Tsamba ku Akorosi 3:1-25
3 Asi kana imwimwi makamutswa pamwepo na Kristu, rumbwai mecipsvaka zviro zve kudenga, kakagara Kristu ku moko kwawo wa Mwari.
2 Ndangariro dzenyu ngadzirumbwe dziri pa zviro zviri kudenga, haiwa pa zviro zviri pa nyika.
3 Ngokuti makafa, uye upenyu wenyu wakaigwa pamwepo na Kristu mu rubatano na Mwari.
4 Kristu, uya anopasa upenyu paanozopangidzwa pamhene, imwimwiwo mucazopangidzwa pamhene naye mu rukudzo.
5 Ngokudaro, urayai nhengo dze mwiri yenyu* panocokuita no uhure,* kutama kucena, cido cakanyanyisa ce kuda kuita zvepamaponde, zvido zvinokuwadza uye makaro. Makaro aya ndiko kunamata mifanikiso.
6 Shungu dza Mwari dziri kuuya nge ndaa ye zviro izvi.
7 Muhambiro wenyu wainga wakadaroo mu upenyu wenyu wekare.
8 Asi zvino imwimwi munodikana kusiya zviro zvese, zvakadai hinga: Shungu, kunyangadzwa, kuitira amweni zvakashata no kutuka uye pa muromo penyu apadikani kubuda masoko anopsverusa.
9 Musanyeperane. Munodikana kubvisa unhu wekare* no maitiro awo,
10 uye mopfeka unhu upsva, uri kuizwa upsva peciseenzeswa ruziyo re zvirokwazvo maererano no mufanikiso we Uya akausika,
11 pa mugariro we zviro wakadaro, akuna Mugrego kana Mudjudha, kana wakaizwa ucekeri kana usikazi kuizwa ucekeri, kana we nyika, kana Musitiya,* kana muranda kana munhu wakasununguka; asi Kristu ndiye zviro zvese uye ari mu ese.
12 Hino, hinga anhu a Mwari akasanangurhwa, acena uye anodiwa, pangidziranai usisi no rudo, unaki, kudzidodosa,* upfawi uye mwoyo unononoka kutsamwa.
13 Rumbwai mecishingirirana uye mecirekererana no mwoyo wese kunyazi kana pano munhu ano caashaishirhwa no umweni wake. Hinga zvamakarekererhwa no mwoyo wese na Djehovha,* imwimwi munodikana kuitawo zvimwezvo.
14 Asi kutunhudzira pa zviro zvese izvi, pfekai rudo, ngokuti ndiro cisungo cakakwana ce rubatano.
15 Uyewo, runyararo ra Kristu ngaritonge mu mwoyo menyu,* ngokuti makadainzirhwa runyararo irona mu mwiri umwe basi. Uye pangidzai kuti muri anhu anotenda.
16 Soko ra Kristu ngarinyase kugara mukati menyu no ungwaru wese. Rumbwai mecifundisana uye mecibambisana ngo kuemba mapisarema, no ngoma dze kukudza Mwari, uye no ngoma dze kunamata dzinoembwa mecitenda, rumbwai meciembera Djehovha* mu mwoyo menyu.
17 Zviro zvese zvamunoreketa kana zvamunoita, zviitei zvese mu zina ra Tenzi Djesu, mecitenda Mwari Baba mu zina rake.
18 Akadzi, dzikandei pasi pe amuna enyu, ngokuti zvakasisira muna Tenzi.
19 Amuna, rumbwai mecida akadzi enyu uye musaatsamwire.*
20 Ana, zwirai abereki enyu nguwa dzese, ngokuti izvi zvinopfadza Tenzi.
21 Abereki, musatsamwise ana enyu, kuitira kuti asaore mwoyo.
22 Aranda, purutanai madzitenzi enyu* mu zviro zvese, haiwa basi pamunonga mecioneka kuitira kuti mupfadze anhu, asi zviitei no mwoyo wese mecithya Djehovha.*
23 Zvese zvamunoita, zviitei no mwoyo* wese hinga muri kuzviitira Djehovha,* haiwa anhu,
24 ngokuti munoziya kuti Djehovha* ndiye acamupasai nhaka hinga mubairo. Garai aranda a Kristu, Tenzi wenyu.
25 Zvezvirokwazvo uya anoita zvakashata acaona mubairo wake we zviro zvakashata zvaakaita, ngokuti Mwari aasananguri.
Masoko ari pasi
^ Kana kuti: “nhengo dzenyu dziri pa nyika.”
^ Mu Cigrego por·nei′a. Onai pakazwi Kupanganidzwa ke Masoko.
^ Cigrego: “munhu we kare.”
^ Soko iri rekuti “Musitiya” raiseenzeswa ku anhu aya aioneka hinga kuti aana usiri.
^ Kana kuti: “kudzidodosa mundangariro.”
^ Onai pakazwi Kupanganidzwa ke Masoko.
^ Kana kuti: “ngarionerere mwoyo yenyu.”
^ Onai pakazwi Kupanganidzwa ke Masoko.
^ Kana kuti: “musaabate no hasha.”
^ Cigrego: “e nyama.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
