Ku Ahebheru 1:1-14
1 Kare-kare, Mwari akareketa kakawanda no madzitsekuru edu uye nge mishobo yakasiyana-siyana eciseenzesa aphorofita.
2 Asi zvino, pa kupera ke mazuwa ano, akareketa na isusu eciseenzesa Mwana wake, uya waakagadza kuti agare mugari we nhaka ye zviro zvese, uye waakaseenzesa kuti aite mugariro uno we zviro.*
3 Iyena ndiena anopangidza rukudzo ra Mwari, ndiena mufanikiso wake kamare, anotsigira zviro zvese no soko rake rino simba. Uye mumasure mekucenesa zvitema zvedu, akagara ku moko kwawo wa Cangamire we kumusoro-soro.
4 Ngokudaro, iyena akagara mukuru kupinda ngirozi dzese ngokuti akagara nhaka ye zina rakanakisisa maningi kupinda mazina adzo.
5 Hinga muezaniso, i ngirozi ipi yakambobvunzwa na Mwari kuti: “Iwewe uri mwana wangu; nyamasi inini ndagara baba ako”? Uyezve: “Inini ndicazogara baba ake, uye iyena acazogara mwana wangu”?
6 Asi paanozounzisazve Dangwe rake pa nyika, iyena anoti: “Ngirozi dzese dza Mwari ngadzimuhwararire.”
7 Uyezve, iyena anoti ngezve ngirozi: “Anoita kuti ngirozi dzake dzigare no simba,* uye aseenzi ake agare murazvi we muriro.”
8 Asi ecireketa ngezve Mwana, iyena anoti: “Mwari ndiye cigaro cako ce umambo nokusikaperi, uye ndonga ye Umambo wako i ndonga ye unatsi.*
9 Imwimwi makada unatsi,* uye makazonda zvisikapindirani no mutemo. Ndiyo ndaa Mwari, Mwari wako, akakudzodza no mafuta e mupfaro kupinda adoni ako.”
10 Uye: “Imwimwi Tenzi, pakutanga makawaka fundasau yo nyika, uye matenga i basa re nyara dzenyu.
11 Izvona zvinozopera, asi imwimwi munorumbwa muripo nokusikaperi; izvona zvinozotsakara hinga macira,
12 uye mucazvipeta hingana djira re kunza, uye izvona zvicacinjwa hingana djira. Asi imwimwi munorumbwa makadaro kamare, uye makore enyu aazomboperi.”
13 Asi pa ngirozi dzese, ndiipi yaakambobvunza kuti: “Gara ku moko kwawo wangu dakara ndakanda azondi ako pasi pe tsoka dzako”?
14 Kodi yese amwiyapi inoita basa cena* here, yakatumwa kuti iseenzere aya anozogara nhaka ye ruponeso?
Masoko ari pasi
^ Onai pakazwi Kupanganidzwa ke Masoko.
^ Kana kuti: “mwiya ino simba.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Kana kuti: “basa rinobetsera akawanda.”
