Ku Ahebheru 2:1-18
2 Ndiyo ndaa, tinodikana kunyasa kuteya nzee pa zviro zvatinozwa, kuitira kuti tisambopauke.
2 Ngokuti kana soko rakarekethwa peciseenzeswa ngirozi rakapangidza kuti ngere zvirokwazvo, uye kushaisha kwese no kutama kuzwira kakatambira muphanico wakasisira,
3 tingapona kudini kana tikatama kubatisisa ruponeso rakakura kudai? Ngokuti irona rakatanga kuziiswa peciseenzeswa Tenzi wedu uye takaripangidzwa kuti ngere zvirokwazvo no aya akamuzwa,
4 Mwari akabatana nawo pa kupasa upupuri peciseenzeswa zvipangidzo, zvishamiso, mabasa e simba akasiyana-siyana uye zvipo zvo mwiya mucena zvaakapasa umwe na umwe maererano no kuda kake.
5 Ngokuti iyena aazi kugadza ngirozi kuti dzitonge nyika inozouya, yatiri kureketa nge zvayo.
6 Asi mupupuri umweni wakabhuya kuti: “Munhu i cinyi kuti mumuedzurire, kana kuti mwana we munhu i cinyi kuti mumuriritire?
7 Imwimwi makamuita mudoko padoko kupinda ngirozi; makamupfekedza korowa ye rukudzo uye rureremedzo, uye makamugadza kuti atonge mabasa e nyara dzenyu.
8 Imwimwi makakanda zviro zvese pasi pe tsoka dzake.” Paakakanda zviro zvese pasi pake, Mwari aazi kusiya kuti ciro cipi haco citame kugara pasi pake. Asi zvino, atisati taona zviro zvese zvakakandwa pasi pake.
9 Asi zvino tiri kuona Djesu, uya ainga aizwa mudoko padoko kupinda ngirozi, akapfekedzwa korowa ye rukudzo uye rureremedzo nge kufa kake, kuitira kuti nge ndaa ye nyasha dza Mwari iyena afire anhu ese.
10 Zviro zvese zviripo kuti Mwari akudzwe, zvakaonekepo peciseenzeswa iyena. Kuti pakudzwe ana akawanda, zvaidikana kuti Muimiriri Mukuru agare akakwana nge matambudziko. Mwari akaaponesa eciseenzesa Muimiriri Mukuru uu.
11 Ngokuti uya anocenesa pamwepo no aya ari kuceneswa, ese anobva ku umwe basi, ndiyo ndaa iyena aapsveruki nge kuadainza hama,
12 hinga zvaakareketa kuti: “Ndicaziisa hama dzangu zina renyu; ndicamukudzai no ngoma ndiri pakati pe ungano.”
13 Akatizve: “Inini ndinozomuthemba.” Wophindazve eciti: “Onai! Inini no ana andakapaswa na Djehovha.”*
14 Hino, ngokuti “ana” ngee nyama no ngazi, iyena akagarawo we nyama no ngazi, kuitira kuti no rufu rake atsakatise Dhiyabhurosi, uya uno simba ro kukonzera rufu,
15 uye kuitira kuti asudzunure aya ainga ari mu uranda we kuthya rufu mu upenyu wawo wese.
16 Ngokuti zvezvirokwazvo iyena aaripi kubetsera ngirozi, asi ari kubetsera ana* a Abrahamu.
17 Ndiyo ndaa, iyena aidikana kugara hinga “hama” dzake mu mishobo yese, kuti agare mupristi mukuru ano usisi uye akatendeka mu zviro zvese zva Mwari, kuitira kuti apase cibairo cinoenderana no zvishaishi zve anhu ese.
18 Ngokuti iyena akatambudzwa paaiedzwa, angakwanisawo kubetsera aya ari kuedzwa.