Ku Ahebheru 6:1-20
6 Hino, ngokuti tasiya fundiso yokutanga pamusoro pa Kristu, ngatiseenze no simba kuti tikure, tisikakandizve fundasau, kureya, kufundiswazve ngezve kucinyuka pa mabasa akafa uye kutenda muna Mwari,
2 fundiso ngezve rubhabhatidzo, kutsanzikira nyara, kumutswa ke akafa uye kutongwa kusikaperi.
3 Uye ticaita kudaro, kana Mwari akatendera.
4 Panocokuita no aya akadjekeserhwa, akaraira cipo* ce kudenga, akatambira mwiya mucena
5 uye akaraira soko rakanaka ra Mwari no masimba e mugariro we zviro ucauya,*
6 asi akazopauka, azviiti kuti akwanisezve kucinyuka zvitema zvawo; ngokuti anokhomerazve Mwana wa Mwari pa mutanda ecimupsverusa pakadzara ngo anhu.
7 Ngokuti mavhu anokomborerhwa na Mwari paanonairhwa no mvura inogara yecinaya nguwa dzese uye pedzepo anobara micero inobetsera kuno aya anoarima.
8 Asi kana mavhu akabara minzwa uye miti ino minzwa, anorambwa uye anonga aapadhuze kuti atukwe, uye pakupedzesera anopiswa.
9 Ngokudaro hama dzinodiwa, kunyazi tecireketa nge mushobo uu, tino rugondo rekuti mucaitirhwa zviro zvakanaka, zvinocokuita no ruponeso.
10 Ngokuti Mwari amunhupi asina unatsi kuti akanganwe basa renyu uye rudo ramunopangidza ku zina rake, ngo kuseenzera acena uye ngo kurumbwa meciaseenzera.
11 Asi tinoda kuti umwe na umwe wenyu aseenze no simba zvakadaro, kuitira kuti munyase kugara no kariro dakara ku mugumo,
12 kuti musagare no nungo, asi muteedzere aya anogara nhaka ye zviro zvakagondeswa nge kutenda uye no mwoyo unononoka kutsamwa.
13 Ngokuti Mwari paakapikira Abrahamu, sezvo painga pasina mukuru umweni kudarika iyena waaikwanisa kupika naye, akapika mu zina rake kamare,
14 eciti: “Zvezvirokwazvo ndicakukomborera uye ndicaita kuti ana ako awande.”
15 Hino Abrahamu paakapangidza mwoyo unononoka kutsamwa, wakatambira cipikirhwa ici.
16 Ngokuti anhu anopika no munhu mukuru kaari, uye mhiko yawo inopedza kureketedzana kese, ngokuti iyona inogara gondeso yo pa mutemo kaari.
17 Nge mushobo umwewo, Mwari paakada kunyasa kupangidza pamhene cipikirhwa cake ku agari e nhaka kuti cinangwa cake acicinji, akazviita no mhiko,
18 kuitira kuti peciseenzeswa zviro zviiri izvi zvisikacinji, zvekuti azviiti kuti Mwari anyepe nge zvazvo, isusu ekuti takatizira ku mbuto ye kutizira, tibambiswe maningi kuti tibatisise kariro yakakandwa pamberi pedu.
19 Tino kariro ii hingana ciro cinodzimikidzisa upenyu,* yakaima zvakanaka uye yakabamba, uye iyona inopinda mukati mo djira,
20 umo muna Djesu, munhu akatanga kupindemo ecitiimirira ogara mupristi mukuru nokusikaperi hinga zvainga zvakaita Merikizedheki.
Masoko ari pasi
^ Kana kuti: “cipo co nyore.”
^ Onai pakazwi Kupanganidzwa ke Masoko.
^ Kana kuti: “mwiya.”