Ku Ahebheru 8:1-13
8 Iri ndirona fundo guru re zviro zvatiri kureketa: Isusu tino mupristi mukuru wakaita hingana uu, uye iyena wakagara ku moko kwawo we cigaro ca Cangamire kumusoro,
2 iyena ndi museenzi we mu mbuto cena uye we mu tenda re cokwadi, rakaimiswa na Djehovha,* haiwa nge munhu.
3 Ngokuti mupristi mukuru wese anogadzwa kuti ape zvipo no mupiro; ngokudaro, zvaisisira kuti mupristi mukuru agare no ciro cokuti apire.
4 Kudai ainga ari pa nyika, zvainga zvisikaiti kuti agare mupristi, ngokuti paano anarume akagadzwa maererano no Mutemo kuti apase zvipo.
5 Anarume aya ari kuita basa cena hinga muezaniso uye bvute ro zviro zve kudenga; maererano no mutemo wa Mwari wakapaswa Mozesi paaida kuwaka tenda. Ngokuti iyena akati: “Unodikana kungwarira kuti uite zviro zvese maererano no muezaniso wawakapangidzwa mu dunhu.”
6 Asi zvino Djesu apaswa basa rakanaka maningi, ngokuti iyenazve ndi muimiriri we citenderano cakanakisisa, cakaizwa maererano no zvipikirhwa zvakanaka.
7 Kudai citenderano cokutanga cainga cisina pakashaishika, painga pasikadikani kuizwazve citenderano cocipiri.
8 Ngokuti iyena anoona zvishaishi ku anhu paanoti: “‘Onai! Acaguma mazuwa,’ anodaro Djehovha,* ‘ekuti ndicaita citenderano cipsva no nyumba ya Israeri uye no nyumba ya Djudha.
9 Cinonga cakasiyana no citenderano candakaita no madzitsekuru awo, pa zuwa randakaabata nyara kuti ndiabvise mu nyika yo Edjipitu, ngokuti awona aazi kurumbwa ari mu citenderano cangu, ndiyo ndaa ndakagara ndisina basa nawo,’ anodaro Djehovha.”*
10 “‘Ngokuti ici ndicona citenderano candicaita no nyumba ya Israeri mumasure me mazuwa awona,’ anodaro Djehovha.* ‘Ndicakanda mitemo yangu mu ndangariro dzawo, uye ndicatara mu mwoyo mawo. Ndicagara Mwari wawo, uye awona acagara anhu angu.
11 “‘Uye apana ucazofundisazve umweni wake kana hama yake, eciti: “Ziya Djehovha!”* Ngokuti anhu ese acandiziya, kubvira ku mudoko dakara ku mukuru.
12 Ngokuti ndicaazwira usisi pa zviito zvawo zvisina unatsi, uye andizoedzuririzve zvitema zvawo.’”
13 Paari kubhuya kuti “citenderano cipsva,” ari kutoita kuti cokare cisaseenzezve. Hino kana ciro cisikacaseenzi uye caacokare cinonga caapadhuze kuti cingarangare.
Masoko ari pasi
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
