Ku Ahebheru 7:1-28
7 Ngokuti Merikizedheki uu, mambo we ku Saremi uye mupristi wa Mwari we Kumusoro-soro, wakasongana na Abrahamu paainga ecibva kookunda madzimambo uye wakamukomborera,
2 uye Abrahamu wakamupasa cegumi* ce zviro zvake zvese. Pakutanga, zina rake parinoturikirhwa rinoreya “Mambo we Unatsi,” uye ndi mambo we Saremi, zvecida kureya kuti: “Mambo we Runyararo.”
3 Ngokuti wainga asina baba, asina mai, asina mubarirhwana, asina pakatangira mazuwa ake kana kuti panogumira upenyu wake, asi wakaita hingana Mwana wa Mwari, iyena acarumbwa ari mupristi nokusikaperi.*
4 Onai kukura ke mwanarume uu, wekuti tsekuru edu Abrahamu, akamupasa cegumi ce zviro zvake zvakanakisisa zvaainga atora.
5 Izvirokwazvo kuti maererano no Mutemo, ana a Revhi, aya akapaswa basa re upristi, anocitenderhwa ce kupaswa zvegumi no anhu, kureya hama dzawo, kunyazi awona ari ana a Abrahamu.
6 Mwanarume uu, wekuti wainga asiripi we mubarihwana wawo wakatambira zvegumi zva Abrahamu uye wakakomborera uya wakaitirhwa zvipikirhwa.
7 Munhu wese unozviziya kuti mudoko unokomborerhwa no mukuru.
8 Arevhi akatambira zvegumi ainga ari anhu anofa, asi munhu umweni uu wakatambira zvegumi, Matarhwa anobhuya kuti iyena aafi.
9 Uye tingatobhuya kuti, kunyazi Revhi, uya anotambira zvegumi, akatopasawo zvegumi eciseenzesa Abrahamu,
10 ngokuti Revhi wainga asati abarhwa Merikizedheki paakaenda koosongana na tsekuru ake Abrahamu.
11 Hino, kana zvaibvira kugara akakwana peciseenzeswa mupristi we Arevhi (ngokuti wainga uri cimwe ce zviro zvaiizwa no Mutemo wainga wapaswa anhu), ngei kaizodikanwazve mupristi umweni wainga wakaita hinga Merikizedheki haiwa wakaita hinga Aroni?
12 Ngokuti upristi paunocinjwa, zvinodikanawo kucinja Mutemo.
13 Ngokuti mwanarume uri kurekethwa nge zvake wainga we dzinza rimweni, risina munhu wakamboseenza pa artari.
14 Zviri pamhene kuti Tenzi wedu akabva ku dzinza ra Djudha, asi Mozesi aazi kureketa ciro kuti paizogara no apristi aizobva ku dzinza irona.
15 Uye zvese zvinonyasa kubuda pamhene pakabuda mupristi umweni wakaita hingana Merikizedheki,
16 wekuti iyena wakagara mupristi, haiwa nge ndaa yo dzinza rake maererano no mutemo, asi nge ndaa yo simba re upenyu risikatsakatiswi.
17 Ngokuti anopupurirhwa nge zvake zvecizwi: “Iwewe uri mupristi nokusikaperi hinga zvainga zvakaita Merikizedheki.”
18 Hino, mutemo we kare unobviswa, ngokuti wakaremba uye aucaseenzi.
19 Ngokuti Mutemo auzi kuita kuti ciro cigare cakakwana, asi kariro ndiyo yakaitisa kuti zviro zvigare zvakakwana, uye peciseenzeswa kariro ii, isusu tinokwanisa kukhwedera dhuze na Mwari.
20 Uyewo, ngokuti izvi azvizi kuizwa pasikazi kuizwa mhiko
21 (ngokuti, izvirokwazvo kuti ariyo anhu akagara apristi pasina mhiko yakaizwa, asi uu akagara mupristi nge ndaa yo mhiko yainga yaizwa nge zvake, iyona yakaizwa ndi Uya akabhuya kuti: “Djehovha* akapika mhiko, uye aazocinji:* ‘Iwewe uri mupristi nokusikaperi’”),
22 Djesu akagara gondeso* ye citenderano cakanaka.
23 Uyezve, zvaidikana kuti paoneke apristi akawanda kuti atsiye amweni ainga afa, ngokuti rufu raiaita kuti asarumbwe eciseenza,
24 asi ngokuti iyena anorumbwa ari mupenyu nokusikaperi, apana anomutsiya pa upristi wake.
25 Ngokudaro, iyena anokwanisawo kuponesa zvakakwana aya anokhwedera dhuze na Mwari mu zina rake, ngokuti iyena anogara ari mupenyu nguwa dzese eciadeketerera kuna Mwari.
26 Ngokuti zvakasisira kuti tigare no mupristi mukuru akadaro: Akagondeka, asina ndaa, asikazi kusvipiswa, akaparadzaniswa no ashaishi uye akakwidziridzwa kudarika matenga.
27 Kusiyana no apristi akuru aya, iyena aadikani kupasa mipiro mazuwa ese, pokutanga nge ndaa yo zvitema zvake uye pedzepo nge ndaa yo zvitema zve anhu, ngokuti iyena akaita izvona kamwe basi paakadzipira.
28 Ngokuti Mutemo unogadza anhu akaremba kuti agare apristi akuru, asi soko re mhiko yakaizwa mumasure me Mutemo rinogadza Mwana, uwo akaizwa akakwana nokusikaperi.
Masoko ari pasi
^ Kana kuti: “dhizimo.”
^ Kana kuti: “kuenda no kuenda.”
^ Onai Apendi. A5.
^ Kana kuti: “aazotsumbi.”
^ Kana kuti: “uya akapaswa hinga pinyoro.”
