonga tino mukana, ngatiitire anhu ese zvakanaka, asi maka-maka kuno aya ano ukama na isusu mu kutenda.
11 Onai, ndiri kumutarirai tsamba ino no mabhii makuru no nyara yangu kamare.
12 Ese aya anoda kuoneka hinga akanaka mu maonero e anhu ndiwona anoedza kumubambidzirai kuti muizwe ucekeri, uye awona anozviitira kuti asateererhwe nge ndaa ye mutanda we kutambudzikira* wa Kristu.
13 Ngokuti kunyazi aya akaizwa ucekeri aazwiri Mutemo, asi anoda kuti imwimwi muizwe ucekeri kuitira kuti agare no cikonzero ce kugaya no zvinonga zvaizwa pa nyama yenyu.
14 Asi inini andidzikudzi kunza ke kudzikudza nge ndaa ye mutanda we kutambudzikira* wa Tenzi wedu Djesu Kristu, uya akaita kuti nyika ife kandiri uye kuti inini ndife mu maonero e nyika.
15 Ngokuti kuizwa ucekeri kana kutama kuizwa ucekeri akukoshi, asi cinokosha kugara munhu mupsva.
16 Runyararo no nyasha ngazvigare no ese aya anorarama maererano no mutemo uu, anoumba Israeri ya Mwari.
17 Kubvira zvino kuenda mberi, ngapatame kugara no munhu unondinetsa, ngokuti ndino madzvanga e kugara muranda wa Djesu mu mwiri mangu.
18 Nyasha dza Tenzi wedu Djesu Kristu ngadziseenze pa marangariro enyu hama. Ameni.
Masoko ari pasi
^ Kana kuti: “mutoro we ubaba.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
