Ku Ahebheru 10:1-39
10 Ngokuti Mutemo sezvo uri bvute re zviro zvicazouya, asi usiripi zviro zvezvirokwazvo, aukwanisi* kuita kuti aya anokhwedera dhuze kuti amunamate agare akakwana eciseenzesa zvibairo zvaanorumbwa ecipasa gore no gore.
2 Ngokuti kudai aya anopisira zvibairo zvaizoita kuti awona arekererhwe zvitema zvawo, ainga asikadi kuima kuzvipira here? Ngokuti kudai aya anoita basa cena aiceneswa kamwe basi, ainga asikadi kuzopaswa ndaa nge ndaa yo zvitema zvawo.
3 Asi mukusiyana na izvona, zvibairo izvi zvinoizwa gore no gore hinga ciedzuriro ce zvitema zvawo,
4 ngokuti azviiti kuti ngazi yo n’ombe no yo mbudzi ibvise zvitema.
5 Ndiyo ndaa, paakauya pa nyika, iyena akati: “Amuzi kuda cibairo no mupiro, asi makandigadzirira mwiri.
6 Amuzi kupfarira zvibairo zvinopiswa kana zvibairo zvo citema.’
7 Hino inini ndakati: “Ndiri pano (mu mupumburu makatarhwa nge zvangu) kuti ndiite kuda kenyu, imwimwi Mwari wangu.’”
8 Pakutanga iyena anoti: “Amuzi kuda kunyazi kupfarira zvibairo, mipiro, zvibairo zvinopiswa kana zvibairo zvo citema.” Izvi ndizvona zvainga zviri zvibairo zvaiizwa maererano no Mutemo,
9 pedzepo iyena anoti: “Ndiri pano kuti ndiite kuda kenyu.” Iyena anobvisa cokutanga kuti akande cocipiri.
10 “Kuda” uku ndiko kakaita kuti ticeneswe peciseenzeswa mupiro wo mwiri wa Djesu Kristu kamwe basi.
11 Uyezve, mupristi wese unogara pa mbuto yake zuwa no zuwa kuti aite basa cena uye kuti aite kakawanda zvibairo zvimwezvo zvisikakwanisi kubvisa zvacose zvitema.
12 Asi iyena akapasa cibairo co zvitema kamwe basi nokusikaperi, ogara ku moko kwawo wa Mwari,
13 kubvira pa nguwa iyona, iyena akaetsera dakara azondi ake akandwa pasi pe tsoka dzake.
14 Ngokuti pakaseenzeswa cibairo cimwe basi kuti aya ari kuceneswa agare akakwana nokusikaperi.
15 Uyezve, mwiya mucena unotipasawo upupuri paunoti:
16 “‘Ici ndicona citenderano candicaita nawo mumasure me mazuwa awona,’ anodaro Djehovha.* ‘Ndicakanda mitemo yangu mu mwoyo mawo uye ndicaitara mu ndangariro mawo.’”
17 Pedzepo anotunhudzira eciti: “Uye andizoedzuririzve zvitema zvawo uye zviito zvawo zve kutama kuzwira mutemo.”
18 Hino kana pano kurekererhwa ko zvitema izvi, apacinazve cibairo co citema.
19 Hino hama, ngokuti tino rugondo rese re kuseenzesa gwanza rokuenda mu mbuto cena peciseenzeswa ngazi ya Djesu,
20 gwanza ripsva uye ripenyu raakatifungurira peciseenzeswa djira, iro rinoreya nyama yake,
21 uye ngokuti tino mupristi mukuru anotungamirira nyumba ya Mwari,
22 ngatikhwedere dhuze na Mwari no mwoyo wese uye no kutenda kakakwana, tino mwoyo wakacena no hana yakanaka uye mwiri yedu yakasambidzwa no mvura yakacena.
23 Ngatinyase kubatisisa kuziisa pamhene katinoita kariro yedu tisikazungunuki, ngokuti uya akatigondesa akatendeka.
24 Uye ngatirangarirane umwe na umwe wedu kuitira kuti tibambisane pa kupangidza rudo uye no kuita mabasa akanaka,
25 tisikarekeri kuungana kedu, hingana musambo uno amweni, asi tibambisane, maka-maka meciona zuwa ra Mwari recikhwedera.
26 Ngokuti kana teciita citema teciziya kamare mumasure me kutambira ruziyo re zvirokwazvo, panonga pasisina cibairo co zvitema,
27 asi kasara basi kuetsera kutongwa kunothyisa no shungu dzinobaka dzicatsakatisa azondi.
28 Munhu wese asikazwiri Mutemo wa Mozesi anofa asikapangidzirhwi usisi, mumasure me kuizwa upupuri we anhu airi kana atatu.
29 Munoonawo kudini? Amuoni here kuti kana munhu akatsika-tsika Mwana wa Mwari uye oona ngazi yo citenderano yaakaceneswa nayo hinga isikakoshi uye anotuka no kushora mwiya we nyasha dza Mwari, iyena aasisiri kuphanicwa kakakura here?
30 Ngokuti tinoziya Uya akati: “Kuhwirinzira nge kangu; inini ndicahwirinzira.” Uye akatizve: “Djehovha* acatonga anhu ake.”
31 Zvinothyisa maningi kuphanicwa na Mwari mupenyu.
32 Hino rumbwai meciedzurira mazuwa ekare, okuti mumasure me kudjekeserhwa, makashingirira mecirhwisana no miedzo yakakura, mecitambudzika maningi.
33 Nguwa dzimweni, imwimwi maikandwa pamberi po anhu akawanda mecitukwa no kutambudzwa, uye pamweni pakhona maigara pamwepo no anhu aiizirhwa izvona.
34 Ngokuti imwimwi makazwira usisi aya ainga akasungwa uye makatenda no mupfaro kutorerhwa zviro zvenyu, meciziya kuti imwimwi kamare muno zviro zvakanakisisa zvinogara nokusikaperi.
35 Ngokudaro, musasiye ushingi wenyu,* ucaita kuti mupaswe mubairo mukuru.
36 Ngokuti imwimwi munodikana kushingirira, kuitira kuti mumasure me kuita kuda ka Mwari, mutambire zvamakagondeswa.
37 Ngokuti “kasara nguwa doko,” kuti “uya anouya agume uye aazononoki.”
38 “Asi munhu wangu munatsi acararama nge ndaa ye kutenda kake,” uye “kana iyena akahwirira sure, inini andizomupfariri.”*
39 Isusu atiripi aya anohwirira sure kuti atsakatiswe, asi aya ano kutenda kuti acengetedze upenyu.*
Masoko ari pasi
^ Mabhaibheri amweni anoti: “anhu aambokwanisi.”
^ Onai Apendi. A5.
^ Onai Apendi. A5.
^ Cigrego: “musasiye rusununguko renyu re kureketa.”
^ Kana kuti: “mwiya wangu auzomupfariri.”
^ Kana kuti: “mwiya.”
