Ku Ahebheru 9:1-28
9 Panocokuita no citenderano cokare, cainga cino mutemo wekuti paizwe basa cena uyewo cainga cino mbuto cena pasi pano.
2 Tenda yakawakwa yainga ino mbuto mbiri, mbuto yokutanga yainga ino cigadziko ce makandiyero, meza uye no pau dzo kupira; iyona inozwi Mbuto Cena.
3 Asi sure ke djira rocipiri kainga kuno mbuto inozwi Mbuto Yakacenesesa.
4 Mukati mayo mainga muno mudziyo we oro, we kupisira ruseenzi, uye areka ye citenderano yakatsurutsuthwa no oro matii ese, mukati mayo mainga muno jaro ye oro yainga ino manaa, ndonga ya Aroni yainga yapfipfitira uye matabwa e citenderano;
5 uye pamusoro payo painga pano makerubhi e rukudzo, ekuti mabaphiro awo aifukidza cidumhaidzo ce mbuto yaipisirhwa ruseenzi raiita kuti munhu agarezve no ushamwari we padhuze na Mwari. Asi ino ainguwapi yekuti tirekete zvakawanda nge zvazvo.
6 Zviro izvi pazvakapera kugadzirhwa kudai, apristi aipinda nguwa dzese mu mbuto yokutanga yo tenda kuti aite mabasa macena;
7 asi mupristi mukuru waipinda ega mu mbuto yocipiri kamwe basi pa gore no ngazi kuti adziitire mupiro uye kuti aitire anhu mupiro nge ndaa ye zvishaishi zvawo zvaakaita asikazvizii.
8 Mwiya mucena unobudisa pamhene kuti gwanza ro kuenda mu mbuto cena rainga risati rapangidzwa tenda yokutanga payainga iciripo.
9 Tenda ii ndiyona muezaniso we nguwa ino, maererano no gadziriro ii, panopaswa zvipo pamwepo no mipiro. Asi, zviro izvi azvikwanisi kunyasa kucenesa hana yo munhu anoita basa cena.
10 Zviro izvona zvinocokuita no zvokurhya, zvokumwa uye no kudzicenesa kakasiyana-siyana kaidiwa* no mutemo. Zviro izvi zvinodiwa no mutemo zvainga zvinocokuita no mwiri uye zvainga zviripo dakara pa nguwa yainga yasanangurhwa kuzogadzirisa zviro.
11 Asi Kristu paakauya hinga mupristi mukuru we zviro zvakanaka zvainga zvaitika, akapinda mu tenda huru uye yainga yakanyasa kukwana, isikazi kuizwa nge nyara dzo anhu, kureya kuti, isikazi kuizwa nge zviro zvakasikwa zve pasi pano.
12 Iyena aazi kupinda mu mbuto cena no ngazi yo mbudzi no yo mwana we n’ombe we kono, asi no ngazi yake kamare, kamwe basi, uye oita kuti tinunurhwe* nokusikaperi.
13 Kana ngazi ye mbudzi no yo n’ombe pamwepo no marota e mwana we n’ombe we kono zvikawawaizirhwa aya akasvipiswa zvecicenesa nyama yawo,
14 zvakadiniwo no ngazi ya Kristu, wekuti eciseenzesa mwiya usikaperi akadzipira kuna Mwari asina cakashaishika, ingakonerhwa here kucenesa mabasa akafa e hana yedu, kuitira kuti tiitire basa cena Mwari mupenyu?
15 Ndiyo ndaa iyena ari muimiriri we citenderano cipsva, kuitira kuti aya akadainzwa atambire gondeso ye nhaka isikaperi, sezvo pano munhu akafa kuti awona asudzunurhwe, peciseenzeswa rusudzunuro re zvishaishi zvakaizwa ari pasi po citenderano cokare.
16 Ngokuti kana pano citenderano, panodikana kuoneka rufu re munhu unonga weciimirira citenderanoco;
17 citenderano cinoseenza mumasure me kufa ke munhu unonga waimirira citenderanoco, ngokuti icona aciseenzi kana munhu unonga eciciimirira aciri mupenyu.
18 Kunyazi citenderano cokare, acizi kutanga kuseenza pasina ngazi.
19 Ngokuti mumasure mekuti Mozesi waziisa anhu ese Mitemo yese, iyena wakatora ngazi ye mwana we n’ombe we kono, yo mbudzi, uyewo wakatora mvura no usaru we kupsvuka no isopo, uye wakazviwawaizira pamusoro pe bhuku* uye ku anhu ese,
20 eciti: “Ii ndiyo ngazi yo citenderano camakabvunzwa na Mwari kuti mucicengete.”
21 Iyena wakawawaizirawo ngazi pa tenda uye pa midziyo yese inoseenzeswa pa basa cena.
22 Honde, maererano no Mutemo, zviro zvese zvinoceneswa peciseenzeswa ngazi, uye pasikazi kudururhwa ngazi apana munhu unorekererhwa.
23 Ndiyo ndaa, zvainga zvakasisira kuti muezaniso we zviro zviri kudenga zviceneswe nge mushobo uu, asi zviro zviri kudenga zvinokumbira zvibairo zvinodarika izvi.
24 Ngokuti Kristu aazi kupinda mu mbuto cena yakaizwa ngo nyara dzo anhu, yekuti ndiyona muezaniso we zviro kamare, asi akapinda kudenga, zvekuti pari zvino ari pamberi pa Mwari* ecitiimirira.
25 Izvi azvizi kuizwa kuti adzipire kakawanda, hinga zvaiizwa nge mupristi mukuru waipinda mu mbuto cena pa gore no gore kuti apire ngazi isiripi yake kamare.
26 Ngokuti kudai zvainga zvakadaro, iyena aizoshuphika kakawanda kubvira pa kusikwa ko nyika. Asi zvino, pa kupera ke mugariro uno we zviro* akadzipangidza kamwe basi kuti afudze citema eciseenzesa cibairo cake kamare.
27 Uye kuitawo hinga anhu anofa kamwe basi, asi mumasure mazvo otongwa,
28 nge mushobo umwewo, Kristu akapirhwa kamwe basi, kuti atore zvitema zve akawanda; uye paanozouyazve kocipiri aazouyi koorhwisana no citema, uye anozooneka no aya anomuetsera no mwoyo wese kuti aponeswe.
Masoko ari pasi
^ Cigrego: “no rubhabhatidzo rakasiyana-siyana raidiwa.”
^ Cigrego: “tisudzunurhwe.”
^ Kana kuti: “mupumburu.”
^ Cigrego: “pamberi pe hope ya Mwari.”
^ Onai pakazwi Kupanganidzwa ke Masoko.