Ku Ahebheru 4:1-16
4 Ngokudaro, sezvo pacino gondeso ye kupinda mu zororo rake, ngatingwarire* kuitira kuti pasaoneke kana umwe wenyu anooneka kuti aazi kusisira kupindemo.
2 Ngokuti masoko akanaka atakaziiswa, awona akaaziiswawo; asi soko raakazwa arizi kuabetsera ngokuti awona aazi kubatana pa kutenda no aya akazwa.
3 Ngokuti isusu tinopangidza kutenda tinopinda mu zororo, hinga kureketa kaakaita kuti: “Hino ndakapika ndakatsamwa ndeciti: ‘Aazopindi mu mbuto yangu yandakagadzirira kuti azorore,’” kunyazi mabasa ake ainga apera kubvira pa kusikwa ke nyika.
4 Ngokuti akamboreketa ngezve zuwa rocinomwe eciti: “Mwari akazorora pa zuwa rocinomwe pa mabasa ake ese,”
5 uye akareketazve kuti: “Aazopindi mu mbuto yangu yandakagadzirira kuti azorore.”
6 Ngokudaro, ngokuti kucino anhu amweni akasara kuti apindemo, uye sezvo aya akatanga kuparidzirhwa masoko akanaka asikazi kupindemo nge ndaa ye kutama kuzwira kawo,
7 iyena anosanangurazve zuwa rimweni nge kureketa mumasure me nguwa yakareba mu Pisarema ra Dhavhidhi eciti: “Nyamasi”; hinga kutarhwa kazvaizwa pamusoro apa kuti: “Nyamasi, kana mukazwa izwi rake, musaomese mwoyo yenyu.”
8 Ngokuti kudai Djoshuwa akaaendesa ku mbuto imweni yo kuzororera, Mwari ainga asikadi kureketazve ngezve zuwa rimweni.
9 Ngokudaro, anhu a Mwari aciri naro Sabudu re kuzorora.
10 Ngokuti munhu anopinda mu mbuto yakagadzirirhwa na Mwari kuti azorore, anozororawo pa mabasa ake, ngokuti Mwari akazororawo pa mabasa ake.
11 Hino ngatipete masimba kuti tipinde mu mbuto iyona ye kuzorora, kuitira kuti pasaoneke munhu unombwerera mu mushobo uwona we kutama kuzwira.
12 Ngokuti soko ra Mwari ripenyu uye rino simba, rakapinza maningi kupinda supada inoceka no kwese. Rinobaya mukati-kati dakara panoparadzana zviri kunza no zviri mukati me munhu uye panosongana makodo no urozvi. Irona rinokwanisa kuzwisisa ndangariro dze munhu uye zvinodiwa no mwoyo wake.
13 Uye apana cisikwa caasikaoni, asi zviro zvese zvinonyasa kuoneka uye zviri pamhene mu madziso a uya watinodikana kudzidairira kaari.
14 Sezvo tino mupristi mukuru kupinda ese, uya akaenda kudenga, Djesu Mwana wa Mwari, ngatirumbwe tecimuziisa pamhene.
15 Ngokuti atina mupristi mukuru asikakwanisi kutizwisisa pa kutama simba kedu, asi watinaye akaedzwa pa migariro yese ye zviro hinga zvatakaizwawo, asi iyena akarumbwa asina citema.
16 Hino, ngatikhwedere ku cigaro ce umambo ce nyasha dza Mwari tino rusununguko re kureketa, kuitira kuti tiizirhwe usisi uye tipangidzirhwe nyasha dza Mwari, kuti zvitibetsere pa nguwa yakasisira.
Masoko ari pasi
^ Cigrego: “ngatithye.”