Ku Aroma 13:1-14
13 Munhu* wese ngaadzikande pasi pe atongi,* ngokuti apana utongi uripo usikazi kutenderhwa na Mwari; atongi aya aripo, akakandwa mu mbuto dzawo dzakasiyana-siyana na Mwari.
2 Hino, munhu wese unoshora ano masimba ari kurhwisana no urongwa wa Mwari; aya anorhwisana nawo acatongwa.
3 Ngokuti anyautongi aathyiwi nge aya anoita zviro zvakanaka, asi aya anoita zvakashata. Unoda kugara usikathyi anyautongi here? Rumbwa weciita zvakanaka, uye awona acakusimba;
4 ngokuti awona anoseenzera Mwari kuti ubetsereke. Asi kana weciita zviro zvakashata ithya, ngokuti awona akapaswa simba, otenderhwa kuphanica aya anoita zviro zvakashata. Awona ari kuseenzera Mwari kuti aphanice aya anoita zviro zvakashata.
5 Ngokudaro, imwimwi munodikana kuzwira anyautongi, musaazwire basi nge ndaa ye shungu dzawo, asi azwirei nge ndaa yo hana yenyu.
6 Ndiyo ndaa imwimwi munoripa musoho; ngokuti nguwa dzese anyautongi anoita basa kuti abetsere anhu, ndiyo ndaa ecizwi aseenzi a Mwari.
7 Pasai ese zvakaasisira: Kuno aya anoda musoho, apasei musoho; kuno aya anokumbira musengo-musengo, apasei musengo-musengo; kuno aya anoda kuthyiwa, athyei; kuno aya anoda kukudzwa, akudzei.
8 Musagare no magaa no munhu kunza ke kudanana; ngokuti munhu wese anoda mudoni wake wadzadzisa mutemo.
9 Ngokuti mutemo unoti: “Usaite upombwe, usauraye, usabe, usasirire,” uye mitemo yese iripo, inobatanidzwa mu masoko aya ekuti: “Ida mudoni wako hinga mushobo waunodziita.”
10 Rudo ariitiri mudoni zvakashata; hino, rudo kudzadziswa ke mutemo.
11 Uye itai izvi ngokuti munoziya nguwa yatiri, kuti yatoguma nguwa yekuti mumuke mu hope, ngokuti ruponeso redu raapadhuze kudarika patakagara atendi.
12 Usiku waakuda kupera; kunza kaakuda kuedza. Hino ngatibvise zviito zvo cidima uye ngatipfeke zvokurhwa nazvo zvo hondo zve ruvheneko.
13 Ngatigare no muhambiro wakanaka we anhu anoita zviro comasikati, isusu atidikani kuita mabiko akanyanyisa, kumwisa doro, kuita uhure, kugara no muhambiro unopsverusa, kureketedzana uye shanje.
14 Asi teedzerai nge padhuze muezaniso wa Tenzi Djesu Kristu, uye motama kurangarira kupfadza zvido zvo nyama.
