Tsamba ku Aroma 16:1-27
16 Ndinomuziisai ngezve hanzvadzi yedu Febhi, inoseenzera ku ungano iri ku Senkreya,
2 kuti muitambire muna Tenzi nge mushobo wakasisira kutambirhwa anhu a Mwari* uye kuti muibetsere pa zviro zvese zvainoda, ngokuti yakadziirira akawanda, kutobatanidzawo na inini.
3 Nditambisireiwo Priska na Akira, aseenzi doni angu mu basa ra Kristu Djesu,
4 akakanda upenyu wawo pa ngozi kuti andiponese, andinipi ndega ndinoatenda, asi no ungano dzese dzo anhu e madzinza amweni dziri kuatendawo.
5 Tambisaiwo ungano iri pa nyumba pawo. Tambisai hama inodiwa Epeneto, yakatanga kugara muteeri wa Kristu mu Aziya.
6 Tambisai Mariya, uwo wakamuseenzerai no simba.
7 Tambisai hama dzangu Androniko na Djuniya, akasungwa pamwepo na inini, anarume anonyasa kuziikanwa ngo aphostori uye aano nguwa yakareba ari mu rubatano na Kristu kupinda inini.
8 Tambisai Ampriyato, shamwari yangu inodiwa muna Tenzi.
9 Tambisai Urbhano, museenzi doni wedu mu basa ra Kristu, na Sitaki shamwari yangu inodiwa.
10 Tambisai Apere, wakagondeka mu basa ra Kristu. Tambisai ese ari pa nyumba pa Aristobhuro.
11 Tambisai Herodhiyano, hama yangu. Tambisai ese e pa nyumba ya Narsizo ari muna Tenzi.
12 Tambisai Trifena na Trifoza, anakadzi ari kuseenza no simba mu basa ra Tenzi. Tambisai Persidhe, hanzvadzi yedu inodiwa, ngokuti iyona iri kuseenza no simba muna Tenzi.
13 Tambisai Rufo, wakasanangurhwa muna Tenzi, na mai ake andinoona hinga mai anguwo.
14 Tambisai Asinkrito, Fregoni, Herme, Patrobha, Herma, no hama dzese dziri pamwepo nawo.
15 Tambisai Firorogo na Juriya, Nereu no hanzvadzi yake, uye Orimpa, no anhu a Mwari* ese ari pamwepo nawo.
16 Cungamidzanai no mwoyo wese.* Ungano dzese dza Kristu dziri kumutambisai.
17 Hino ndinomukohomedzesai hama, kuti mungwarire aya anoparadzanisa anhu uye anokandira amweni zvinokuhunyisa eciita zvakasiyana no fundiso dzamakafunda, siyanai nawo.
18 Ngokuti anhu akaita hingana aya aarandapi a Kristu Tenzi wedu, asi awona anoseenzera zvido zvawo, awona anocengedza anhu ngo kureketa masoko anodakadza no anobata ku hope, anocengedza mwoyo dzo anhu asina uzii.
19 Kuzwira kenyu kakaziikanwa no anhu ese, nge ndaa yazvo munondipfadza. Asi ndinoda kuti mugare akangwara pa zviro zvakanaka, asi musikaiti zviro zvakashata.
20 Mwari anopasa runyararo, nokukasika acaphwanya Sathani pasi pe tsoka dzenyu. Nyasha dza Tenzi wedu Djesu ngadzigare na imwimwi.
21 Timoti museenzi doni wangu uri kumutambisai, uye hama dzangu Rusiyo, Djasoni, na Sosipateri, dziri kumutambisaiwo.
22 Inini Tersiyo, wakatara tsamba ii, ndiri kumutambisai muna Tenzi.
23 Gayo, muridzi we nyumba yandiri kugara uye pamwepo no ungano yese, ari kumutambisai, Erasto mucengeti we mare ye thaundi uye pamwepo no munukuna wake Kwarto ari kumutambisai.
24— —
25 Mwari angamuitai kuti mugare makabamba maererano no masoko akanaka andiri kuziisa no kuparidza ngezva Djesu Kristu, maererano no kupangidzwa ko zvakaigika zva Mwari, zvakaigika izvi zvainga zvakaigika ke nguwa yakareba.
26 Asi zvino zvakapangidzwa pamhene uye zvakaizwa kuti zviziikanwe no Matarhwa e uphorofita pakati pe madzinza ese maererano no kuda ka Mwari asina mugumo, kuti anhu azwire zvecibva pa kutenda;
27 Mwari umwe ega ano uzii, ngaakudzwe peciseenzeswa Djesu Kristu nokusikaperi. Ameni.
Masoko ari pasi
^ Cigrego: “acena.”
^ Cigrego: “acena.”
^ Cigrego: “beju re acena.” Beju iri raiizwa nge Akristu paaisongana.
