Tsamba ku Akorosi 2:1-23
2 Ngokuti ndinoda kuti muziye kukura kakaita hondo yandiri kumurhwirai no ese aya ari ku Raodhiseya, pamwepo no ese asati akambondiona kamare.*
2 Cinangwa cangu nge cekuti mwoyo yawo inyaradzwe, kuti awona agare akanyasa kubatana mu rudo uye agare no upfumi wese unobva pa kunyasa kugutsikana no kuzwisisa kawo, kuitira kuti agare no ruziyo re zvirokwazvo re zvakaigika zva Mwari, kureya Kristu.
3 Upfumi wese we ungwaru no uzii wakanyasa kuigika maari.
4 Ndiri kureketa izvi kuti pasaoneke munhu unomutsotsai no masoko e kucengedzera.
5 Kunyazi ndisiripopi na imwimwi, ndinemwi mu mwiya, ndecipfara nge kuona kunyasa kurongeka kenyu uye kutenda kakabamba kamunako muna Kristu.
6 Ngokudaro, hinga kutenda kamakaita Kristu Djesu Tenzi, rumbwai mecihamba mu rubatano naye,
7 hingana kufunda kamakaita, kutenda kenyu muna Kristu kunodikana kugara kakabamba, uye kakadzimikidza hinga muti uno midzi dzakatsirhwa pasi, kutenda kenyu kunodikana kuwanda pamunonga mecitenda Mwari.
8 Ngwarirai kuti pasaoneke munhu unomuitai aranda* eciseenzesa ungwaru we nyika ino no ucengedzi usina zvaunobetsera, maererano no tsika dze anhu, eciseenzesa zviro zvekutanga zve nyika, haiwa fundiso ya Kristu;
9 ngokuti maari ndimona makadzara zvese zvakaita Mwari.
10 Imwimwi makagara musina camunoshoterhwa peciseenzeswa iyena, uya ari musoro we utongi wese uye no masimba.
11 Ngo ushamwari wenyu naye imwimwi amuzi kuizwa ucekeri ngo nyara dze anhu, asi makaizwa ucekeri nge kubviswa mwiri wo kunyama, ngokuti aseenzi a Kristu anoizwa ucekeri nge gwanza irona.
12 Ngokuti makakotswa pamwepo naye mu rubhabhatidzo rake, uye nge ndaa ye ushamwari wenyu naye makamutswawo pamwepo naye nge kutenda kenyu mu mabasa e simba a Mwari, uya akamumutsa kubva ku akafa.
13 Uyezve, kunyazi hazvo mainga makafa nge ndaa ye zvishaishi zvenyu uye nge ndaa ye kutama kuizwa ucekeri pa nyama yenyu, Mwari akamupasai upenyu pamwepo naye. Iyena akarekerera no mwoyo wese zvishaishi zvedu zvese
14 uye akafudza mutemo wakaita zvekutarhwa wairhwisana na isusu. Iyena akaubvisa oukhomera pa mutanda we kutambudzikira.*
15 Iyena akanyisa madzimambo no ano masimba, eciapangidza pamberi pe anhu ese kuti anyiswa uye eciaita hinga anhu ari kubva kunyiswa mu hondo.
16 Ngokudaro, musatendere kuti pagare no munhu unomutongai nge ndaa ye zviya zvamunorhya, kana kumwa, kana nge ndaa ye kupemberera mutambo we gore, kana kubarhwa ke mwedzi mupsva uye kucengeta sabudu.
17 Zviro izvi zvinopangidza zviro zvinozouya, asi cokwadi kamare cina Kristu.
18 Ngapatame kugara no munhu unomuitisai kuti muruze mubairo, unopfadzwa no kudzidodosa ke kunyepedzera uye no kunamathwa ke ngirozi, munhu wakadaro “unorumbwa eciomerera”* pa zviro zvaakaona. Zvezvirokwazvo, marangariro ake e kunyama anodzara nge kudzikudza pasina cikonzero cekuti adaro,
19 iyena aabatisisi musoro, uya anopasa zvinodiwa ku mwiri wese uye oita kuti matii ese o mwiri agare akanyasa kubatana pamwepo. Mwari anoita kuti mwiri wese ukure eciseenzesa iyena.
20 Kana makafa pamwepo na Kristu pa zviro zvekutanga zve nyika, ngei mecirarama hinga muciri e nyika mecidzikanda pasi pe mutemo unoti:
21 “Musabate, musaraire, musapsvase,”
22 ngo pamusoro pe zviro zvekuti kana zvikaseenzeswa zvinopera, maererano no mutemo uye no fundiso dze anhu?
23 Zviro izvi zvinooneka hinga zviro zve ungwaru, asi aya anozviita anodzisanangurira ega manamatire aanoda, awona anotambudza mwiri yawo ngokuti anoda kuoneka no anhu kuti anodzidodosa, asi zviro izvi azvina simba pa kurhwisana no zvido zve nyama.
Masoko ari pasi
^ Cigrego: “asati akamboona hope yangu pa nyama.”
^ Kana kuti: “unomutorai hinga cinyama cake caabata.”
^ Onai pakazwi Kupanganidzwa ke Masoko.
^ Soko iri rakatorhwa pa tsika dzisikazwisisiki dzaiizwa no mahedheni munhu paanonga waakugadzwa kuti agare munamati we anamwari awo.
