Ku Akorosi 1:1-29
1 Inini Pauro, muphostori wa Kristu Djesu nge kuda ka Mwari, na Timoti hama yedu,
2 ndiri kutarira acena pamwepo no hama dzakatendeka mu rubatano na Kristu dziri ku Korosi:
Nyasha no runyararo zvinobva kuna Mwari Baba edu ngazvigare na imwimwi.
3 Tinogara tecitenda Mwari, Baba a Tenzi wedu Djesu Kristu patinomuitirai munamato,
4 ngokuti takazwa ngezve kutenda kenyu muna Kristu Djesu uye rudo ramunopangidzira ku acena ese
5 nge ndaa ye kariro yamakacengeterhwa kudenga. Imwimwi makazwa ngezve kariro ii pamakaparidzirhwa cokwadi co masoko akanaka
6 akaguma kamuri. Kuitawo hinga masoko ari kubara micero uye ari kutunhudzirika mu nyika yese, ndizvonawo zviri kuitika kamuri kubvira pa zuwa ramakazwa uye ramakanyasa kuzwisisa nyasha dza Mwari mu cokwadi.
7 Izvi ndizvo zvamakafundiswa ndi Epafra murandadoni wedu anodiwa, uya ari museenzi wakatendeka wa Kristu ari kuseenza pa mbuto yedu.
8 Iyena wakatipanganidzirawo ngezve rudo ramunopangidza no rubetso ro mwiya.
9 Ndiyo ndaa, isusuwo kubvira pa zuwa ratakazwa nge zvazvo, atizi kusiya kumuitirai munamato uye kukumbira kuti mudzadzwe no ruziyo re zvirokwazvo re kuda kake no ungwaru wese no kuzwisisa zviro zve kumwiya,
10 kuti muhambe zvinoenderana no zina ra Djehovha,* kuitira kuti munyase kumupfadza pamunorumbwa mecibara micero mu mabasa ese akanaka, mecitunhudzira ruziyo re zvirokwazvo ra Mwari.
11 Tinokumbirawo kuti mubambiswe no simba rese maererano no simba rake rinokudzwa kuti mukwanise kushingirira zviro zvese no mwoyo unononoka kutsamwa uye no mupfaro,
12 mecitenda Baba, akaita kuti mugare akasisira kugara nhaka pamwepo no acena akavhenekerhwa no ciedza.
13 Iyena akatisudzunura pa simba re cidima uye otiendesa mu umambo we Mwana wake anodiwa,
14 uya anoseenzeswa pakutisudzunura no rusudzunuro, rinoita kuti tirekererhwe zvitema zvedu.
15 Iyena ndiye mufanikiso wa Mwari asikaoneki, dangwe re zvisikwa zvese;
16 ngokuti peciseenzeswa iyena zviro zvese zvimweni zvakasikwa kudenga no pa nyika, zviro zvinooneka no zviro zvisikaoneki, zvingadai zviri zvigaro zve umambo, kana atungamiriri, kana atongi, kana anhu ese ano masimba. Zviro zvese zvimweni zvakasikwa peciseenzeswa iyena uye zvakasikirhwa iyena.
17 Uyewo, wainga aapo zviro zvese zvimweni zvisati zvaapo, uye Mwari akamuseenzesa kuti asike zviro zvimweni zvese,
18 uye iyena ndiye musoro we mwiri, kana kuti musoro we ungano. Ndiena wekutanga kumutswa kubva ku akafa, kuti agare wekutanga pa zviro zvese;
19 ngokuti Mwari akapfadzwa ngo kuita kuti zviro zvese zvigare zvakakwana maari,
20 uye peciseenzeswa iyena, akaita kuti zviro zvese zviri kudenga no zviro zvese zviri pa nyika pano, zvigare no ushamwari we padhuze na Mwari, eciita kuti pagare no runyararo peciseenzeswa ngazi yaakadururira pa mutanda we kutambudzikira.*
21 Zvezvirokwazvo, imwimwi kare mainga makaparadzana na Mwari, mainga muri azondi ake ngokuti maikanda ndangariro dzenyu pa zviito zvakashata,
22 iyena akamuitisai kuti mugarezve no ushamwari we padhuze naye eciseenzesa mwiri we kunyama we Mwana wake paakafa, kuti amuunzisei kaari makacena, musina pakashaishwa uye musina camunopumhwa.
23 Honde, kana mukarumbwa muri mu kutenda, makanyasa kugara pa fundasau uye makabamba, musikabviswi pa kariro ye masoko akanaka amakazwa uye akaparidzirhwa zvisikwa zvese zviri pasi pe denga. Inini Pauro, ndakagara museenzi we masoko akanaka aya.
24 Zvino ndiri kupfara pamatambudziko andiri kusongana nawo nge ndaa yenyu, uye ndiri kushingirira mu mwiri mangu zviya zvakasarira pa kutambudzika ka Kristu, kuitira kuti ndibetse mwiri wake, wekuti unoimirira ungano.
25 Ndakaseenzera ungano ii maererano no ubaba wandakapaswa na Mwari kuti zvimubetserei, kuti ndinyase kuparidzira soko ra Mwari,
26 zvakaigika zva Mwari zvainga zvakaigwa kubvira pa mugariro we zviro* wekare uye ku mibarirhwana dzakadarika. Asi zvino zvakaigika izvi zvaakupangidzwa pamhene ku acena ake,
27 akapfarirhwa na Mwari kuti aaziise upfumi unoshamisa we zvakaigika izvi pakati pe anhu e madzinza amweni. Zvakaigika izvi ndi Kristu ari mu rubatano na imwimwi, zvecireya kuti imwimwi muno kariro ye kukudzwa pamwepo naye.
28 Ndiye watiri kuziisa anhu nge zvake, tecikohomedzesa uye tecifundisa anhu ese no ungwaru wese, kuitira kuti tiunze anhu ese ari mu rubatano na Kristu akakwana.
29 Ndiri kuseenza no simba no cinangwa ici, ndecipeta masimba ndecibetserhwawo no simba rake riri kuseenza maningi mandiri.
Masoko ari pasi
^ Onai Apendi. A5.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
