Ku Ahebheru 11:1-40
11 Kutenda i rugondo rakabamba rekuti zviro zvinonga zvecietserhwa zvicaitikadi, kupangidzwa pamhene ke zviro zvezvirokwazvo zvisikaoneki kuti zviriyo.
2 Ngokuti nge kutenda uku, anhu e mu nguwa yokare* akatambira upupuri wekuti Mwari anoapfarira.
3 Nge kutenda, tinozwisisa kuti nyika yakarongwa* no soko ra Mwari, zvekutoti zviro zvinooneka zvakaonekepo zvecibva pa zviro zvisikaoneki.
4 Nge kutenda, Abheri wakapasa Mwari cibairo cinokosha kupinda ca Kaini. Nge ndaa ye kutenda ikona, iyena wakatambira upupuri wekuti wainga ari munatsi, ngokuti Mwari akatendera zvipo zvake, uye kunyazi wakafa, iyena uciri kureketa nge ndaa ye kutenda kake.
5 Nge kutenda, Inoki wakathuthiswa kuti asaone rufu, uye aazi kuoneka ku mbuto ipi hayo ngokuti Mwari ainga amuthuthisa; ngokuti paainga asati athuthiswa iyena wakatambira upupuri wekuti wainga apfadza Mwari.
6 Uyewo, pasina kutenda azviiti kupfadza Mwari, ngokuti munhu wese anokhwedera kuna Mwari anodikana kutenda kuti iyena ariyo uye kuti anopasa mubairo anhu ese anomupsvaka no mwoyo wese.
7 Nge kutenda, Nowa paakatambira ciziiso ca Mwari ce zviro zvainga zvisati zvaoneka, wakapangidza kuthya Mwari, owaka areka kuti aponese mhuri yake; uye nge kutenda uku, iyena wakapasa ndaa nyika, uye wakagara nhaka ye unatsi unobva pa kutenda.
8 Nge kutenda, Abrahamu paakadainzwa, wakazwira nge kuenda ku mbuto yaaizotambira hinga nhaka; iyena wakaenda, kunyazi wainga asikazii kaaienda.
9 Nge kutenda, iyena wakararama hinga murendo mu nyika yaakapikirhwa, eciita hinga ari mu nyika imweni, ecirarama mu matenda na Izaki uye na Djakobo, aya aizogara nhaka pamwepo naye ye gondeso imweyo.
10 Ngokuti iyena waietsera thaundi rino fundasau ye zvirokwazvo, iyo yakarongwa uye yakawakwa na Mwari.
11 Uyewo nge kutenda, Sara, kunyazi wainga wacembera, iyena wakatambira simba rekuti agare no mwana,* ngokuti iyena waiona Uya ainga amugondesa kuti akatendeka.*
12 Ndiyo ndaa munhu umwe basi waiita hinga afa, wakabara ana akawanda maningi hingana nyeredzi dze kudenga uye asikaerengeki hingana madjeca e mu muceto me bahari.
13 Ese aya akafa ano kutenda, kunyazi hazvo asikazi kutambira zviro zvaakagondeswa; asi akazviona nge kure uye ozvitambira no mupfaro, uye akaziisa pamhene kuti ainga ari arendo uye agari e nguwa doko mu nyika iyona.
14 Ese anoreketa kudaro, anopangidza kuti ari kudzipsvakira no mwoyo wese mbuto yawo ye kugara.
15 Kudai akarumbwa eciedzurira mbuto yaakabva, angadai akagara no mukana we kuhwirira.
16 Asi zvirokwazvo nge zvekuti anhu awona ari kupsvaka kugumira mbuto yakanaka, zvecida kureya, mbuto yo kudenga. Ngokudaro, Mwari aapsveruki nawo ngo kudainzwa Mwari wawo, ngokuti akaagadzirira thaundi.
17 Nge kutenda, Abrahamu paakaedzwa, wakaita hinga atopira Izaki. Mwanarume wainga atambira gondeso no mupfaro, wakaedza kupasa mwana wake akabarhwa ari umwe ega,
18 kunyazi hazvo wainga abvunzwa kuti: “Uya ucazwi mwana* wako, ucauya peciseenzeswa Izaki.”
19 Asi iyena wakaziya kuti Mwari aikwanisa kumutsa Izaki kunyazi kubva ku akafa, uye wakamutambira kubva ku akafa nge mushobo we kuezanisira.
