Tsamba ku Aroma 2:1-29
2 Hino iwewe munhu, azvinei kuti uri ani, kudai wecitonga amweni, uri kudzipasa ndaa ngokuti unoitawo zviro zvimwezvo.
2 Tinoziya kuti kutonga ka Mwari kunoenderana no cokwadi, asi akupindirani no aya anoita zviro zvakadaro.
3 Iwewe munhu unotonga anhu anoita zviro izvi, asi weciitawo zviro zvimwezvo, unorangarira kuti ucapona here pa kutonga ka Mwari?
4 Kana kuti zvauri kurerusa kukura ke nyasha dzake, kunonoka kake kutsamwa uye kushingirira, auzvizii kuti Mwari ari kukupangidzira nyasha dzakakura kuti ucinyuke here?
5 Asi maererano no kutama kuzwira kako uye mwoyo wako usikadi kucinyuka, uri kudziunganidzira wega shungu dza Mwari. Mwari acapangidza shungu idzi pa zuwa re kutonga kake ke unatsi.
6 Uye iyena acahwirinzira umwe na umwe maererano no zviito zvake:
7 Anozopasa upenyu usikaperi kuno aya anoshingirira ecipsvaka kuita zviro zvakanaka, rukudzo, mbiri, no upenyu usikaori;
8 asi aya anobara woyo-woyo, asikazwiri cokwadi, asi ecizwira zviro zvisina unatsi, anozoona shungu no kutsamwa ka Mwari.
9 Pacazooneka kutambudzika no kushuphika pa munhu wese* unoita zviro zvakashata, kutanga ku Mudjudha uyewo ku Mugrego;
10 asi acazopasa munhu wese unoita zviro zvakanaka rukudzo, mbiri uye runyararo, kutanga ku Mudjudha uyewo ku Mugrego.
11 Ngokuti Mwari aasananguri.
12 Ngokuti ese akashaisha asikazii mutemo, anozofa asikazii mutemo; asi ese anoshaisha eciziya mutemo, anozotongwa ngo mutemo.
13 Anoziya mutemo andiwopi anozwi anatsi pamberi pa Mwari, asi anozwira mutemo ndiwona anozodainzwa kuti anatsi.
14 Ngokuti anhu e madzinza amweni asina mutemo, paanoita zviro zvo mutemo maererano no masikirhwe aakaizwa, anhu aya kunyazi asina mutemo, awona i mutemo pacawo.
15 Awona kamare anopangidza kuti mutemo wakatarhwa mu mwoyo yawo, hana yawo yecitoapupurira uye zvaanorangarira zvinoita kuti apaswe ndaa, kana kuti azwi aana ndaa.
16 Izvi zvicaitika pa zuwa ricaseenzeswa Kristu Djesu na Mwari kuti atonge zviro zvese zvakaigika zvo anhu, maererano no masoko akanaka andiri kuziisa.
17 Kana iwewe uri Mudjudha, wecigonda mutemo, wecidada ngokuti unonamata Mwari,
18 weciziya kuda kake uye wecitenda zviro zvakanaka ngokuti unofundiswa Mutemo,
19 uye uno cokwadi cekuti uri mutungamiriri we mapofu, uri ruvheneko ro anhu ari mu cidima,
20 mupangiri we asina nzero, mufundisi we ana adoko uye wecinyasa kuzwisisa maumbirhwe akaizwa uzii no cokwadi zvinooneka mu Mutemo;
21 hino iwewe unofundisa amweni, audzifundisiwo here? Iwewe unoparidzira kuti, “Usabe,” aubi here?
22 Iwewe unobhuya kuti, “Usaite upombwe,” auiti upombwe here? Iwewe unozonda mifanikiso, aubi zviro zve mu tempro here?
23 Iwewe unodada ngo mutemo, hino ngei unorerusa Mwari ngo kutama kuzwira Mutemo?
24 Ngokuti zvakatarhwa kuti: “Zina ra Mwari riri kutukwa pakati pe madzinza amweni nge ndaa yenyu.”
25 Zvezvirokwazvo, ucekeri unobetsera basi kana wecizwira mutemo; asi kana usikazwiri mutemo, ucekeri wako apana zvaunobetsera.
26 Hino, kana munhu asikazi kuizwa ucekeri eciita zviro zve unatsi zvinorekethwa ngo Mutemo, kutama kuizwa ucekeri kake akuzwi wakaizwa ucekeri here?
27 Uye munhu asikazi kuizwa ucekeri pa nyama, ecizwira Mutemo, acakutonga iwewe usikazwiri mutemo kunyazi hazvo uno mutemo wakatarhwa uye wakaizwa ucekeri.
28 Mudjudha we zvirokwazvo andiepi uya unooneka ngece kunza uye kuizwa ucekeri andikopi kuya ke kunza kakaizwa pa nyama.
29 Kugara Mudjudha we zvirokwazvo kunobatanidza unhu we mukati uye wakaizwa ucekeri mu mwoyo make ngo mwiya mucena haiwa no mutemo wakatarhwa. Kusimbwa ke munhu uu kunobva kuna Mwari, haiwa ku anhu.
Masoko ari pasi
^ Kana kuti: “pa mwiya wese.”
