Ku Ahebheru 13:1-25
13 Rumbwai mecidanana hinga hama.
2 Musakanganwe kutambira arendo zvakanaka,* ngokuti amweni nge kuita izvona akatambira ngirozi asikazvizii.
3 Rumbwai meciedzurira aya ari mu kadheya,* hinga kuti makasungwa pamwepo nawo, uye no aya ari kubathwa zvakashata, sezvo imwimwi muciri mu mwiri we nyama.*
4 Mucato ngaukudzwe no anhu ese, uye bonde re akawakana ngarisasvipiswe, ngokuti Mwari acatonga ese aya anoita uhure* no upombwe.
5 Mararamiro enyu ngaagare e kutama kuda maningi mare, uye gutsikanai no zviro zvamunazvo. Ngokuti iyena akati: “Inini andizomusii, uye andizomutizii.”
6 Kuitira kuti tigare anhu akanyasa kushinga teciti: “Djehovha* ndiye mubetseri wangu; andizothyi. Munhu ungandiitei?”
7 Edzurirai aya ari kutungamirira pakati penyu, akamubvunzai soko ra Mwari, uye pamunoona mugumisiro wakanaka we muhambiro wawo, teedzerai kutenda kawo.
8 Djesu Kristu ndiye umwewo zuro, nyamasi, uye nokusikaperi.
9 Musapauswe no fundiso dzakasiyana-siyana uye dzamusikazii, ngokuti zviri nani kuti mwoyo ubambiswe no nyasha pane kuti ubambiswe no zvokurhya,* zvisikabetseri aya anonyanya kuzvikoshesa.
10 Isusu tino artari yokuti aya anoita basa cena pa tenda, aana citenderhwa cokurhya zviro zvinopirhwa ipona.
11 Ngokuti zvinyama zviya zvinobviswa ngazi inoendeswa mu mbuto cena nge mupristi mukuru, hinga mupiro we citema, zvinopisirhwa kunza ke musasa.
12 Ngokudaro, Djesu akatambudzikawo kunza ke musuwo we thaundi kuti acenese anhu no ngazi yake.
13 Hino ngatiende kaari, kunza ke musasa, tecishorhwa hinga kushorhwa kaakaizwa,
14 ngokuti atina pano thaundi rinorumbwa riripo, asi tiri kupsvaka no mwoyo wese riya ricauya.
15 Peciseenzeswa irona, ngatigare tecipasa Mwari cibairo ce kumukudza, kureya cibereko ce miromo yedu inoziisa pamhene zina rake.
16 Uyezve, musakanganwe kuita zvakanaka uye kupasawo amweni zvamunazvo, ngokuti Mwari anopfadzwa maningi nge zvibairo zvakadaro.
17 Purutanai aya ari kumutungamirirai uye dzikandei pasi pawo, ngokuti ari kumucengetedzai* hinga anhu acazodzidairira, kuti aite izvi no mupfaro haiwa ecigurunguta, ngokuti izvi zvingamukuwadzai.
18 Rumbwai mecitiitira munamato, ngokuti tino rugondo kuti tino hana yakanaka,* sezvo tecida kugara akatendeseka pa zviro zvese.
19 Asi candiri kunyanya kumukohomedzesai ngo cokuti mundiitire munamato kuti ndikasike kuhwirireyo.
20 Mwari we runyararo, akamutsa kubva ku akafa muushi mukuru we mabira, Tenzi wedu Djesu, eciseenzesa ngazi yo citenderano cisikaperi,
21 ngaamupasei zviro zvese zvakanaka zvamunoda, kuti muite kuda kake uye ngaaite mukati medu zviro zvese zvinomupfadza peciseenzeswa Djesu Kristu, iyena ngaakudzwe nokusikaperi. Ameni.
22 Ndinomukohomedzesai hama, kuti munyase kupurutana no mwoyo unononoka kutsamwa masoko aya anobambisa, ngokuti ndakamutarirai tsamba ino masoko padoko basi.
23 Ndinoda kuti muziye kuti hama yedu Timoti yasudzunurhwa. Kana iyena akauya nokukasika, ndicauya pamwepo naye koomuonai.
24 Nditambisireiwo ese aya ari kutungamirira pakati penyu no acena ese. Hama dzo ku Itariya dziri kumutambisai.
25 Nyasha dza Mwari ngadzigare na imwimwi mwese.
Masoko ari pasi
^ Kana kuti: “kubata zvakanaka anhu amusikazii.”
^ Cigrego: “akasungwa; akasungwa no makorenti.”
^ Mabhaibheri amweni anoti: “hinga kuti muri kutambudzika pamwepo nawo.”
^ Onai pakazwi Kupanganidzwa ke Masoko.
^ Onai Apendi. A5.
^ Kureya, mitemo inocokuita no zvokurhya.
^ Kana kuti: “kucengetedza mwiya yenyu.”
^ Kana kuti: “yakatendeseka.”
