Ku Aroma 5:1-21
5 Hino, ngokuti takazwi tiri anatsi nge ndaa ye kutenda kedu, ngatigare no runyararo* na Mwari nge ndaa ya Tenzi wedu Djesu Kristu.
2 Kutenda kedu Djesu kunotiitisa kuti tikhwedere kuna Mwari kuti atiitire nyasha; ngokudaro, ngatipfare* pa kariro yo rukudzo inobva kuna Mwari.
3 Haiwa izvona basi, asi ngatipfare* patinonga tiri mu matambudziko, ngokuti tinoziya kuti kutambudzika kunoita kuti tishingirire;
4 kushingirira, kunotiitisa kuti titenderhwe na Mwari; kutenderhwa ikona, kunotiitisa kuti tigare no kariro,
5 uye kariro aitiitisi kuti tiore mwoyo; ngokuti rudo ra Mwari rakadururhwa mu mwoyo medu nge mwiya mucena, watakapaswa.
6 Ngokudaro, patainga ticiri anhu asina simba, Kristu akafira anhu anoita zviro zvakashata nguwa yakhona payainga yakwana.
7 Ngokuti zvinoshupha kuti munhu afire munhu munatsi; asi pamweni ungatodzipira kuti afire munhu akanaka.
8 Asi Mwari akapangidza rudo rake katiri, ngokuti patainga ticiri ashaishi, Kristu akatifira.
9 Hino, ngokuti takazwi anatsi nge ndaa ye ngazi yake, tingakwanisa kugara no cokwadi cekuti ticaponeswa nge ndaa yake pa shungu dza Mwari.
10 Ngokuti patainga ticiri azondi ake, takaizwa kuti tigarezve no ushamwari we padhuze na Mwari peciseenzeswa rufu re Mwana wake. Zvino, taano cokwadi cekuti ticazoponeswa nge ndaa ye upenyu wake, ngokuti taashamwari dza Mwari.
11 Andizvopi zvega basi, zvatakaitirhwa na Mwari eciseenzesa Tenzi wedu Djesu Kristu, zvinotiita kuti tipfare. Ngokuti nge ndaa yake takaizwa kuti tigarezve no ushamwari we padhuze na Mwari.
12 Ngokuti citema cakapinda mu nyika nge ndaa ye munhu umwe basi uye rufu rakapinda nge ndaa ye citema, ngokudaro rufu rakabararika ku anhu ese, ngokuti ese ainga ashaisha . . .
13 Citema cainga cirimo mu nyika Mutemo usati waapo, asi munhu aangazwi ano citema kana pasina mutemo.
14 Kunyazi zvakadaro, rufu rakatonga hinga mambo kubvira kuna Adhamu dakara kuna Mozesi, recitonga kunyazi aya asikazi kushaisha hinga kushaisha kakaita Adhamu, uwo wainga akaezana no uya aizouya.
15 Asi cipo acizi kuita hinga cishaishi. Ngokuti kana anhu akawanda akafa nge ndaa ye cishaishi ce munhu umwe basi, nyasha dza Mwari no cipo cake zvakaonekepo nge ndaa yo nyasha dze munhu umwe basi, Djesu Kristu, cipo icona cinobetserawo anhu akawanda!
16 Uyewo cipo ici acizi kuezana no cishaishi cakaizwa no munhu umwe basi. Ngokuti muphanico wakapaswa mumasure me cishaishi cimwe basi, wainga wekuti anhu ese ano ndaa, asi cipo cakapaswa mumasure me zvishaishi zvakawanda cainga cekuti anhu azwi anatsi.
17 Asi kana rufu rakatonga hinga mambo nge ndaa ye cishaishi ce munhu umwe basi, hino aya akatambira nyasha no cipo ce unatsi, anozorarama ecitonga hinga madzimambo nge ndaa ye munhu umwe basi, Djesu Kristu!
18 Hino, kuitawo hinga cishaishi ce munhu umwe basi cakaita kuti anhu ese azwi ano ndaa, ngo mushobo umwewo ciito cimwe ce unatsi cakaita kuti anhu ese azwi anatsi kuti aone upenyu.
19 Nge kutama kuzwira ke munhu umwe basi anhu ese akazwi ashaishi, ngo mushobo umwewo ngo kuzwira ke munhu umwe basi anhu akawanda acazozwi anatsi.
20 Mutemo wakauya kuti zvishaishi zvitunhudzirike. Asi cishaishi pacinonga cecitunhudzirika, nyasha dza Mwari dzinonga dzecitonyasa kutunhudzirikawo.
21 No cinangwa cei? No cinangwa cekuti, sezvo citema cakatonga hinga mambo pamwepo no rufu, nyasha dza Mwari dzitongewo hinga mambo ngo unatsi wecitiendesa ku upenyu usikaperi peciseenzeswa Djesu Kristu Tenzi wedu.
Masoko ari pasi
^ Mabhaibheri amweni anoti: “tino runyararo.”
^ Mabhaibheri amweni anoti: “tinopfara.”
^ Mabhaibheri amweni anoti: “tinopfara.”
