Ku Ahebheru 3:1-19
3 Hino hama dzangu cena, makadainzwa* kuenda kudenga, rangarirai ngezva Djesu, uya watinotenda* kuti ndi muphostori uye mupristi mukuru.
2 Iyena akatendeka ku Uya akamugadza, kuitawo hinga Mozesi wakatendeka mu nyumba yese ya Mwari.
3 Ngokuti iyena* anooneka kuti akasisira kukudzwa kudarika Mozesi, sezvo uya anowaka nyumba anoreremedzwa kudarika nyumbeyo.
4 Izvirokwazvo kuti nyumba imwe na imwe ino munhu unoiwaka, asi akawaka zviro zvese ndi Mwari.
5 Mozesi wainga wakatendeka paaiseenza mu nyumba ya Mwari, zvakazogara upupuri pa zviro zvaizorekethwa,
6 asi Kristu ainga akatendeka hinga mwana pa kutungamirira zviro mu nyumba ya Mwari. Isusu tiri nyumba Yake, kana tikarumbwa takabatisisa rusununguko redu re kureketa uye kariro yatinodada nayo dakara kumugumo.
7 Hino, hinga kureketa kunoita mwiya mucena kuti: “Nyamasi, kana mukazwa izwi rake,
8 musaomese mwoyo yenyu hinga pamakaita kuti ndinyangadzwe maningi, pa zuwa ro muedzo ku renje,*
9 pandakaphikiswa no madzitsekuru enyu uye ecindiedza, kunyazi hazvo ainga akaona mabasa angu ke makore 40.
10 Ndiyo ndaa ndakanyangadzirhwa mubarirhwana uu uye ndoti: ‘Awona anogara ecipauka mu mwoyo mawo, uye aazi kuguma pa kuziya makwanza angu.’
11 Hino ndakapika ndakanyangadzwa kuti: ‘Aazopindi mu mbuto yangu yandakagadzirira kuti azorore.’”
12 Hama dzangu, ngwarirai kuti pakati penyu pasaoneke munhu uno mwoyo wakashata uye usina kutenda nge kugara kure na Mwari mupenyu;
13 asi rumbwai mecibambisana zuwa no zuwa, pakunonga kuno nguwa inodainzwa kuti “Nyamasi,” kuitira kuti pasaoneke munhu unoomesa mwoyo nge ndaa yo simba ro ucengedzi we citema.
14 Ngokuti isusu ticatambirawo zvakatambira Kristu kana tikabatisisa rugondo ratainga tinaro pakutanga dakara ku mugumo.
15 Hinga kurekethwa kazvakaizwa kuti: “Nyamasi, kana mukazwa izwi rake, musaomese mwoyo yenyu hinga pamakaita kuti ndinyangadzwe maningi.”
16 Ndiani akazwa asi kunyazi zvakadaro akaita kuti Mwari anyangadzwe maningi? Andiopi ese aya akabuda mu Edjipitu ecitungamirirhwa na Mozesi here?
17 Uyezve, ndiani akanyangadzisa Mwari ke makore 40? Andiopi aya akashaisha, ofira ku renje here?
18 Ndiapi aakapikira kuti aazopindi mu mbuto yake yaakagadzirira kuti azorore? Andiopi aya ainga asikazwiri here?
19 Hino tiri kuona kuti akatama kupinda ngokuti ainga asina kutenda.
Masoko ari pasi
^ Kana kuti: “makapikwa.”
^ Kana kuti: “watinopupurira.”
^ Kureya Djesu.
^ Onai pakazwi Kupanganidzwa ke Masoko.
