Ku Aroma 10:1-21
10 Hama, candiri kuda mu mwoyo mangu uye candinokumbira kuna Mwari nge cekuti awona aponeswe.
2 Ngokuti ndinoapupurira kuti awona anopeta masimba pa kuseenzera Mwari, asi aazviiti nge mushobo we unatsi.
3 Ngokuti nge kutama kuziya kawo unatsi wa Mwari, asi ecipsvaka unatsi wawo, awona aazi kudzikanda pasi pe unatsi wa Mwari.
4 Ngokuti Kristu ndiye mugumo we Mutemo, kuitira kuti munhu wese ano kutenda agare munatsi.
5 Ngokuti Mozesi anotara ngezve unatsi unounzwa no Mutemo eciti: “Munhu unoita zviro izvi, ucararama nge ndaa yazvo.”
6 Asi unatsi unooneka nge kutenda unoti: “Usarekete mu mwoyo mako kuti: ‘Ndiani acakwira kudenga?’ kureya kuti, kuenda koocitisa Kristu;
7 kana kuti: ‘Ndiani acacita mu rindi rakadzikisisa?’ kureya kuti, kuti amutse Kristu kubva ku akafa.”
8 Asi Matarhwa anoti kudini? “Soko riri padhuze na iwewe, pa muromo pako no mu mwoyo mako”; kureya kuti, “soko” ro kutenda ratiri kuparidzira.
9 Ngokuti kana weciziisa pamhene ngo muromo wako kuti Djesu ndi Tenzi, uye wecitenda mu mwoyo mako kuti Mwari akamumutsa kubva ku akafa, ucaponeswa.
10 Ngokuti munhu anotenda no mwoyo kuti agare munatsi, asi anoziisa pamhene no muromo kuti aponeswe.
11 Ngokuti Matarhwa anoti: “Apana munhu anotenda maari acazotsumba.”
12 Ngokuti apana musiyano pakati pe Adjudha no Agrego. Kuna Tenzi umwe basi we anhu ese, anopfumisa ese anomudainza.
13 Ngokuti “munhu wese anodainza zina ra Djehovha* acaponeswa.”
14 Asi, acamudainza kudini kana asikatendi maari? Acatenda kudini maari kana asikazi kuzwa nge zvake? Acazwa kudini kana pasina munhu anoparidzira?
15 Uyewo, angaparidzira kudini kana pasina akaatuma? Hinga kutarhwa kazvakaizwa kuti: “Dzakarungama maningi tsoka dze aya anoparidzira masoko akanaka!”
16 Kunyazi zvakadaro, aesepi akapurutana masoko akanaka. Ngokuti Isaya wakati: “Djehovha,* ndiani akatenda zvaakazwa kubva katiri?”
17 Ngokuti kutenda kunouya mumasure me kuzwa soko. Uye soko rakhona, rinouya panoparidzwa ngezva Kristu.
18 Asi ndinobvunzisa kuti: Kodi masoko aya aazi kuazwa here? Zvezvirokwazvo, “masoko aya akazwika mu nyika yese, dakara ku nyika dziri kure.”
19 Ndinobvunzisazve kuti: Aisraeri ainga asikazvizii here? Pakutanga Mozesi wakati: “Inini ndicaita kuti mugare no shanje ku anhu asiripi e dzinza re Aisraeri; ndicaita kuti munyangadzwe ndeciseenzesa dzinza risina nzero.”
20 Asi Isaya wakagara no ushingi woreketa kuti: “Ndakaoneka no aya ainga asikandipsvaki; ndakaziikanwa no aya ainga asikabvunzisi nge zvangu.”
21 Asi iyena akati ngezve Aisraeri: “Ndakatambanudza nyara yangu zuwa rese ku anhu asikazwiri uye akaoma musoro.”
