Tsamba ku Aroma 4:1-25
4 Kana zvakadaro, tingabhuyei ngezva Abrahamu tsekuru edu, pa zviya zvaakatambira pa nyama?
2 Hinga muezaniso, kudai Abrahamu wakazwi munhu munatsi nge ndaa ye zviito, waizogara no cikonzero ce kudzikudza, asi haiwa pamberi pa Mwari.
3 Asi Matarhwa anotii? Awona anoti: “Abrahamu wakatenda muna Djehovha uye zvakaita kuti azwi munhu munatsi.”
4 Kana munhu eciseenza, mare yake yaanotambira aingazwi waizirhwa nyasha, asi kuti i mare yaanonga aseenzera.
5 Ngo dii rimweni, munhu asikaseenzi asi ecitenda Uya anoita kuti munhu anocitema agare munatsi, kutenda kake kunozwi unatsi.
6 Hinga zvakarekethwa na Dhavhidhi ngezve mupfaro we munhu anozwi na Mwari munatsi haiwa nge zviito zvake, eciti:
7 “Anopfara aya akarekererhwa zvishaishi zvawo uye zvitema zvawo zvakafudzwa;*
8 anopfara munhu anorekererhwa citema cake na Djehovha.”
9 Hino mupfaro uu, unooneka pa anhu akaizwa ucekeri basi here kana kuti no aya asikazi kuizwa ucekeri? Ngokuti tinoti: “Abrahamu wakazwi munhu munatsi nge ndaa ye kutenda kake.”
10 Iyena wakazwi munhu munatsi pa mugariro upi? Paainga aizwa ucekeri here kana kuti paainga asati aizwa ucekeri? Mwari akamuona kuti wainga ari munhu munatsi paainga asati aizwa ucekeri.
11 Iyena wakapaswa cipangidzo ce ucekeri nge ndaa ye unatsi we kutenda waainga anawo asati aizwa ucekeri, kuti agare baba e ese ano kutenda asati aizwa ucekeri, kuitira kuti agare anatsi;
12 uye kuti agare baba e anhu akaizwa ucekeri, haiwa basi ku aya anoita ucekeri, asiwo ku aya anohamba no kutenda kainga kuna baba edu Abrahamu paainga asati aita ucekeri.
13 Ngokuti Abrahamu kana kuti ana* ake, aazi kugondeswa kuti aizogara nhaka ye nyika ngokuti aizwira mutemo, asi akagondeswa ngokuti akazwi anatsi nge ndaa ye kutenda.
14 Ngokuti kana aya anoteedzera mutemo ari agari e nhaka, kutenda kunonga kusikacabetseri uye gondeso yakhona inonga isikacaseenzi.
15 Zvezvirokwazvo kutama kuzwira Mutemo kunounzisa shungu, asi pasina mutemo, apanawo cishaishi.
16 Ndiyo ndaa Abrahamu wakatambira gondeso nge ndaa ye kutenda kake, hinga cipangidzo ce nyasha dza Mwari, kuitira kuti igare ye cokwadi ku ana* ake ese, haiwa basi ku aya anocengeta Mutemo asiwo kuno aya ano kutenda kakaita hingana ka Abrahamu, baba edu tese.
17 (Hinga kutarhwa kazvakaizwa kuti: “Ndakakugadza kuti ugare baba e madzinza akawanda.”) Ngokuti Mwari ndiye akaita gondeso ii, waainga atenda maari, uya anoita kuti akafa agare apenyu uye anodainza zviro zvisiriyopi hinga zviriyo.
18 Kunyazi hazvo wainga asisina kariro, wainga ano kutenda kaibva pa kariro, kuti waizogara baba e madzinza akawanda maererano no zvainga zvarekethwa kuti: “Ndizvo zvicaita ana* ako.”
19 Kunyazi hazvo wainga asikazi kupera simba pa kutenda, iyena wairangarira ngezve kupera simba ke mwiri wake, (ngokuti wainga ano makore 100), uyewo wairangarirazve kuti Sara aacabari ngokuti wainga acembera.*
20 Nge ndaa ye gondeso ya Mwari, iyena aazi kuremba pa kutenda, asi wakabambiswa nge kutenda kake, ecikudza Mwari,
21 ano cokwadi cekuti Mwari aikwanisa kuita zvaainga apikira.
22 Ndiyo ndaa, “zvakaita kuti azwi munhu munatsi.”
23 Ngokudaro, masoko ekuti “zvakaita kuti azwi” aazi kutarhwa basi nge ndaa yake,
24 asi akatarhwawo nge ndaa yedu. Isusu tinozodainzwawo kuti anatsi, ngokuti tinotenda Uya akamutsa Djesu Tenzi wedu kubva ku akafa.
25 Mwari akatendera kuti Djesu auraiwe nge ndaa ye zvishaishi zvedu uye omumutsa kuti tizwi anatsi.
Masoko ari pasi
^ Kana kuti: “zvakarekererhwa.”
^ Cigrego: “mbeu.”
^ Cigrego: “mbeu.”
^ Cigrego: “mbeu.”
^ Kana kuti: “wainga asikabari.”
