Tsamba ku Akorosi 4:1-18
4 Imwimwiwo madzitenzi e aranda, batai aranda enyu zvakanaka uye no unatsi, meciziya kuti imwimwiwo muna Tenzi ari kudenga.
2 Rumbwai meciita munamato uye pamunonga mecidaro, rumbwai makamuka uye mecitenda.
3 Pa nguwa imweyo, tiitireiwo munamato, kuti Mwari afunungure musuwo kuti tikwanise kuparidzira soko re zvakaigika zva Mwari ngezva Kristu, randakasungwa nge ndaa yaro,
4 uye kuitira kuti ndiaziise nge mushobo wakadjeka hinga zvandinodikana kuita.
5 Rumbwai mecihamba no ungwaru pamunonga muri pakati pe anhu e kunza, mecinyasa kuseenzesa zvakanaka nguwa yenyu.*
6 Masoko enyu ngaagare e usisi nguwa dzese, akarungwa no munyu, kuti muziye madairire amunodikana kuita munhu umwe na umwe.
7 Tikiko, hama yangu inodiwa, museenzi wakatendeka, muranda wa Tenzi hinga ininiwo, ucamuziisai zvese nge zvangu.
8 Ndiri kumutumira kamuri kuitira kuti muziye kuti takadini, uye kuti anyaradze mwoyo yenyu.
9 Uri kuuyeyo na Onezimo, hama yangu yakatendeka uye inodiwa, uri kubva pakati penyu; uye acamuziisai zvese zviri kuitika kuno.
10 Aristarko, musungwadoni wangu, uri kumutambisai, uyewo Marko, hama ya Bharnabhee (wamakabvunzwa kuti muzomutambire kana akauya koomuvhakacirai), uri kumutambisaiwo,
11 na Djesu unodainzwawo Justu. Aya ndiwo akaizwa ucekeri. Awona ndiwo aseenzidoni angu pa kutsigira Umambo wa Mwari, uye akandinyaradza* maningi.
12 Epafra, muranda wa Kristu Djesu, mudoni wenyu, uri kumutambisai. Iyena nguwa dzese unomuitirai munamato no mwoyo wese, kuitira kuti mugare makanyasa kukwana uye makanyasa kubamba pa zviro zvese zvinocokuita no kuda ka Mwari.
13 Inini ndinomupupurira kuti iyena unoseenza no simba maningi eciitira imwimwi no aya ari ku Raodhiseya pamwepo no aya ari ku Hierapori.
14 Ruka, murapi anodiwa, uri kumutambisai uye Dhema uri kumutambisaiwo.
15 Nditambisireiwo hama dziri ku Raodhiseya na Ninfa, pamwepo no ungano inoitira musangano pa nyumba pake.
16 Uye kana tsamba ii ikaerengwa pakati penyu, itai kuti ierengwewo ku ungano yo Araodhiseya uye imwimwi moerengawo inobva ku Raodhiseya.
17 Bvunzaiwo Arkipo kuti: “Kanda ndangariro dzako pa basa rawakapuwa na Tenzi, kuti ukwanise kuriita.”
18 Uu ndiwona mucungamidzo wangu inini Pauro, wandatara ngo nyara dzangu. Rumbwai meciedzurira ngezve kusungwa kangu. Nyasha dza Mwari ngadzigare na imwimwi.
