Ku Ahebheru 12:1-29
12 Ngokudaro, sezvo tino gore guru re apupuri rakatitenderedza kudai, ngatibvise zviro zvese zvinorema no citema cinotisunga nokukasika, uye togogoma no kushingirira pa makwikwi akakandwa pamberi pedu,
2 tecirumbwa takanyasa kuringira Muimiriri Mukuru uye Mukwanirisi we kutenda kedu, Djesu. Nge mupfaro wakakandwa pamberi pake, iyena wakashingirira rufu pa mutanda we kutambudzikira,* asikathyi kupsveruka, uye akagara ku dii re moko kwawo ro cigaro ce umambo ca Mwari.
3 Zvezvirokwazvo, nyasai kurangarira ngezve uya akashingirira masoko e uzondi airekethwa no ashaishi, ecitodzishaishira oga kamare, kuitira kuti mutame kuremba uye mohwirira sure.
4 Pakurhwisana no citema ici, imwimwi amusati mashingirira dakara pa kubuda ngazi yenyu.
5 Uye makatokanganwa kamare kohomedzeso yamakapaswa hinga ana: “Mwana wangu, usashore mupango unobva kuna Djehovha,* uye audikani kuora mwoyo paunopangirhwa naye;
6 ngokuti Djehovha* anopangira aya aanoda; zvezvirokwazvo, iyena anobvenga* munhu wese waanotambira hinga mwana.”
7 Munodikana kushingirira, ngokuti munonga mecipangidza kuti muri kuda kupangirhwa.* Mwari anomubatai hinga ana. Kodi mwana upi asikapangirhwi na baba ake?
8 Asi kana mwese musikazi kutambira mupango, amuripi ana ake kamare, uye amuripi ana e zvirokwazvo.
9 Uyezve, madzibaba edu aitipangira uye isusu taiareremedza. Hino azvizi kusisira here kureremedza maningi Baba edu* e kudenga anotipasa upenyu kuti tirarame?
10 Ngokuti madzibaba edu aitipangira ke nguwa doko maererano no zvaaiona kuti zvakanaka, asi Mwari anozviita kuti atibetsere kuti tigare akacena hinga iyena.
11 Izvirokwazvo kuti apana kupangirhwa kunopfadza pa nguwa iyona, asi kunorhwadza;* kunyazi zvakadaro, kuno aya anoroedzwa ngo mupango, uwona unobara mucero we runyararo no unatsi.
12 Ngokudaro, bambisai nyara dzisina simba uye mabvi* akaremba,
13 uye rumbwai mecigadzirisa makwanza e tsoka dzenyu, kuitira kuti munhu akaremara asabambirire, asi apore.
14 Petai masimba kuti mugare mu runyararo no anhu ese uye mu ruceno, pasina izvona apana munhu anozoona Tenzi.
15 Nyasai kungwarira kuti pakati penyu pasagare no munhu anoruza nyasha dza Mwari, kuitira kuti patame kugara no mudzi uno vheneno unopfipfitira kuti ubare matambudziko, uye akawanda oshatiswa nawo;
16 uye nyasai kungwarirazve kuti pakati penyu pasaoneke munhu anoita uhure* kana munhu asikareremedzi zviro zva Mwari, hinga zvakaita Izau, wakatengesa udangwe wake kuti apaswe ciro cokurhya kamwe basi.
17 Ngokuti imwimwi munozviziya kuti paakazoda kugara nhaka ye cikomborero, iyena wakarambwa; ngokuti kunyazi wakaedza kucema kuti acinje marangariro awo,* iyena aazi kuzvikwanisa.
18 Ngokuti imwimwi amuzi kukhwedera dhuze no ciro cinobatika, ciro cinobaka, kunyazi gore rakasvipa, cidima cakakura, dutu,
19 kurira ko tropito uye no izwi rakareketa, zvekutoti anhu paakarizwa akadeketera ecikumbira kuti risareketezve nawo.
20 Ngokuti awona ainga asikakwanisi kushingirira mutemo wekuti: “Kunyazi cinyama cikapsvasa dunhu, cinodikana kufurhwa no mapuwe.”
21 Uyewo, zvaioneka zvakhona zvaithyisa maningi zvekutoti Mozesi wakati: “Ndiri kutetemera nge kuthya.”
22 Asi imwimwi makakhwederera dunhu re Ziyoni uye thaundi ra Mwari mupenyu, Djerusarema re kudenga, uye zviuru zve zviuru zve ngirozi
23 dzakaungana uye no ku ungano yo matangwe yakatarhwa ku matenga, uye kuna Mwari mutongi we zvese, no ku upenyu we mwiya we anatsi akaizwa akakwana,
24 uye kuna Djesu muimiriri we citenderano cipsva uye no ngazi yakawawaizirhwa, inoreketa zvakanaka kudarika ya Abheri.
25 Ngwarirai kuti musarambe kupurutana* uya ari kureketa. Ngokuti kana aya akaramba kupurutana uya waiapasa ngwadzo ya Mwari pa nyika asikazi kupona, hino isusu ticapona here kana tikaramba kupurutana uya ari kureketa kubva kudenga?
26 Pa nguwa iyona, izwi rake rakazungunusa nyika, asi pari zvino iyena anogondesa kuti: “Ndicazungunusazve nyika no denga.”
27 Soko rokuti “ndicazungunusazve” rinopangidza kubviswa ke zviro zviri kuzungunuswa, zviro zvakaizwa nge munhu, kuitira kuti zviro zvisikazungunuswi zvirumbwe zviripo.
28 Hino sezvo ticatambira Umambo usikazungunuswi, ngatirumbwe tecitambira nyasha dza Mwari, dzicatibetsera kuitira Mwari basa cena nge mushobo unomupfadza tecimuthya uye no rureremedzo.
29 Ngokuti Mwari wedu akaita hinga muriro unotsakatisa.
Masoko ari pasi
^ Onai pakazwi Kupanganidzwa ke Masoko.
^ Onai Apendi. A5.
^ Onai Apendi. A5.
^ Kana kuti: “anophanica.”
^ Kana kuti: “kufundiswa.”
^ Cigrego: “madzibaba e nyama yedu.”
^ Kana kuti: “kunotsukwarisa.”
^ Kana kuti: “maphondo.”
^ Onai pakazwi Kupanganidzwa ke Masoko.
^ Kureya, marangariro a baba ake.
^ Kana kuti: “musapase zvikonzero zve kuramba kupurutana.”