Tsamba ku Aroma 3:1-31
3 Hino, ngei zvecizwi Mudjudha uri nani kupinda amweni, kana kuti kuizwa ucekeri kunobetserei?
2 Iyena unopinda amweni pa zvese. Pakutanga, Adjudha akapaswa masoko macena a Mwari.
3 Hino, ngei amweni akhona aana kutenda? Zviri kuda kubhuya kuti kutama kawo kutenda, kunoreya kuti Mwari aazi kutendeka here?
4 Haiwa! Kunyazi zvikaitika kuti anhu anyepe, ese anodikana kuziya kuti Mwari anoreketa zvirokwazvo nguwa dzese, hinga kutarhwa kazvakaizwa kuti: “Kuti ese aziye kuti munoreketa zvirokwazvo uye muwine pamunonga mecitongwa.”
5 Hino tinoti kudini, kana kutama unatsi kedu keciita kuti unatsi wa Mwari uoneke? Mwari paanopangidza shungu dzake, zvinoreya kuti aana unatsi here? (Ndiri kureketa hinga mareketere anoita anhu.)
6 Haiwa! Kana zvakadaro, Mwari acatonga kudini nyika?
7 Asi kana manyepo angu eciita kuti cokwadi ca Mwari ciziikanwe kuti akudzwe, hino ngei ndiri kutongwa hinga mushaishi?
8 Uye ngei tisikareketi hinga zvinorekethwa no anhu amweni anonyepa eciti: “Ngatiite zvakashata kuti zvakanaka zviuye”? Kutongwa ke anhu awona kunonyasa kuenderana no unatsi.
9 Hino totii? Isusu tiri nani kupinda amweni here? Haiwa! Ngokuti isusu taakuzviziya kuti Adjudha no Agrego ese ano citema;
10 hinga kutarhwa kazvakaizwa kuti: “Apana munhu munatsi, kana umwe hake;
11 apana ano uzii; apana munhu anopsvaka Mwari.
12 Anhu ese akapauka, ese hawo akagara anhu asina zvaanobetsera; apana anopangidzira amweni nyasha, apana kana umwe hake.”
13 “Madokoriro awo akaita hinga makuwa akafununguka; anocengedza no rurumi rawo.” “Pa muromo pawo pano vheneno hinga yo nyoka.”
14 “Miromo yawo yakadzara no kutuka no masoko akashata.”
15 “Mirenje dzawo dzinogogomera kudurura ngazi.”
16 “Zvese zvaanoita zvinoparadza no kubarira amweni matambudziko,
17 uye aazii gwanza ro runyararo.”
18 “Awona aathyi Mwari.”
19 Isusu tinozviziya kuti zviro zvese zvinorekethwa no Mutemo, zvinoseenza ku aya ari pasi po Mutemo, kuti miromo yese inyarare uye nyika yese iziye kuti ino ndaa pamberi pa Mwari.
20 Ngokudaro, apana munhu acazwi munatsi ngo kuita zviito zve mutemo, ngokuti mutemo ndiwo unotiitisa kuti tiziye citema.
21 Asi zvino tisikaseenzesi mutemo, unatsi wa Mwari wakapangidzwa pamhene no upupuri unoizwa ngo Mutemo no Aphorofita,
22 unatsi wa Mwari unobva mu kutenda muna Djesu Kristu, wecienda ku anhu ese ano kutenda. Ngokuti apana musiyano.
23 Ngokuti anhu ese akashaisha uye akakonerhwa kupangidza rukudzo ra Mwari,
24 uye Mwari anoaona hinga anatsi nge ndaa yo mutengo wakaripa Kristu Djesu kuti aasudzunure, ici i cipo caakapaswa na Mwari nge ndaa ye nyasha dzake.
25 Mwari akapa Kristu hinga cibairo cekufukidza zvitema zve anhu, zvecitsamira pa kutenda mu ngazi yake. Mwari akaita izvona kuti apangidze unatsi wake, ngokuti ngo mwoyo wake unononoka kutsamwa, iyena akarekerera zvitema zvakaizwa kare.
26 Iyena akaita izvi kuti apangidze unatsi wake nyamasi uno, kuti azogare munatsi paanozopangidza kuti munhu wese unotenda muna Djesu ndi munatsi.
27 Hino, pano cikonzero cekuti munhu adzikudze here? Apana. Nge ndaa ye mutemo upi? We zviito here? Haiwa. Asi nge ndaa ye mutemo we kutenda.
28 Ngokuti isusu tinoziya kuti munhu unozwi munatsi nge ndaa ye kutenda, haiwa ngo zviito zve mutemo.
29 Kodi iyena ndi Mwari we Adjudha basi here? Andiepiwo Mwari we anhu e madzinza amweni here? Honde, iyenawo ndi Mwari we anhu e madzinza amweni.
30 Ngokuti Mwari ndi umwe basi, iyena acati ku aya akaizwa ucekeri kuti anatsi nge ndaa ye kutenda uye acatizve ku aya asikazi kuizwa ucekeri kuti anatsi nge ndaa ye kutenda kawo.
31 Hino, tinobvisa mutemo nge ndaa ye kutenda kedu here? Haiwa! Pane kudaro, isusu tinotobambisa mutemo.
