Ku Aroma 15:1-33
15 Asi isusu takabamba, tinodikana kushingirira kuremba ke amweni haiwa kupfadza isusu wene.
2 Umwe na umwe wedu, ngaapsvake kupfadza mudoni wake pa zviro zvakanaka, kuti amubambise.
3 Ngokuti kunyazi Kristu aazi kuita zvinomupfadza basi, hinga kutarhwa kazvakaizwa kuti: “Kutuka ke anhu anomutukai ngakumbwerere inini.”
4 Ngokuti zviro zvese zvakatarhwa kare zvakatarhwa kuti zvitifundise, kuti tigare no kariro inobva pa kushingirira kedu uye pa kunyaradza kunobva mu Matarhwa.
5 Hino Mwari anopasa kushingirira no nyaradzo ngaaite kuti mugare no marangariro hinga ainga ana Kristu Djesu,
6 kuti mukudze Mwari, Baba a Tenzi wedu Djesu Kristu makabatana no izwi* rimwe basi.
7 Ngokudaro, tambiranai hinga kutambirhwa kamakaizwa na Kristu, kuti Mwari akudzwe.
8 Ngokuti ndinomubvunzai kuti Kristu akagara museenzi we aya akaizwa ucekeri ecipangidza kuti Mwari ngewe zvirokwazvo, kuti abambise gondeso dzakaizwa na Mwari ku madzitsekuru awo,
9 uye kuti anhu e madzinza amweni akudze Mwari nge ndaa ye usisi wake. Hinga kutarhwa kazvakaizwa kuti: “Ndiyo ndaa, ndicapangidza pamhene kuti ndinomuziyai ndiri pakati pe anhu e madzinza amweni, uye ndicaemba ngoma ndecikudza zina renyu.”
10 Iyena wakareketazve kuti: “Pfarai imwimwi, anhu e madzinza amweni, pamwepo no anhu ake.”
11 Uye wakatizve: “Kudzai Djehovha* imwimwi anhu e madzinza ese, uye anhu ese ngaamukudze.”
12 Uye Isaya wakareketazve kuti: “Pacaoneka mudzi wa Djesee, uya anomuka kuti atonge madzinza e anhu; madzinza ese acamugonda.”
13 Mwari anopasa kariro, ngaamudzadzei no mupfaro uye no runyararo nge ndaa ye kugonda kamunomuita, kuti kariro yenyu itunhudzirike peciseenzeswa simba re mwiya mucena.
14 Inini ndino cokwadi na imwimwi hama dzangu, kuti imwimwi munopfarira kuita zviro zvakanaka, makadzara no uzii wese uye munokwanisa kufundisana.
15 Ngokudaro, ndakamutarirai ndisikafisi ciro ngezve zviro zvinganani, kuti muzviziyezve, ndinoita izvi nge ndaa ye nyasha dzandakapangidzirhwa na Mwari
16 kuti ndigare museenzi wa Kristu Djesu pakubetsera anhu e madzinza amweni. Ndakabatikana pa basa iri rakacena ro masoko akanaka a Mwari, kuti anhu e madzinza amweni agare cipo cinotenderhwa, cakaceneswa ngo mwiya mucena.
17 Hino ndino cikonzero cekudada muna Kristu Djesu nge ndaa ye kuita basa ra Mwari.
18 Ngokuti andimboreketi zviro zvimweni kunza ke zviya zvakaizwa na Kristu ecindiseenzesa kuti anhu e madzinza amweni azwire, peciseenzeswa masoko angu no zviito,
19 ngo simba ro zvipangidzo no zvishamiso uye no simba ro mwiya wa Mwari, ndakanyasa kuparidzira masoko akanaka ngezva Kristu kubvira mu Djerusarema mwese dakara matii ese o Iririkomu.
20 Nge mushobo uu, ndakaita zviri zvese kuti nditame kuparidzira masoko akanaka mu mbuto dzainga dzooziikanwa zina ra Djesu, kuitira kuti nditame kuwaka pakatanga kuwakwa ngo munhu umweni;
21 hinga kutarhwa kazvakaizwa kuti: “Aya asikazi kumbozwa nge zvake acamuona, uye aya asikazi kuzwa acazwisisa.”
22 Ndiyo ndaa, ndakarambidzwa kakawanda kuti ndiuye kuzomuonai.
23 Asi zvino andicina mbuto isikazi kuparidzirhwa mu nharaunda ino, uye ndaano makore akawanda* ndecida kuuya kuzomuonai.
24 Ndiyo ndaa, pandicaenda ku Espanya, ndiri kuetsera kumuonai uye kuti mozondiperekedza mumasure mekupedza kacinguwa tiri tese.
25 Asi pari zvino, ndiri kuenda ku Djerusarema kooseenzera hama dzo kweneyo.
26 Hama dzo ku Masedhoniya no dzo ku Akaya, dzakapasa zvadzainga dzinazvo ngo kuita mupiro wekubetsera arombo ari pakati pe hama dziri ku Djerusarema.
27 Zvezvirokwazvo, awona akazviita no mwoyo wese, uye ainga ano magaa nawo; ngokuti anhu e madzinza amweni akabetserhwawo nawo pa zviro zvo kumwiya, awona aidikanawo kuabetsera no zviro zvo kurarama nazvo.
28 Hino, kana ndikapedza kuita izvi zvandiri kuita uye ndogumisa mupiro uu zvakanaka, ndicadarika nge kamuri ndecienda ku Espanya.
29 Kusiya izvona, ndinoziya kuti pandicazouyeyo, ndicauya no makomborero akawanda a Kristu.
30 Ndinomukohomedzesai hama, muna Tenzi wedu Djesu Kristu uye mu rudo rinobva mu mwiya, kuti mupete masimba pamwepo na inini pakuita munamato kuna Mwari ngo pamusoro pangu,
31 kuti ndiponeswe mu nyara dzo anhu asikatendi ari mu Djudhiya uye kuti basa rangu re kuparidzira mu Djerusarema ritambirhwe zvakanaka nge hama.
32 Ngokudaro, ngokuda ka Mwari, inini ndinozouya kuzomuonai no mupfaro ndozotonhodzwa pamwepo na imwimwi.
33 Mwari anopasa runyararo ngaagare na imwimwi. Ameni.
Masoko ari pasi
^ Cigrego: “no muromo umwe basi.”
^ Onai Apendi. A5.
^ Mabhaibheri amweni anoti: “manganani.”
