Tsamba ku Aroma 7:1-25
7 Hama, kodi amuzvizii here kuti Mutemo unotonga munhu paanonga aciri mupenyu? (Ngokuti ndiri kureketa kune aya anoziya mutemo.)
2 Hinga muezaniso, mwanakadzi wakawakwa wakasungwa no mutemo we mwamuna wake paanonga aciri mupenyu; asi kana mwamuna wake akafa, iyena wasudzunurhwa pa mutemo we mwamuna wake.
3 Hino, kana akawakwa no mwanarume umweni mwamuna wake aciri mupenyu, iyena unonga eciita upombwe. Asi kudai mwamuna wake akafa, iyena wasudzunurhwa pa mutemo we mwamuna wake, zvekuti kana akawakwa no mwanarume umweni unonga asiripi kuita upombwe.
4 Hino hama dzangu, imwimwiwo makafira Mutemo nge ndaa yo mwiri wa Kristu. Ngokudaro, imwimwi maa anhu e munhu umweni, uya akamutswa kubva ku akafa, kuitira kuti tibare micero yakanaka inokudza Mwari.
5 Ngokuti patairarama maererano no nyama, zvido zvedu zvekuda kuita zvakashata zvaimutswa no Mutemo, zvainga zveciseenza mu mwiri* yedu kuti zvibare micero inotiendesa ku rufu.
6 Asi zvino takasudzunurhwa pa Mutemo, ngokuti aucatipingaidzizve. Ngokudaro, isusu tinokwanisa kugara aranda a Mwari maererano no mwiya mucena, haiwa maererano no mutemo wakaita zvekutarhwa kare.
7 Hino totii? Mutemo i citema here? Haiwa! Zvezvirokwazvo, kudai painga pasina Mutemo ndainga ndisikadi kuziya cinozwi citema. Ngo muezaniso, ndainga ndisikadi kuziya cinozwi kusirira kudai Mutemo usikazi kubhuya kuti: “Usasirire.”
8 Asi citema pacakapaswa mukana ngo nhungamiriro, icona cakandiita kuti ndisirire zviro zvese, ngokuti pakainga kusina mutemo citema cainga cakafa.
9 Zvezvirokwazvo, inini ndairarama ndisina Mutemo. Asi pakandoguma nhungamiriro, citema cakaponazve, inini ndofa.
10 Uye nhungamiriro yandaiona kuti yaida kundiponesa, ndakazoona kuti iri kuda kundiuraisa.
11 Ngokuti citema pacakakhorovhera mukana wacakapaswa no mutemo, icona cakandicengedzera uye condiuraya ceciseenzesa uwona.
12 Hino Mutemo pacawo wakacena, uye nhungamiriro yakacena, ino unatsi uye yakanaka.
13 Hino ndakauraiwa no ciro cakanaka here? Haiwa! Asi citema ndicona cakandiuraya, kuti zvioneke kuti citema ndicona cinoda kuti ndife ngokuita zvakanaka. Ngokudaro, peciseenzeswa nhungamiriro, citema cinozobudiswa pamhene kuti cakashata maningi.
14 Ngokuti tinoziya kuti Mutemo unobva kuna Mwari eciseenzesa mwiya wake, asi inini ndiri munhu we nyama, wakatengeswa ku uranda we citema.
15 Andizwisisi zvandiri kuita. Ngokuti andiiti zvandinoda, asi ndinoita zvandinozonda.
16 Hino, kana ndeciita zvandisikadi, ndinotendera kuti Mutemo wakanaka.
17 Asi zvino, andiciripi inini ndiri kuzviita, asi citema cinogara mandiri ndicona ciri kuzviita.
18 Ngokuti ndinoziya kuti mukati mangu, kana kuti mu nyama yangu, amuna cakanaka; ngokuti ndinoda kuita cakanaka, asi andina simba rekuzviita.
19 Ngokuti andiiti zvakanaka zvandinoda, asi zvakashata zvandisikadi ndizvo zvandinoita.
20 Hino, kana ndeciita zvandisikadi, andiciripi inini ndiri kuzviita, asi citema cinogara mandiri ndicona ciri kuzviita.
21 Asi mu mwiri wangu, muno mutemo wekuti: Pandinoda kuita zvakanaka, zvakashata zvinotanga kundiuira.
22 Zvezvirokwazvo, ndinonyasa kupfarira mutemo wa Mwari maererano no zvandiri nge cemukati,
23 asi ndinoona mutemo umweni uri mu mwiri* wangu wecirhwisana no mutemo we ndangariro dzangu uye wondiitisa muranda ku mutemo we citema uri mu mwiri* wangu.
24 Ndiri munhu we nhamo! Ndiani angaponesa mwiri wangu uri mu rufu rakadai?
25 Ndinotenda Mwari nge ndaa ya Djesu Kristu Tenzi wedu! Hino, no ndangariro dzangu inini ndiri muranda we mutemo wa Mwari, asi no nyama yangu ndiri muranda we mutemo we citema.
Masoko ari pasi
^ Cigrego: “mu nhengo dze mwiri.”
^ Cigrego: “mu nhengo dze mwiri.”
^ Cigrego: “mu nhengo dze mwiri.”
