Tsamba ku Aroma 14:1-23
14 Tambirai munhu wakaremba pa kutenda, asi musamutonge nge ndaa yo maonero akasiyana aanoita zviro.
2 Munhu umweni uno kutenda kunomutendera kurhya zviro zvese, asi munhu wakaremba pa kutenda anorhya muriyo we masakani basi.
3 Munhu anorhya aadikani kushora munhu asikarhyi, uya asikarhyi aadikani kutonga munhu anorhya, ngokuti Mwari akamutambira.
4 Ndiwe ani iwewe kuti utonge museenzi we umweni? Kuima kake no kumbwera kake tenzi wake ndiye anozviziya. Iyena unozoima, ngokuti Djehovha ndiena anokwanisa kumuimisa.
5 Munhu umweni ungakwanisa kuona zuwa rimweni hinga rinokosha kupinda rimweni; umweni unoona mazuwa ese hinga akaezana; munhu umwe na umwe ngaagare no cokwadi pa zviya zvaanorangarira.
6 Munhu unocengeta zuwa ngaaricengete eciitira Djehovha. Uya anorhya, ngaarhye eciitira Djehovha, ngokuti unotenda Mwari; uye uya asikarhyi ngaatame kurhya eciitira Djehovha, ngokuti unotenda Mwari.
7 Zvezvirokwazvo, apana kana umwe wedu anodziraramira pacake, uye apana anodzifira pacake.
8 Ngokuti kana tecirarama, tinoraramira Djehovha; kana tikafa, tinofira Djehovha. Ngokudaro, kana tikararama kana tikafa, tiri a Djehovha.
9 Nge ndaa ye izvi, Kristu akafa uye ohwirirazve kurarama, kuti agare Tenzi we akafa no we apenyu.
10 Asi ngei iwewe unotonga hama yako? Uye ngei unoshora hama yako? Ngokuti tese isusu ticaima pamberi pe cigaro cokutonga ca Mwari.
11 Ngokuti zvakatarhwa kuti: “Djehovha akareketa kuti: ‘Ndinopika no upenyu wangu kuti mabvi ese acandigodamira, anhu ese acanyasa kuziya Mwari.’”
12 Ngokudaro, umwe na umwe wedu acadzidairira kuna Mwari.
13 Hino, ngatisacatongezve amweni, kusiya izvona, ngatigare takashinga kuti titame kukanda buwe rinokuhunyisa kana ciro cinopingaidza pamberi po hama yedu.
14 Ndinoziya uye ndino cokwadi muna Tenzi Djesu kuti apana ciro cakasvipiswa; asi cinoitika nge cekuti, kana munhu akarangarira kuti ciro cakasvipa, cinogara cakasvipa kaari.
15 Ngokuti kana hama yako yecikuhunyika nge ndaa ye zvekurhya, iwewe auripi kuhamba maererano no rudo. Usatsakatise munhu akafirhwa na Kristu nge ndaa ye zvekurhya zvako.
16 Hino, musaite kuti zvakanaka zvamunoita zvirekethwe nge zvazvo hinga zviro zvakashata.
17 Ngokuti Umambo wa Mwari aureyi kurhya no kumwa, asi unoreya unatsi, runyararo no mupfaro zvinounzwa no mwiya mucena.
18 Ngokuti munhu wese anoseenzera Kristu nge mushobo uu, anotambirhwa na Mwari uye anopfarirhwa no anhu.
19 Ngokudaro, ngatirumbwe teciita zviro zvinoita kuti pagare no runyararo uye zvinoita kuti tibambisane.
20 Siyai kuputsa* basa ra Mwari nge ndaa ye zvekurhya basi. Izvirokwazvo kuti zviro zvese zvakacena, asi zvakashata kana munhu akazvirhya pedzepo zvokuhunyisa umweni.
21 Zviri nani kutama kurhya nyama no kumwa vhinyu kana kutama kuita ciro cipi haco cinokuhunyisa hama yako.
22 Kutenda kaunako, ngakugare kako wega pamberi pa Mwari. Anopfara munhu uya asikadzitongi ega nge ndaa yo zviro zvaanoona kuti zvakanaka.
23 Asi kana munhu akarhya ciro cipi haco pedzepo opanikira,* unonga aita citema, ngokuti warhya zvisikabvi pa kutenda. Zviro zvese zvisikabvi pa kutenda i citema.
