Ku Ahebheru 5:1-14
5 Ngokuti mupristi mukuru wese anosanangurhwa pakati pe anhu, anogadzwa kuti aimirire pa zviro zvinocokuita na Mwari, kuitira kuti apase zvipo uye zvibairo nge ndaa yo zvitema.
2 Iyena anokwanisa kubata no usisi* anhu asina ruziyo uye anoshaisha,* ngokuti iyena unorhwisanawo no kutama simba kake,
3 uye nge ndaa yazvo iyena unodikana kuita mipiro ye zvitema zvake kamare hinga mipiro yaanoita pa zvitema zve anhu amweni.
4 Akuna munhu unotambira kukudzwa uku nge kuda kake, asi unokutambira basi nge kudainzwa na Mwari, hinga zvakaizwa Aroni.
5 Ngo mushobo umwewo, Kristu aazi kudzikudza ega ecidziita mupristi mukuru, asi akakudzwa na Uya akamubvunza kuti: “Iwewe uri mwana wangu; nyamasi inini ndagara baba ako.”
6 Hinga kureketa kaakamboita kuti: “Iwewe uri mupristi nokusikaperi hinga zvainga zvakaita Merikizedheki.”
7 Paainga ari pasi pano, Kristu aiita munamato, aideketera uye aikumbira eciita zvekucema no kutobvisa misodzi, ku Uya aikwanisa kumuponesa pa rufu, uye iyena akazwiwa nge ndaa ye kuthya kake Mwari.
8 Kunyazi iyena ainga ari mwana, akafundira kuzwira nge matambudziko aakabatana nawo.
9 Uye, mumasure mekuizwa akakwana, iyena akapaswa basa re kuponesa nokusikaperi aya anomuzwira,
10 ngokuti akagadzwa na Mwari kuti agare mupristi mukuru hinga zvainga zvakaita Merikizedheki.
11 Tino zvakawanda zvekureketa nge zvake, asi zvinoshupha kupanganidza, ngokuti imwimwi makagara anhu anononoka kuzwisisa.
12 Ngokuti kunyazi zvino maidikana kugara afundisi, asi muciri kutoda munhu umweni kuti atangezve kumufundisai zviro zvekutanga zve masoko macena a Mwari, uye mahwirirazve pa kuda mukaka, haiwa zvokurhya zvakakora.
13 Ngokuti munhu wese anorumbwa eciamwa mukaka aazii soko re unatsi, ngokuti iyena uciri mwana mudoko.
14 Asi zvokurhya zvakakora ngezve anhu akuru, aya anoita kuti simba rawo rokuzwisisa rifundiswe kusiyanisa zvakanaka no zvakashata paanonga eciriseenzesa.