20 Uyewo nge kutenda, Izaki wakakomborera Djakobo na Izau ngo pamusoro pe zviro zvaizouya.
21 Nge kutenda, Djakobo paainga aakuda kufa, wakakomborera umwe na umwe we ana a Zuzee uye iyena wakanamata Mwari akatsamirira panoperera ndonga yake.
22 Nge kutenda, Zuzee paainga aakuda kufa, wakareketa nge pamusoro pe kubuda ke ana e Israeri, uye wakapasa nhungamiriro* dzinocokuita no zviro zvaidikana kuizwa no makodo ake.*
23 Nge kutenda, Mozesi wakafindariswa no abereki ake ke mwedzi mitatu mumasure me kubarhwa, ngokuti akaona kuti mwanewo wainga akarungama uye aazi kuthya mutemo wa mambo.
24 Nge kutenda, Mozesi paainga akura, wakaramba kudainzwa mwana we mwana we mwanakadzi wa Faraoo,
25 ecisanangura kutambudzwa pamwepo no anhu a Mwari pane kupfadzwa no zviro zve zvitema zve nguwa doko,
26 ngokuti kaari kushorhwa kake hinga Kristu wainga uri upfumi wakakura maningi kudarika we ku Edjipitu, ngokuti iyena waietsera no mwoyo wese kutambira mubairo.
27 Nge kutenda, wakabuda ku Edjipitu asikathyi shungu dza mambo, ngokuti wairumbwa ano rugondo hinga waiona Uya asikaoneki.
28 Nge kutenda, wakapemberera Paskwa uye wakawawaizira ngazi kuti mutsakatisi asauraye matangwe awo.
29 Nge kutenda, anhu akabira Bahari Rokupsvuka ecihamba ngo pakaoma; asi Aedjipitu paakaedza kuzviitawo, akamedzwa ngo bahari.
30 Nge kutenda, muru we Djeriko wakambwera mumasure me kutendererhwa nge Aisraeri ke mazuwa 7.
31 Nge kutenda, Rakabhi hure, aazi kuuraiwa pamwepo no aya asikazi kuzwira, ngokuti wakatambira avhevhi nge mushobo wakanaka.
32 Zvinyi zvandicabhuyazve? Ngokuti ndingapererhwa no nguwa kana ndikada kubhuya ngezva Gidhiyoni, Bheraki, Samusoni, Djefta, Dhavhidhi, Samueri uye no aphorofita amweni.
33 Nge kutenda, akanyisa madzimambo, akaita kuti pagare no unatsi, akatambira gondeso, akafunga miromo dze mhondoro,
34 akadzimisa simba ro muriro, akapona pa supada, paainga asina simba akapaswa simba, akagara no simba mu hondo, akanyisa azondi aiuya kuzoarhwisa.
35 Anakadzi akatambira adiwa awo kubva ku akafa, asi amweni akaphanicwa maningi ngokuti aazi kutendera kusudzunurhwa,* kuti aone rumuko rakanakisisa.
36 Honde, amweni akatambira muedzo we kusekwa uye kupondwa maningi; kusiya izvona, amweni akatosungwa uye akakandwa mu makadheya.
37 Akafurhwa ngo mapuwe, akaedzwa, akacekwa ngo pakati, akauraiwa ngo supada, akahamba akapfeka matehwe e mabira uye no matehwe e mbudzi, asina zvakawanda, ecishuphika, ecibathwa zvisikazi kunaka;
38 uye nyika yainga isikazi kuasisira. Aindoherereka mu marenje, mu matunhu, mu mapako, uye mu mapako makuru.
39 Kunyazi ese aya akapupurirhwa zvakanaka nge ndaa ye kutenda kawo, aazi kukwanisa kuona kudzadzika ke zvaakapikirhwa,
40 ngokuti Mwari ainga aona zviro zvakanaka katiri, kuitira kuti awona asagare akakwana isusu tisati.
Masoko ari pasi
^ Kana kuti: “madzitsekuru edu.”
^ Kana kuti: “mugariro we zviro.” Onai pakazwi Kupanganidzwa ke Masoko.
^ Cigrego: “mbeu.”
^ Kana kuti: “akagondeka.”
^ Cigrego: “mbeu.”
^ Kana kuti: “mutemo.”
^ Kana kuti: “kukotswa kake.”
^ Kana kuti: “kusudzunurhwa peciseenzeswa rusudzunuro.”
